Sakaraia 5 - Ai Vola Tabu (Vakadewa Makawa Vakavoutaki 2021)

Ai Kaono ni Raivotu: Nai Vola Vivigi e Vuka

¹ Au a qai ta cake tale, ka raica, sa dua nai vola vivigi sa vuka tiko.

² A sa kaya vei au ko koya, “A cava ko sa raica?” Au a kaya, “Au sa raica e dua nai vola vivigi ka vuka tiko; a kena balavu sa ruasagavulu na kiupiti, kei na kena raraba e tini na kiupiti.”

³ Sa qai kaya vei au ko koya, “Oqo na vosa ni dauveivakarusai sa lako yani e dela ni vanua taucoko; io, ko ira kece era butako era na muduki laivi vakakina me vaka e na tabana oqo; kei ira kece era bubului vakailasu era na muduki laivi vakakina me vaka e na tabana ko ya.

⁴ Au na vakayacora yani, sa kaya ko Jiova-ni-lewevuqa, ka na curuma na vale ni daubutako, kei na nona vale sa bubului vakailasu e na yacaqu; ena tiko talega e nona loma ni vale, ka vakayavuna vata kei na kena kau kei na kena veivatu.”

Ai Kavitu ni Raivotu: Na Yalewa e na Loma ni Basikete (Efa)

⁵ Sa qai lako mai na agilosi keirau sa veivosaki kaya, ka vaka vei au, “Mo ta cake mada, ka raica se cava sa qai lako mai.”

⁶ Au a kaya, “A cava mada oqo?” A sa kaya ko koya, “Oqo na basikete [efa] sa lako tu mai.” Ka sa kaya talega, “Sa vakaoqo na nodra i valavala ca e na vanua taucoko.”

⁷ Ka raica, sa dua na uma bibi, ka sa dua na yalewa sa tiko e na loma ni basikete!

⁸ A sa kaya ko koya, “Oqo ko Vu-ni-ca.” Ka sa qai biuta lesu ki na loma ni basikete, ka sa tauca na uma bibi ki na gusu ni basikete.

⁹ Au a qai ta cake, ka vakararai, ka raica, sa le rua na yalewa erau sa lako mai. Ia na cagi sa tiko e na tabadrau. Erau sa vakatabana vakabelo, ka rau sa laveta cake na basikete e na kedrau maliwa ko vuravura kei lomalagi.

¹⁰ Au a qai vaka vua na agilosi keirau sa veivosaki kaya, “Erau sa kauta kivei na basikete?”

¹¹ A sa kaya vei au ko koya, “Me la'ki tara na kena vale e na vanua ko Saina. Ni sa vakarautaki oti, e na qai vakatikori mai kea e na kenai tutu.”