Vakarua 27 - Ai Vola Tabu (Vakadewa Makawa Vakavoutaki 2021)

Na Vatu Ceuti kei nai Cabocabo-ni-soro e Ului Ipali

¹ Ia ko Mosese kei ira na qase ni Isireli era sa vakaroti ira na tamata, ka kaya, “Mo ni vakabauta nai vakaro kecega ka'u sa vakarota vei kemuni edaidai.

² Ia e na siga ko ni sa qalo kosova kina na Joritani, ki na vanua sa solia vei kemuni ko Jiova na nomuni Kalou, mo ni qai vakaduria eso na vatu lelevu, ka boroya e nai boro.

³ Ia mo ni vola kina na vosa kecega ni vunau oqo, ni ko ni sa yaco ki tai kadua, mo ni curu ki na vanua sa solia vei kemuni ko Jiova na nomuni Kalou, a vanua sa dave kina na sucu kei na oni; me vaka sa yalataka vei kemuni ko Jiova na Kalou ni nomuni qase.

⁴ Ia ni ko ni sa qalo kosova na Joritani, mo ni qai vakaduria na veivatu oqo, ka'u sa vakarota vei kemuni edaidai, e na Ulunivanua ko Ipali, ia mo ni boroya e nai boro.

⁵ Ia ko ni na tara kina e dua nai cabocabo-ni-soro vei Jiova na nomuni Kalou, ai cabocabo-ni-soro vatu. Mo ni kakua ni taya e na kaukamea.

⁶ Mo ni tara nai cabocabo-ni-soro i Jiova na nomuni Kalou e na vatu sa sega ni ta. Ia ko ni na vakacabora kina eso nai soro kama vei Jiova na nomuni Kalou,

⁷ ko ni na vakamatea talega eso nai madrali ni veivinakati, ka kana mai kea, ka reki e na mata i Jiova na nomuni Kalou.

⁸ Ia mo ni vola e na vatu na vosa kecega ni vunau oqo me macala sara.”

Vosa ni Cudru era Tau mai Ului Ipali

⁹ A sa vosa vei ira kecega na Isireli ko Mosese kei ira na bete na Livai, ka kaya, “Mo ni qarauni kemuni, ka vakarorogo, na Isireli; e na siga oqo ko ni sa yaco mo ni matanitu i Jiova na nomuni Kalou.

¹⁰ Ia mo ni vakarorogo ki na vosa i Jiova na nomuni Kalou, ka cakava na nona i vakaro, kei na nona i lesilesi, ka'u sa vakarota vei kemuni edaidai.”

¹¹ A sa vakaroti ira na tamata e na siga ko ya ko Mosese, ka kaya,

¹² “O ira oqo era na tu e na dela ni Ulunivanua ko Kirisimi me vosavakalougatataki ira na tamata, ni ko ni sa yaco ki tai kadua ni Joritani; ko ira na Simione, kei ira na Livai, kei ira na Juta, kei ira na Isakari, kei ira na Josefa, kei ira na Penijamini.

¹³ Ia ko ira oqo era na tu e na dela ni Ulunivanua ko Ipali me ra cavuta na vosa ni veicudruvi; ko ira na Rupeni, ko ira na Kata, kei ira na Aseri, kei ira na Sevuloni, ko ira na Tani, kei ira na Navitalai.

¹⁴ A ra na vosa na Livai, ka kaya vei ira kecega na Isireli e na domo levu:

¹⁵ “Me cudruvi na tamata sa cakava e dua na matakau ceuceu se na matakau sa vakawaicalataki, na ka vakasisila vei Jiova, na cakacaka ni matai, ka vakaduria e na tikina vuni.” A ra na vosa na tamata kecega, ka kaya, “Emeni!”

¹⁶ “Me cudruvi ko koya sa beci tamana se tinana.” A ra na vakaemeni na tamata kecega.

¹⁷ “Me cudruvi ko koya sa kisira nai yalayala ni vanua ni kai nona.” A ra na vakaemeni na tamata kecega.

¹⁸ “Me cudruvi ko koya sa vakasesea na mataboko mai na sala.” A ra na vakaemeni na tamata kecega.

¹⁹ “Me cudruvi ko koya sa kauta vakatani na lewa e na vuku ni kai tani, kei ira sa sega na tamadra, kei na yada.” A ra na vakaemeni na tamata kecega.

²⁰ “Me cudruvi ko koya sa veimoceri kei na wati tamana, ni sa vakarairaitaka ko koya na luvawale nei tamana.” A ra na vakaemeni na tamata kecega.

²¹ “Me cudruvi ko koya sa koto vata kei na dua na manumanu.” A ra na vakaemeni na tamata kecega.

²² “Me cudruvi ko koya sa cala kei na ganena, na luve i tamana, se na luve i tinana.” A ra na vakaemeni na tamata kecega.

²³ “Me cudruvi ko koya sa cala kei na tina ni watina.” A ra na vakaemeni na tamata kecega.

²⁴ “Me cudruvi ko koya sa mokuta lo na kai nona.” A ra na vakaemeni na tamata kecega.

²⁵ “Me cudruvi ko koya sa taura nai solisoli ni veivaqumi me mokuta-mate kina na tamata sa sega ni cala.” A ra na vakaemeni na tamata kecega.

²⁶ “Me cudruvi ko koya sa sega ni vakadinadinataka na vosa ni vunau oqo me cakava.” A ra na vakaemeni na tamata kecega.