Sakaraia 13 - Ai Vola Tabu (Vakadewa Makawa Vakavoutaki 2021)

¹ “E na siga ko ya ena vure cake e dua na mata-ni-wai dauvure ki na vale i Tevita kei ira na kai Jerusalemi, me vuivui ni valavala ca kei na tawa savasava.

Na Muduki ni Qaravi Kalou Matakau

² “Ena yaco talega e na siga ko ya, sa kaya ko Jiova-ni-lewevuqa, ka'u na bokoca laivi na yacadra na matakau mai vuravura, me kakua ni nanumi tale. Ia ka'u na vakayali ira na parofita talega e na vanua kei koya na yalo velavela.

³ Ia ena yaco, kevaka ena parofisai tale e dua, ena qai kaya vua ko tamana kei tinana koi rau na nona qase, ‘Ko na mate ga, ni ko sa cavuta na ka lasu e na yaca i Jiova.’ Ka rau na qai cokabasikataki koya ko tamana kei tinana, ni sa ia na parofisai ko koya.

⁴ “Ia ena yaco e na siga ko ya, era na dui madua na parofita yadua e na vuku ni nona raivotu, ni sa ia na nona parofisai. Era na sega ni vakaisulu e nai sulu vutivutia me ia kina na veivakacalai,

⁵ ia era na dui kaya ga, ‘Au sa sega ni parofita koi au, na dauteivaka ga na qele koi au, ni'u a vakabobulataki ni'u se gone.’

⁶ Ka kevaka e dua e taroga, ‘A we ni mavoa cava oqori e tu e ligamu?’ Ena qai kaya ko koya, ‘Oqo na we ni noqu vakamavoataki mai na nodra vale na noqu i tokani.’

Sa Moku nai Vakatawa, Era Veidroyaki na Sipi

⁷ “Mo yadra mai, nai seleiwau, me lauti koya na noqu i vakatawa, io, me lauti koya na tamata keirau sa duavata kaya,” sa kaya ko Jiova-ni-lewevuqa. “Me yavita nai vakatawa, ka ra na dui vakasevi na sipi; ia ka'u na tarai ira na lalai e na ligaqu.

⁸ Ia e na vanua taucoko, sa kaya ko Jiova, ena muduki tani e rua na kena wase me ra mate; ia na kenai katolu ni kena wase ena vo tu kina.

⁹ Ia ka'u na vakauta nai katolu ni wase e loma ni bukawaqa, ka vakasavasavataki ira me vaka sa vakasavasavataki na siliva, ka vakatovolei ira me vaka sa vakatovolei na koula. Era na masuta na yacaqu ko ira, ia koi au talega ka'u na rogoci ira; au na kaya, ‘Era sa noqu tamata ko ira’; ia ko ira talega era na kaya, ‘Sa neimami Kalou ko Jiova.’ ”