Vakarua 30 - Ai Vola Tabu (Vakadewa Makawa Vakavoutaki 2021)

Na Kalougata ni Lesu vua na Kalou e na Veivutuni

¹ “Ia ni sa yacovi kemuni na ka kecega oqo, na vosa ni veivakalougatataki kei na vosa ni veivakarusai, o koya ka'u sa tauca vei kemuni, ka ko ni sa nanuma kina mai na matanitu kecega sa vakasevi kemuni tani kina ko Jiova na nomuni Kalou,

² ka sa lesu mai kina vei Jiova na nomuni Kalou, ka talairawarawa ki na nona vosa, me vaka na ka kecega ka'u sa vakarota vei kemuni edaidai, koi kemuni kei ira na luvemuni, e na lomamuni taucoko kei na yalomuni taucoko,

³ ena qai vukica na nomuni vakabobulataki ko Jiova na nomuni Kalou, ka lomani kemuni, ka lesu ka soqoni kemuni vata tale mai na matanitu kecega sa dui vakasevi kemuni kina ko Jiova na nomuni Kalou.

⁴ Kevaka sa vakasevi tani eso na nomuni ki nai yalayala kei lomalagi, ena soqoni kemuni vata mai kina ko Jiova na nomuni Kalou, ka kauti kemuni mai kina.

⁵ Ka vakayacori kemuni ko Jiova na nomuni Kalou ki na vanua era taukena na nomuni qase, ka ko ni na taukena; ka na caka vinaka vei kemuni ko koya, ka vakatuburi kemuni mo ni lewe vuqa, ka lewe lailai na nomuni qase.

⁶ Ena ciliva talega na yalomuni ko Jiova na nomuni Kalou, kei na yalodra na nomuni kawa, mo ni lomani Jiova kina na nomuni Kalou e na lomamuni taucoko, kei na yalomuni taucoko, mo ni bula kina.

⁷ Ena vakayacora talega ko Jiova na nomuni Kalou na vosa ni veicudruvi kecega oqo vei ira na nomuni meca, kei ira era sa cati kemuni, ka vakacacani kemuni.

⁸ Ia ko ni na lesu ka vakarorogo ki na vosa i Jiova, ka cakava na nona i vakaro kecega ka'u sa vakarota vei kemuni edaidai.

⁹ Ia ena vakavutuniyautaki kemuni ko Jiova na nomuni Kalou e na cakacaka kecega ni ligamuni, e na vua ni ketemuni, kei na vua ni nomuni manumanu e yavai va, kei na vuata ni nomuni vanua, mo ni vinaka kina. Ni na qai rekitaki kemuni tale ko Jiova mo ni vinaka, me vaka ka rekitaki ira na nomuni qase,

¹⁰ kevaka ko ni na vakarorogo ki na vosa i Jiova na nomuni Kalou, mo vakabauta na nona i vakaro kei na nona i lesilesi sa volai e nai vola ni vunau oqo, kevaka ko ni sa lesu mai vei Jiova na nomuni Kalou e na lomamuni taucoko, kei na yalomuni taucoko.

Na Digitaki ni Bula se na Mate

¹¹ “Ni sa sega ni dredre vei kemuni nai vakaro oqo ka'u sa vakarota vei kemuni edaidai, ka sa sega talega ni yawa.

¹² Sa sega mai lomalagi, me kainaki kina, ‘O cei me lako cake ki lomalagi, ka kauta mai vei keda, me da rogoca, ka cakava?’

¹³ A sa sega talega mai tai kadua ni wasawasa, me kainaki kina, ‘O cei me lakova na wasawasa, ka kauta mai vei keda, me da rogoca, ka cakava?’

¹⁴ Ia sa voleka sara vei kemuni na vosa, io e na gusumuni, kei na lomamuni, mo ni cakava rawa.

¹⁵ “Raica, ka'u sa tauca e matamuni edaidai na bula kei na ka vinaka, na mate talega kei na ca.

¹⁶ Ni kevaka ko ni talairawarawa ki nai vakaro i Jiova na nomuni Kalou ka'u sa vakaroti kemuni kina edaidai, mo ni lomani Jiova na nomuni Kalou, mo ni lako e nona sala, ka vakabauta na nona i vakaro kei na nona i lesilesi kei na nona lewa, ia ko ni na qai bula kina ka tubu me lewe vuqa, ka na vakalougatataki kemuni talega ko Jiova na nomuni Kalou e na vanua ko ni sa lako kina mo ni taukena.

¹⁷ Ia kevaka sa vuki tani na lomamuni, mo ni bese kina ni vakarorogo, ka sa vagolei tani ga ka soro ki na kalou tani eso, ka qaravi ira,

¹⁸ au sa qai tukuna kina vei kemuni e na siga oqo ni kemuni na rusa vakaidina. Ena sega ni balavu na nomuni bula e na vanua ko ni sa qalo kosova kina na Joritani mo ni taukena.

¹⁹ Au sa cavuti lomalagi kei vuravura edaidai me i vakadinadina ni'u sa tauca e matamuni na bula kei na mate, na veivakalougatataki kei na veicudruvi. Ia mo ni digitaka mada na bula, mo ni bula kina, koi kemuni kei na nomuni kawa,

²⁰ mo ni lomani Jiova na nomuni Kalou, mo ni vakarorogo ki na nona vosa, ka mo ni kabiti koya talega; ni sa nomuni vu-ni-bula ko koya, ka sa vakabalavutaka na nomuni bula, mo ni tiko kina e na vanua sa bubului kina ko Jiova me solia vei iratou na nomuni qase, vei Eparaama, vei Aisake, kei Jekope.”