Sakaraia 14 - Ai Vola Tabu (Vakadewa Makawa Vakavoutaki 2021)

Na Veivaluvaluti kei na Rawati ni Qaqa e Muri

¹ Raica, sa lako mai na siga i Jiova, ena qai votai kina na kemui toki-ni-valu e na kemu maliwa.

² Ni'u na vakasoqona kece na veimatanitu ki Jerusalemi, me ra kaba; ena rawa talega na koro, ka na vakayanaki na veivale, ia na yalewa era na vakacacani; ena vakabobulataki talega e dua na kena wase ni koro, ia na kena vo ni tamata era na sega ni muduki tani mai na koro.

³ Ena qai lako yani ko Jiova, me veivala kei na veimatanitu ko ya, me vaka sa vala kina ko koya e na siga ni valu.

⁴ Ia e na siga ko ya ena tu na yavana e dela ni ulunivanua ni veiolive, ko ya sa donui Jerusalemi mai na tokalau, ia ena kavida rua e loma na ulunivanua ni veiolive vaka ki na tokalau, vaka ki na ra talega, me dua kina na buca levu sara; ni na sudra yani e dua na tiki ni ulunivanua vaka ki na vualiku, ka dua na tikina vaka ki na ceva.

⁵ Ia dou na dro ki na buca e na noqu ulunivanua ko ya, ni na yaco sara ki Esali na buca ni ulunivanua, io, dou na dro, me vaka dou a dro tani kina ni sa tavuki na vanua e na gauna i Usaia na tui Juta. Ena qai lako mai ko Jiova na noqu Kalou, io, koi kemuni kei ira kece na nomuni yalosavasava.

⁶ Ia ena yaco e na siga ko ya, ena sega kina na rarama e talei, na butobuto loaloa ga.

⁷ Ena qai yaco e dua na siga, (sa kilai ga vei Jiova), ena sega ni siga ena sega talega ni bogi; ia ena yaco, ni sa yakavi, ena qai rarama mai.

⁸ Ia e na siga ko ya, ena dave yani na wai bula mai Jerusalemi, e dua na kena wase ki na wasawasa ki na tokalau, ka dua na kena wase ki na wasawasa ki na ra; e na vula i katakata kei na vula i liliwa ena vaka tu kina.

⁹ Ia ena kilai ko Jiova ni sa tui ni vuravura kecega. E na siga ko ya, e na sai Jiova duaduaga, kei na yacana duaduaga.

¹⁰ Ena vuki na vanua kecega me tautauvata kei na buca mai Kipa ka yacovi Rimoni e na yasayasa ki na ceva mai Jerusalemi. Ia ena cecere ka tawa e na kenai tikotiko, mai na Matamata-ni-koro i Penijamini ka yaco ki na matamata-ni-koro makawa, ka yacova sara na Matamata-ni-koro e Tutuna; mai na Vale-cecere talega i Ananeli ka yaco ki na nona i keli-waini na tui.

¹¹ A ra na tiko ga kina, ka na sega ni ia tale na veivakarusai, ena tiko vakacegu ga ko Jerusalemi.

¹² Ia na mate levu oqo ena vakayacora ko Jiova ki na veimataqali kece era valuti Jerusalemi; ena vuca ga yani na lewedra ni ra wavu tu e na yavadra, a matadra talega ena vuca laivi e na dreke-ni-matadra, a yamedra talega ena vuca sara e na gusudra.

¹³ Ia e na siga ko ya, ena vakidroataki ira vakalevu ko Jiova; ka ra na dui taura yadua na liga ni kai nona, ena dui dulaka talega na liga ni tamata ki na liga ni kai nona.

¹⁴ Ia ko ira talega na Juta era na vala mai Jerusalemi. Ena kumuni vata talega na nodra i yau na veimatanitu kecega e tiko vakavolivolita—na koula, kei na siliva, kei nai sulu, na ka levu sara.

¹⁵ Ia na kedra mate levu na ose, kei na meule, na kameli, kei na asa, kei na manumanu kece era tiko e nai valu oqo, ena vaka na mate levu ko ya.

¹⁶ Ia ko ira kece yadua sa vo vei ira na veimatanitu kecega sa mai kabai Jerusalemi, era na lako cake e na veiyabaki me ra mai soro vua na Tui, ko Jiova-ni-lewevuqa, me ra mai cakava talega na solevu ni vale vakacevaceva.

¹⁷ Ia ko ira yadua vei ira na veimatanitu e vuravura sa na sega ni lako cake ki Jerusalemi me soro vua na Tui, ko Jiova-ni-lewevuqa, ena sega ni tau vei ira na uca.

¹⁸ Ia ke sa sega ni lako cake na matanitu ko Ijipita, se sa yaco kina, ena sega talega ni tau vei ira na uca; ena tauvi ira na mate levu, ena yavita kina ko Jiova na lewe ni veimatanitu era sa sega ni lako cake me ra ia na solevu ni vale vakacevaceva.

¹⁹ Ena vakaoqo na nona cudruvi ko Ijipita, kei na nodra cudruvi na lewe ni veimatanitu kecega era sa sega ni lako cake me ra cakava na solevu ni vale vakacevaceva.

²⁰ E na siga ko ya ena ceuti ki na qiriqiri kaukamea ni ose, “Sa tabu me nei Jiova.” Kei na kuro e na vale i Jiova ena vaka na bilo e na mata ni cabocabo-ni-soro;

²¹ kei na kuro kece e Jerusalemi kei Juta ena tabu me nei Jiova-ni-lewevuqa. Ia ko ira kece era vakacaboisoro era na lako mai, ka kauta eso me ia kina na vakasasaqa. Ena sega tale ni tiko e dua na dauveivoli [kai Kenani] e na vale i Jiova-ni-lewevuqa e na siga ko ya.