Niemaia 9 - Ai Vola Tabu (Vakadewa Makawa Vakavoutaki 2021)

Era Vakatutusa ka Veivutuni na Kawa i Isireli

¹ Ia e nai karuasagavulu ka va ni siga ni vula oqo, era sa soqoni vata ko ira na Isireli, a ra sa lolo, ka vakaisulu taga, ka sa kaburaki vei ira na qele.

² A ra sa wasei ira mai vei ira na kai tani kecega ko ira na kawa i Isireli, a ra sa tu ka vakatusa na nodra i valavala ca, kei na caka cala ni nodra qase.

³ Ka ra sa tucake e na nodra tikina, ka wilika nai vola ni vunau i Jiova na nodra Kalou, e nai kava ni wase ni dua na siga; e na dua tale nai kava ni wase, era sa vakatusa na nodra ca, ka lotu vei Jiova na nodra Kalou.

⁴ Sa qai tucake e nai cabecabe, eso vei ira na Livai, ko Jesua, kei Pani, ko Katimieli, ko Sipanaia, ko Puni, ko Serepaia, ko Pani, ko Kinani, ka tagi vakadomoilevu vei Jiova na nodra Kalou.

⁵ Sa qai kaya ko ira na Livai, ko Jesua, kei Katimieli, ko Pani, ko Esapinaia, ko Serepaia, ko Otaia, ko Sipanaia, ko Pecaaia, “Ni tucake ka vakavinavinaka vei Jiova na nomuni Kalou ka tawa mudu. Ia me vakavinavinakataki na yacamuni vakaiukuuku, sa uasivi cake mai na vosa kecega ni veivakarokorokotaki kei na vakavinavinaka.”

⁶ A sa kaya ko Esera, “Sai kemuni ko Jiova, sai kemuni duaduaga; ko ni a bulia na lomalagi, na lomalagi kece kei na kedrai vavakoso kecega, na vuravura, kei na ka kecega sa tu kina, na wasawasa, kei na ka kecega sa tu kina, ko ni sa maroroya kece talega; a ra sa vakarokoroko vei kemuni nai vavakoso ni lomalagi.

⁷ Sai kemuni ko Jiova na Kalou, ko ni a digitaki Eparama, ka kauti koya tani mai Uri mai Kalitia, ka vakayacani koya ko Eparaama.

⁸ Ko ni sa kunea na lomana ni sa dina vei kemuni, ka ia vata kaya na veiyalayalati, me solia na nodra vanua na kai Kenani, kei na Itaiti, kei na Amoraiti, kei na Perisaiti, kei ira na Jepusaiti kei ira na Kakesaiti, io me solia ki na nona kawa. Ia ko ni sa vakayacora na nomuni vosa, ni kemuni sa yalododonu.

⁹ “Ko ni a kunea talega na nodra rarawa na neimami qase mai Ijipita, ka rogoca na nodra tagi mai na Wasa Damudamu;

¹⁰ ka vakatakila nai vakatakilakila kei na cakacaka mana vei Fero, kei ira kecega na nona tamata, kei ira kecega na nona lewe-ni-vanua, ni kemuni sa kila ni ra ia nai valavala vakaviaviaturaga vei ira. Ko ni a vakarogoya kina na yacamuni, me vaka e na siga oqo.

¹¹ Ia kemuni a wasea na wasawasa e matadra, a ra sa lako kina e loma ni wasawasa e na qele mamaca; ia ko ira era vakasavi ira, ko ni a luvuci ira e loma ni wasa titobu, me vaka na vatu ki na wai levu.

¹² Ko ni a tuberi ira talega e na siga e na duru o; e na bogi talega e na duru bukawaqa, me vakararamataki ira e na sala me ra lako kina.

¹³ Ko ni a lako sobu talega ki na dela ni Ulunivanua ko Saineai, ka vosa mai lomalagi vei ira, ka solia vei ira na lewa dodonu, kei na vunau dina, na ka e lesi me caka, kei nai vakaro vinaka,

¹⁴ ka vakatakila vei ira na nomuni siga tabu ni vakacecegu, a sa vakarota vei ira nai vakaro, kei nai lesilesi, kei na vunau, e na gusu i Mosese na nomuni tamata.

¹⁵ Ko ni a solia vei ira na madrai mai lomalagi ni ra viakana, ka vakadavea na medra wai mai na vatu ni ra sa viagunu, ka yalataka vei ira me ra la'ki taukena na vanua ko ni a bubului kina mo ni solia vei ira.

¹⁶ “Ia era sai valavala vakaviavialevu ga, ko ira kei ira na neimami qase, ka ra sa domoqa, ka sega ni vakarorogo ki na nomuni vakaro;

¹⁷ era sa bese ni talairawarawa, ka sega ni nanuma na nomuni cakacaka mana ko ni a kitaka e na kedra maliwa; ia era sa vakadomoqataki ira ga, ka lesia e na nodra talaidredre e dua na turaga ka me ra lesu kina me ra bobula tale mai Ijipita. Ia koi kemuni na Kalou sa dau tu vakarau mo ni veivosoti, sa dauloloma ka yalovinaka, sa dauberabera ni cudru ka levu na nomuni yalololoma, ka sega ni biuti ira laivi.

¹⁸ Io, ka dina ga ni ra sa cakava oti e dua na luve ni bulumakau e buli e na koula sa vakawaicalataki, ka kaya, ‘Oqo na nomuni Kalou ka kauti kemuni cake mai Ijipita,’ ka ra sa cakava oti na ka e veivakacudrui sara,

¹⁹ ia kemuni a sega ga ni biuti ira laivi e na vanua lala e na vuku ni nomuni yalololoma levu; na duru o sa tu ga vei ira e na siga me kauti ira e na sala, kei na duru bukawaqa e na bogi me vakararamataki ira kei na sala me ra lako kina.

²⁰ Kemuni a solia talega vei ira na nomuni yalo vinaka me vakatavulici ira, ka sega ni bureitaka na nomuni mana ki na gusudra, ka solia na medra wai ni ra sa viagunu.

²¹ Io, e vasagavulu na yabaki ko ni a vakani ira e na vanua lala, era sa sega kina ni dravudravua e na dua na ka; a sa sega ni madra mai na nodra i sulu, a sa sega ni vuvuce na yavadra.

²² “Kemuni sa solia talega vei ira na matanitu eso kei na vanua eso, ka sa solia vei ira me vaka na nodra i votavota. Era sa taukena kina na vanua ko Saioni, kei na nona vanua na tui Esiponi, kei na vanua nei Oki na tui Pasani.

²³ A luvedra talega ko ni a vakalewevuqataka me ra tautauvata kei na kalokalo kei lomalagi, ka kauti ira ki na vanua, ko ni a yalataka vei ira na nodra qase, me ra curu kina ka taukena.

²⁴ A ra sa curu kina na luvedra ka ra taukena na vanua, ia ko ni a vakamalumalumutaka e matadra na lewe-ni-vanua, na kai Kenani, ka soli ira ki na ligadra, kei ira na nodra tui, kei ira na lewe-ni-vanua, me ra vakaveitaliataki ira.

²⁵ A ra sa kaba na veikoro vakabai, ka ra taukena na vanua qele bula, kei na veivale sa oso e nai yau kecega, nai keli-wai, na veiloga-ni-vaini, kei na veiolive, ka vuqa na kau dauvua. A ra sa kana, ka sa mamau, ka sa levulevu mai, ka marautaki ira e na nomuni loloma levu.

²⁶ “Ia era sa talaidredre, ka vuki tani, ka biuta ki dakudra na nomuni vunau, ka vakamatei ira na nomuni parofita era vunauci ira me vakalesui ira kivei kemuni, a ra sa kitaka na ka e veivakacudrui vakalevu.

²⁷ O koya ko ni a soli ira kina ki na ligadra na nodra meca, a ra sa vakararawataki ira. Ia e na gauna ni nodra rarawa, ni ra sa tagi vei kemuni, ko ni a rogoca mai lomalagi, ka sa solia vei ira nai vakabula eso, ko ira era sa vakabulai ira mai na nodra meca, me vaka na nomuni yalololoma levu.

²⁸ Ia ni ra sa vakacegu oti, era sa caka ca tale e matamuni, o koya ko ni a laivi ira kina ki na liga ni nodra meca, a ra sa vakaveitaliataki ira. Ia ni ra sa saumaki mai, ka tagi vei kemuni, ko ni a rogoca mai lomalagi; ia ko ni a vakabulai ira vakavuqa, me vaka na nomuni yalololoma.

²⁹ Ko ni a vunauci ira mo ni vakalesui ira tale mai kina ki na nomuni vunau. A ra sai valavala vakaviavialevu ga, ka sega ni vakarorogo ki na nomuni vunau ka ra caka cala ga ki na nomuni lewa, (o koya ena bula kina na tamata kevaka sa cakava;) ka vakasuka na tabadra, ka vakadomoqataki ira, ka sega ni vakarorogo.

³⁰ Ia sa vuqa na yabaki ko ni a vosoti ira kina, ka vunauci ira e na Yalomuni e na gusudra na nomuni parofita. Ia era sa bese ga ni rogoca. O koya ko ni a soli ira kina ki na ligadra na lewe ni veivanua.

³¹ Ia e na vuku ni nomuni loloma levu, ko ni a sega ni vakarusai ira sara, se biuti ira, ni kemuni sa Kalou yalovinaka ka dauloloma.

³² “Ia oqo, koi kemuni na neimami Kalou—na Kalou levu, ka kaukauwa, ka rerevaki, ka daudinata na veiyalayalati ka dauyalololoma—me kakua ni ka lailai e matamuni na rarawa kecega sa yacovi keimami, kei ira na neimami tui, kei ira na neimami turaga, kei ira na neimami bete, kei ira na neimami parofita, kei ira na neimami qase, kei ira kecega na nomuni tamata, mai na nodra gauna na tui Asiria ka yacova na siga oqo.

³³ Ia koi kemuni sa dodonu e na ka kecega sa yacovi keimami; ko ni sa caka dodonu, ia keimami sa caka ca ga;

³⁴ ka sega ni vakabauta na nomuni vunau ko ira na neimami tui, kei ira na neimami turaga, kei ira na neimami bete, kei ira na neimami qase, se vakarorogo ki na nomuni vakaro kei na nomuni lesilesi ko ni a solia vei ira.

³⁵ Ni ra sa sega ni qaravi kemuni e na nodra matanitu, kei na nomuni loloma levu ko ni a solia vei ira, kei na vanua levu ka bula ko ni a solia e matadra; era sa sega talega ni lesu mai na nodra i valavala ca.

³⁶ Ni raica, keimami sa bobula e na siga oqo; ena vanua ko ni a solia vei ira na neimami qase me ra marautaka na kena vuata kei na kena vinaka, raica, keimami sa bobula kina.

³⁷ Ka sa vagolei na vutu ni veika sa tamusuki vei ira na tui ko ni sa lesia me lewai keimami, e na vuku ni neimami valavala ca. Era sa lewa na yago i keimami kei na neimami manumanu, me vaka sa lomadra kina, ka keimami sa vakaloloma vakalevu sara.”

Ko Ira era Sainitaka na Veiyalayalati

³⁸ Ia e na vuku ni ka kecega oqo, keimami sa ia na veiyalayalati dina, ka sa vola; a ra sa dregata ko ira na neimami turaga, kei ira na neimami Livai, kei ira na neimami bete.