Vakarua 15 - Ai Vola Tabu (Vakadewa Makawa Vakavoutaki 2021)

Na Yabaki ni Vakacecegu

¹ “E na mua ni kavitu ni veiyabaki, mo ni dauia e dua na veisereki.

² Sa vakaoqo nai valavala ni veisereki: a tamata yadua sa soli-ka vua na kai nona me qai sereka ka me kakua ni saumi lesu. Me kakua ni taroga vua na kai nona se na wekana, ni sa kacivaki na veisereki i Jiova.

³ E rawa mo ni la'ki taroga vua na kai tani, ia na ka sa nomuni ka sa tu vua na wekamuni mo ni sereka ga ka me kakua ni saumi.

⁴ Ia ena sega kina ni dua na tamata me dravudravua vei kemuni, ni na vakalougatataki kemuni vakalevu ko Jiova e na vanua sa solia vei kemuni ko Jiova na nomuni Kalou me nomuni votavota mo ni taukena,

⁵ ka kevaka walega ko ni sa vakarorogo vakavinaka ki na domo i Jiova na nomuni Kalou, ka nanuma mo ni cakava nai vakaro kecega oqo ka'u sa vakarota vei kemuni edaidai.

⁶ Ni na vakalougatataki kemuni ko Jiova na nomuni Kalou, me vaka sa yalataka vei kemuni, ia ko ni na dausoli-ka vei ira na veimatanitu e vuqa, ia ko ni na sega ni kerekere; ko ni na lewa talega na matanitu e vuqa, ia era na sega ni lewai kemuni.

⁷ “Kevaka sa tiko vei kemuni na tamata dravudravua, e dua vei ira na wekamuni, e na dua na nomuni lomanibai, e na nomuni vanua sa solia vei kemuni ko Jiova na nomuni Kalou, mo ni kakua ni vakaukauwataka na yalomuni se qumia na ligamuni vua na wekamuni dravudravua,

⁸ ia mo ni dedeka ga na ligamuni vei koya, ka solia vua na ka me sotavi kina na nona gagadre, se mani cava soti na ka e gadreva.

⁹ Mo ni qarauni kemuni de dua na nanuma ca e na basika e yalomuni, ka vaka, ‘Sa voleka mai nai kavitu ni yabaki, na yabaki ni veisereki’, ka sa ca na matamuni vua na wekamuni dravudravua, ka ko ni sega ni cakacaka vakayalololoma vua; ka sa rawa ni tagi kina vei Jiova e na vukumuni ko koya, ka ko ni sa cala kina.

¹⁰ Mo ni dausoli ka ni loloma e na yalo savu, ka mo ni kakua ni dauyaloca ni ko ni sa soli-ka vua, ni vuku ni ka oqo ena vakalougatataki kemuni kina ko Jiova na nomuni Kalou e na nomuni cakacaka kecega, kei na ka kecega sa cakava na ligamuni.

¹¹ Ni na sega ni mudu na tamata dravudravua e na loma ni vanua, o koya ka'u sa vakaroti kemuni kina, ka kaya, ‘Mo ni dedeka sara na ligamuni vua na wekamuni, ki na nomuni tamata wale, kei na nomuni tamata dravudravua, e na nomuni vanua.’

Vakaro e Vauci Ira na Bobula

¹² “Kevaka sa volitaki vei kemuni e dua na wekamuni, sa Iperiu tagane, se sa Iperiu yalewa, ka sa qaravi kemuni ka yabaki ono, ia mo ni qai sereki koya me lako yani e na galala e nai kavitu ni yabaki.

¹³ Ia ni kemuni sa laiva e dua na bobula tagane me sa lako e na galala, mo ni kakua ni laivi koya me lako liga lala yani.

¹⁴ Mo ni solia vakayauyau vei koya na veika mai na nomuni qele ni manumanu, mai na nomuni rara ni samu sila, kei na nomuni keli-waini, ka mo ni solia vei koya eso na ka sa vakalougatataki kemuni kina ko Jiova na nomuni Kalou.

¹⁵ Mo ni daunanuma ni kemuni a bobula taumada mai na vanua ko Ijipita, ka sa qai vakabulai kemuni ko Jiova na nomuni Kalou; o koya ka'u sa vakarota kina na ka oqo vei kemuni edaidai.

¹⁶ Ia kevaka sa kaya vei kemuni ko koya, ‘Au na sega ni lako tani vei kemuni’, ka ni sa lomani kemuni kei na nomuni lewe-ni-vuvale ko koya, ni sa tiko vinaka kei kemuni,

¹⁷ mo ni qai taura nai cula ka cula na daligana ka veituituitaka kei nai sogo ni vale, ena qai nomuni bobula ka sega ni mudu. Ia mo ni kitaka talega vakakina vua na nomuni bobula yalewa.

¹⁸ Mo ni kakua ni nanuma ni sa ka dredre vei kemuni mo ni sereki koya me lako yani e na galala, ni sa tautauvata na nona qaravi kemuni e na loma ni yabaki ono kei na nona qaravi kemuni e na loma ni yabaki tinikarua na tamata sa voli na nona cakacaka. Ia ena vakalougatataki kemuni ko Jiova na nomuni Kalou e na ka kecega ko ni sa cakava.

Vakaro e Vauci Ira na Ulumatua ni Manumanu

¹⁹ “A ulumatua tagane kecega ni nomuni bulumakau kei na nomuni sipi mo ni vakatabuya me nei Jiova na nomuni Kalou. Mo ni kakua ni vakayagataka na ulumatua ni nomuni bulumakau e na dua na cakacaka, ka mo ni kakua talega ni kotiva na ulumatua ni nomuni sipi.

²⁰ Mo ni kania ga, koi kemuni kei na nomuni lewe-ni-vuvale, e na mata i Jiova na nomuni Kalou, e na veiyabaki, e na yasana sa digitaka ko Jiova.

²¹ Ia kevaka sa ca e dua na tikina—ke sa lokiloki, se mataboko, se dua na tikina e ca—mo ni kakua ni vakacabora vei Jiova na nomuni Kalou.

²² Mo ni kania e nomuni lomanibai, ko koya sa sega ni savasava vata kei koya sa savasava, me vaka na kaseli kei na dia.

²³ Ia na kena dra ga mo ni kakua ni kania; mo ni livia tani ga ki na qele me vaka na wai.