Sakaraia 7 - Ai Vola Tabu (Vakadewa Makawa Vakavoutaki 2021)

Sa Vunauca ko Sakaraia na Lolo Veivakaisini

¹ Ia e nai kava ni yabaki i Taraiasi na tui, sa yaco na vosa i Jiova vei Sakaraia e nai kava ni siga e nai kaciwa ni vula, ko ya ko Kisiliu.

² Ia ko ira na lewenivanua mai Peceli era sa talai rau ko Saresa kei Rekemi-meleki, kei na nodrau tamata, me ra vakamamasu vei Jiova,

³ ka vosa talega vei ira na bete era tiko e na vale i Jiova-ni-lewevuqa, kei ira na parofita, ka kaya, “Me keitou ia tiko li na tagi e nai kalima ni vula, ka tawasei keitou, me vaka na ka keitou sa dui cakava e na veiyabaki e vuqa oqo?”

⁴ Sa qai yaco vei au na vosa i Jiova-ni-lewevuqa, ka vaka:

⁵ “Mo kaya vei ira kece na lewe-ni-vanua, kei ira na bete, ka vaka, ‘Ni dou a lolo ka tagi e nai kalima ni vula kei na kenai kavitu, e na yabaki e vitusagavulu ko ya, dou sa lolo li vei au, io vei au?

⁶ Ia ni dou sa kana, ka ni dou sa gunu talega, dou sa sega li ni kana ka gunu me yaga walega vei kemudou?

⁷ Sa sega li ni kena vosa oqo ka vunautaka ko Jiova e na gusudra na parofita eliu, ni sa tawa tiko ka sa sautu ko Jerusalemi, kei na kena veikoro e vakavolivolita, ka ni sa tawa tiko na yasayasa vakaceva kei na buca?’ ”

Na Talaidredre ki nai Vakaro ni Kalou sa Cudruvi

⁸ A sa yaco na vosa i Jiova vei Sakaraia, ka vaka,

⁹ “Sa kaya vakaoqo ko Jiova-ni-lewevuqa: Dou ia ga na veilewai dodonu, ka mo dou dui ia nai valavala vakayalovinaka ka loloma vua na kai nona;

¹⁰ ia dou kakua ni vakasaurarataka na yada, kei na luveniyali, kei na kai tani, kei na dravudravua; ia mo dou kakua ni dui nanuma ca e na lomamudou vua na kai nona.”

¹¹ Ia era sa bese ga ni vakarorogo, ka ra vuki vakanadaku, ka ra sogota na daligadra, me ra kakua ni rogoca.

¹² Era sa vakaukauwataka na lomadra me vaka na vatu qiwa, me ra kakua ni rogoca na vunau, se na vosa sa solia ko Jiova-ni-lewevuqa e na nona Yalo Tabu vei ira na parofita eliu me ra tukuna. A sa yaco kina na cudru levu mai vei Jiova-ni-lewevuqa.

¹³ “A sa yaco, me vaka ni'u a kaci, ka ra sa bese ni rogoca; sa ra kaci vaka talega kina ko ira, ia ka'u sa bese ga ni rogoca,” sa kaya ko Jiova-ni-lewevuqa,

¹⁴ “ka'u a caginataki ira tani yani ki na veimatanitu kece era a sega ni kila. Ia sa lala laivi tu na vanua, me sega ni lakovi, ni ra sa vakavuna na kena lala tu na vanua sa dauvinakati.”