Sefanaia 3 - Ai Vola Tabu (Vakadewa Makawa Vakavoutaki 2021)

Nai Valavala Ca i Jerusalemi

¹ Ena ca ko koya sa yalobese ka yalodukadukali, ki na koro ni valavala vakaukauwa!

² Sa sega ni vakarorogo ki na domona; sa bese ni vakavulici. Sa sega ni vakararavi vei Jiova; sa sega ni toro vua na nona Kalou.

³ Era sa laione dautagi ko ira na nona turaga; ko ira na nona turaganilewa era sa wolifa ni yakavi; ni ra quru sui, era sega ni sigavaka.

⁴ O ira na nona parofita era sa sega ni vinaka, era sa tamata dauveivakaisini; ko ira na nona bete era sa vakacataka na ka e tabu, era sa kauta vakatani na vunau.

⁵ Sa tiko kina ko Jiova na yalododonu; sa sega ni cakava na ka e sega ni dodonu ko koya. E na mataka kecega sa vakarairaitaka na nona lewa dodonu, sa sega ni wele mai ko koya; ia sa sega ni kila na madua ko koya sa sega ni dodonu.

⁶ “Au sa muduka laivi na veimatanitu; sa vakacacani na nodra veivale ni valu; au a vakalalataka na sala ni nodra koro me sega e dua e lakova; sa rusa na nodra veikoro, sa sega ga na lewena, sa sega e tiko kina.

⁷ Au a kaya, ‘Ko na rerevaki au ga, ko na vakavulici; me kakua kina ni muduki tani na nodra i tikotiko, me vaka na ka kece ka'u a lesia me yaco vua.’ E na mataka ga era souta, era sa cakava kecega na nodra cakacaka me ca.

Na Cudruvi kei na Vakabulai ni Veimatanitu

⁸ “Ia mo dou waraki au ga,” sa kaya ko Jiova, “me yaco mada na siga ka'u na tucake kina me ia na veitotogitaki. Ni sa noqu lewa me'u vakasoqoni ira na lewe ni veivanua, me'u soqoni ira vata na lewe ni veimatanitu, me'u sovaraka vei ira na noqu cudru, me oti kece na noqu cudru katakata; ni na vakayavuni ko vuravura taucoko e na bukawaqa ni noqu vuvu.

⁹ “Ni'u na qai vukica na nodra vosa na veimataqali me vosa savasava, me ra masu kecega ki na yaca i Jiova, ka me ra qaravi koya e na lomavata.

¹⁰ Mai na tai kadua ni veiuciwai ni Eciopea, o ira era masuti au era na kauta mai na noqu i madrali, io ko koya na goneyalewa ni noqu veiseyaki.

¹¹ “E na siga ko ya ko na sega ni madua e na vuku ni nomu i valavala kecega, ko a talaidredre kina vei au; ni'u na qai kauti ira tani mai vei iko na kai nomu era yalo daumarau vakaqaciqacia; ia ko na sega ni viavialevu tale e na noqu ulunivanua tabu.

¹² Au na vakavoca ga vei iko e dua na matatamata yalomalumalumu ka dravudravua. Era na vakararavi ki na yaca i Jiova—

¹³ ko ira na vo-ni-bula ni Isireli; era na sega ni cakava nai valavala e sega ni dodonu ka sega ni cavuta na vosa lasu, ena sega talega ni kune e na gusudra na yame dauveivakaisini. Era na qai kana ka koto sobu, ka na sega ni dua me na vakarerei ira.”

A Sere ni Reki

¹⁴ Mo sere mada, na goneyalewa ni Saioni; dou kaikaila, na Isireli! Mo reki ka marau e na vu ni yalomu, ko iko na goneyalewa ni Jerusalemi!

¹⁵ Sa kauta tani ko Jiova na nomu cudruvi, ka sa biuti ira tani na nomu meca. Ko koya na tui Isireli, io ko Jiova, sa tiko e na kemudou maliwa; ko na sega tale ni kunea na ka rarawa.

¹⁶ E na siga ko ya ena kainaki ki Jerusalemi: “Mo kakua ni rere, ko iko Saioni; me kakua ni wadamele na ligamu.

¹⁷ Ko Jiova na nomu Kalou sa tiko kei iko, sa kaukauwa ko koya ka na ia na veivakabulai; ena rekitaki iko ko koya e na marau, ena vakacegui iko e na nona loloma; ena marautaki iko e na sere.

¹⁸ Au na vakasoqoni ira mai ko ira na kai nomu era tagi e na vuku ni soqosoqo tabu, ko ira sa bitaki e na veivakalialiai e na vuku i Saioni.

¹⁹ Raica, au na vakayaco-ka vei ira kecega era vakararawataki iko e na gauna ko ya. Ia ka'u na vakabulai koya sa lokiloki, o ira talega sa vakasevi ka'u na soqoni ira mai; ia ka'u na cakava me ra vakacaucautaki ka rogo e na veivanua kece era a vakamaduataki kina.

²⁰ E na gauna ko ya au na kauti kemudou mai, io, e na gauna ko ya au na vakasoqoni kemudou kina; ni'u na cakava mo dou rogo ka vakacaucautaki vei ira na veimataqali kecega e vuravura, ni'u na vakalesuya na nomudou kalougata e na ruku ni matamudou,” sa kaya ko Jiova.