Vakarua 24 - Ai Vola Tabu (Vakadewa Makawa Vakavoutaki 2021)

Vakaro e Vauca na Vakawati kei na Veibiu

¹ “Ni sa vakawati kei na dua na yalewa na tagane, ka sa qai sega ni lomana ni sa kunea vua e dua na ka sa sega ni savasava kina, me qai vola e dua nai vola ni veibiu ka solia ki na ligana, ka vakatalai koya tani mai na nona vale.

² Ia ni sa lako tani mai na nona vale, sa tara vua me la'ki veiwatini kei na tamata tani.

³ Ia kevaka sa cati koya na watina e muri, ka vola e dua nai vola ni veibiu, ka solia ki na ligana, ka vakatalai koya tani mai na nona vale, se sa mate na watina e muri, o koya ka taura me watina,

⁴ sa tabu vua na watina eliu, o koya ka talai koya yani, me taura tale me watina, ni sa vakatawasavasavataki oti; ni sa ka vakasisila oqo e na mata i Jiova. Ia mo ni kakua ni vakavuna me ca na vanua sa solia vei kemuni ko Jiova na nomuni Kalou mo ni taukena.

Na Veilawa Tale Eso

⁵ “Ni sa qai vakawati vou e dua na tagane, me kakua ni lako yani ki nai valu ko koya, me kakua talega ni lesi ki na dua na cakacaka. Me tiko lalaga ga mai nona vale ka yabaki dua, ka vakamarautaka na watina sa qai taura ko koya.

⁶ “Me kakua ni taurivaki na vatu-i-qaqi sa toka e cake se toka e ra me kenai vakadinadina ni ka, ni sa taurivaki kina na kenai vakadinadina ni ka sa bula kina na tamata.

⁷ “Kevaka sa kune na tamata ni sa butakoca e dua vei ira na wekana na Isireli me nona bobula, se me volitaka; ena qai mate na tamata butako ko ya; ia ko ni na vakaotia kina na ca mai na kemuni maliwa.

⁸ “Mo ni qarauni kemuni e na vuku ni mate ca na vukavuka, mo ni nanuma vinaka ka mo kitaka na ka kecega era sa vakavulica vei kemuni ko ira na bete na Livai; ni nanuma mo ni cakava na ka ka'u a vakarota vei ira.

⁹ Mo ni nanuma na ka sa cakava ko Jiova na nomuni Kalou vei Miriama e na sala ni ko ni a lako tani mai Ijipita.

¹⁰ “Ni ko ni sa solia me talevaki e dua na ka vua na kai nomuni, mo ni kakua ni curuma na nona vale mo kauta mai vua nai vakadinadina ni ka sa soli me talevaki.

¹¹ Mo ni tu ga e tautuba, ia na tamata ko ni sa solia vua na ka me talevaki, ena kauta vei kemuni ki tautuba nai vakadinadina ni ka sa soli me talevaki.

¹² Ia kevaka sa dravudravua na tamata ko ya, me kakua ni vakabogi vei iko na nona i vakadinadina ni ka sa soli me talevaki.

¹³ Mo ni solia dina vua nai vakadinadina ni ka sa soli me talevaki, ni sa dromu na mata-ni-siga, me moce rawa ko koya e nona i tutuvi, ka me vosavakalougatataki kemuni kina. Ia ena wili oqo me nomuni cakacaka dodonu e na mata i Jiova na nomuni Kalou.

¹⁴ “Mo ni kakua ni vakasaurarataka na tamata sa voli na nona cakacaka sa vakaloloma ka dravudravua, se sa dua vei ira na wekamuni, se dua vei ira na nomuni vulagi sa tiko e nomuni vanua e na nomuni lomanibai.

¹⁵ Mo ni solia nai voli ni nona cakacaka e na kena siga, me kakua ni dromu mada na mata-ni-siga, ni sa dravudravua ko koya ka sa gadreva; de tagicaki kemuni ko koya vei Jiova, ia ko ni sa na cala kina.

¹⁶ “Me ra kakua ni vakamatei na qase e na vukudra na gone, me ra kakua talega ni vakamatei na gone e na vukudra na qase. Ena vakamatei na tamata yadua e na vuku ni nona i valavala ca.

¹⁷ “Mo ni kakua ni kauta vakatani na lewa vua na vulagi, se ko ira sa sega na tamadra; se kauta na nona i sulu na yada me kenai vakadinadina ni ka.

¹⁸ Ia mo ni nanuma ga ni kemuni a bobula mai Ijipita, a sa vakabulai kemuni mai kina ko Jiova na nomuni Kalou; o koya ka'u sa vakaroti kemuni kina mo ni kitaka na ka oqo.

¹⁹ “Ni ko ni sa tamusuka na nomuni sila e na nomuni veiwere, ka sa guilecava e dua nai vau sila e na were, mo ni kakua ni lakova tale. Me nona ga na vulagi, kei ira sa sega na tamadra, kei na yada, me vakalougatataki kemuni kina ko Jiova na nomuni Kalou e na cakacaka kecega ni ligamuni.

²⁰ Ni ko ni sa samuta na nomuni vu ni olive, mo ni kakua ni lakova tale na tabana. Me nona ga na vulagi, kei ira sa sega na tamadra, kei na yada.

²¹ Ni ko ni sa tauca na vua ni nomuni veivaini, mo ni kakua ni lakova tale na kena vo. Me nona ga na vulagi, kei ira sa sega na tamadra, kei na yada.

²² Ia mo ni nanuma ni ko ni a bobula mai na vanua ko Ijipita; o koya ka'u sa vakaroti kemuni kina mo ni kitaka na ka oqo.