Maika 5 - Ai Vola Tabu (Vakadewa Makawa Vakavoutaki 2021)

¹ Dou soqoni vakamataivalu mada, ko iko na goneyalewa vakamataivalu! Sa buku na druadrua ni noda koro! Era sa yavita kina na baluna na turaganilewa ni Isireli e nai titoko.

O Koya ena Lewai Ira na Isireli sa Sucu mai Peceliema

² Ia ko iko, Peceliema Efiraca, ko sa lailai dina vei ira na lewe udolu e Juta, ia mai vei iko ena lako mai vei au ko koya ena lewai ira na Isireli; na nona lako mai sa ka mai liu sara, mai na gauna makawa dina.

³ Ia ena soli ira yani ko koya, me yaco mada na gauna me vakasucu kina ko koya sa taratara; ia ko ira na kena vo ni tacina ena qai lesu kivei ira na Isireli.

⁴ Ia ena tu ko koya, ka vakani ira e na kaukauwa i Jiova, e na yaca vakaturaga i Jiova na nona Kalou; ka ra na tikotiko ga, ni na qai levu ko koya ka yaco ki nai yalayala kei vuravura;

⁵ o koya talega oqo ena vu ni sautu. Ia ni sa mai curuma na noda vanua na kai Asiria, ka butuka na noda veivale vakaturaga, eda na qai vakatura cake me veivala kaya e lewe vitu nai vakatawa, kei na lewe walu na tamata turaga.

⁶ Era na vakacacana na vanua ko Asiria e nai seleiwau, io, na vanua i Nimiroti e na kenai yalayala; ena qai vakabulai keda ko koya mai vei ira na kai Asiria, ni ra sa mai curuma na noda vanua, ni ra sa mai butuka talega na noda i yalayala.

Na Nodra i Tavi na Kena Vo vei Ira na Jekope

⁷ Ia na kena vo vei ira na Jekope, era na tiko e na kedra maliwa na veimataqali e vuqa, era na vaka na tegu mai vei Jiova, me vaka na uca ka tau ki na co, ka sa sega ni vakarorogo vua na tamata se waraki ira na luve ni tamata.

⁸ Ia na kena vo vei ira na Jekope era na tiko e na kedra maliwa na veimatanitu, e na kedra maliwa na veimataqali e vuqa, era na vaka na laione e na kedra maliwa na manumanu ni veikau, ka vaka na luve ni laione e na loma ni qele ni sipi, o koya ke sa lako yani kina, sa na butuka sobu, ka basuraka, ka sega e dua me na vakabula.

⁹ Ena dulaki na ligamu vei ira na nomu meca, ia ko ira kece era cati iko era na muduki laivi.

¹⁰ Ia ena yaco e na siga ko ya, sa kaya ko Jiova, au na muduka tani na nomu ose ka vakarusa na nomu qiqi-ni-valu;

¹¹ au na muduka laivi na veikoro e na nomu vanua, ka talaraka sobu kecega na nomu veikoro ni valu;

¹² au na vakaotia tani talega na veinocati mai na ligamu, ia ena sega tale vei iko ko ira era parofisai vakailasu;

¹³ au na muduka tani talega vei iko na nomu matakau ceuceu, kei na nomu matakau e vakaduri tu, ia ko na sega ni soro tale ki na cakacaka ni ligamu;

¹⁴ ka'u na cavuta tani talega na nomu matakau i Aseteroci ka vakarusa na nomu veikoro.

¹⁵ Ia ka'u na ia e na cudru kei na lesa na veisausaumi ki na veimatanitu sa sega ni vakarorogo.