Sakaraia 1 - Ai Vola Tabu (Vakadewa Makawa Vakavoutaki 2021)

Sa Vakarota na Veivutuni ko Sakaraia

¹ E nai kawalu ni vula, e nai karua ni yabaki i Taraiasi, sa yaco na vosa i Jiova vei Sakaraia, na luve i Parakaia, na luve i Ito, na parofita, ka vaka:

² “Sa cudru vakalevu ko Jiova vei ira na nomudou qase.

³ O koya oqo mo kaya kina vei ira, Sa kaya vakaoqo ko Jiova-ni-lewevuqa: Dou lesu mai vei au, sa kaya ko Jiova-ni-lewevuqa, au na qai lesu vei kemudou, sa kaya ko Jiova-ni-lewevuqa.

⁴ Dou kakua ni vakataki ira na nomudou qase, ka kaci kina ko ira na parofita eliu, ka vaka, ‘Sa kaya vakaoqo ko Jiova-ni-lewevuqa, Dou vuki tani mai na nomudou i tovo ca, kei na nomudou i valavala ca.’ Ia era a sega ga ni rogoca, se vakarorogo vei au, sa kaya ko Jiova.

⁵ A nomudou qase, era tiko evei? Kei ira na parofita, era sa bula li ka tawa mudu?

⁶ Ia na noqu vosa kei na noqu i lesilesi, ka'u a vunautaka vei ira na noqu tamata na parofita, sa sega ni vauci ira li na nomudou qase? Io, era a lesu mai, ka kaya, ‘Me vaka na ka sa nanuma ko Jiova-ni-lewevuqa me cakava vei keimami, me vaka na neimami tovo, kei na neimami valavala, sa caka vakakina vei keimami.’ ”

Ai Matai ni Raivotu: Na Tamata Dauvodo Ose

⁷ E nai karuasagavulu ka va ni siga e nai katinikadua ni vula, na vula ko Sipati, e nai karua ni yabaki i Taraiasi, sa yaco na vosa i Jiova vei Sakaraia, na luve i Parakaia, na luve i Ito, na parofita, ka vaka,

⁸ “Au a vakaraica e na bogi, ka raica, sa dua na tamata sa vodoka e dua na ose damudamu! A sa tu ko koya e na loma ni veimateli e na buca, ia mai dakuna sa tu eso na ose damudamu, ka veivolavolai, ka vulavula.

⁹ Au a qai kaya, ‘A cava na ka oqo, noqu turaga?’ A sa kaya vei au na agilosi keirau sa veivosaki kaya, ka vaka, ‘Oi au ka'u na vakaraitaka vei iko se sa cava na ka oqori.’

¹⁰ A sa kaya na tamata sa tu e na loma ni veimateli, ‘Ko iratou oqo sa tala ko Jiova me veilakoyaki voli e vuravura.’

¹¹ A ratou sa qai kaya vua na agilosi i Jiova ka tu e loma ni veimateli, ka vaka, ‘Keitou a veilakoyaki voli e vuravura, ka raica, sa tiko ga ko vuravura kece, ka sa sautu.’

¹² Sa qai kaya na agilosi i Jiova, ka vaka, ‘Kemuni Jiova-ni-lewevuqa, a cava na kena dede ko ni na sega kina ni yalololoma kina ki Jerusalemi, kei na veikoro vaka-Juta, ko ni sa cudruva tiko ka yabaki vitusagavulu?’

¹³ A sa vosa ko Jiova vua na agilosi keirau sa veivosaki kaya e na vosa vinaka, io, e na vosa ni veivakacegui.

¹⁴ A sa kaya vei au na agilosi keirau sa veivosaki kaya, ‘Mo kaci mada, ka vaka, Sa kaya vakaoqo ko Jiova-ni-lewevuqa: Au sa vuvu vakalevu sara e na vuku i Jerusalemi kei Saioni.

¹⁵ Ia ka'u sa rarawa dina vei ira na veimatanitu era tiko vakacegu wale; ni'u a rarawa vakalailai ga koi au, ia ko ira era sa vakabibitaka na ca.

¹⁶ O koya oqo, sa kaya kina ko Jiova, au sa lesu mai ki Jerusalemi e na yalololoma; a noqu vale ena tara kina, sa kaya ko Jiova-ni-lewevuqa, ia na wa i vakarau ena dre ga yani e Jerusalemi.

¹⁷ Mo kaci tale, ka vaka, Sa kaya vakaoqo ko Jiova-ni-lewevuqa: Ena tete yani na noqu veikoro e na vuku ni kedra vinaka; ia ena vakacegui Saioni tale ko Jiova, ka digitaki Jerusalemi tale.’ ”

Ai Karua ni Raivotu: Nai Leu kei na Matai e Va

¹⁸ Au a qai ta cake, ka vakaraica, ka raica, sa va nai leu.

¹⁹ Au a qai vaka vua na agilosi keirau sa veivosaki tiko kaya, “A cava oqori?” A sa kaya vei au ko koya, “Oqo nai leu sa dui vakasevi kina ko ira na Juta, kei ira na Isireli, kei ira na kai Jerusalemi.”

²⁰ A sa vakaraitaka vei au ko Jiova e le va na matai.

²¹ Au a qai kaya, “A cava era sa mai cakava ko iratou oqo?” A sa kaya ko koya, “Oqo nai leu sa dui vakasevi ira na Juta, ka sa sega kina e dua na tamata me ta cake rawa; ia ko iratou oqo sa lako mai me ratou vakasavi tani, me viritaka sobu na nodratou i leu na veimatanitu, eratou sa laveta cake na nodratou i leu ki na vanua ko Juta me ratou vakasava.”