Kolosa 1 - Ai Vola Tabu (Vakadewa Makawa Vakavoutaki 2021)

¹ Koi au ko Paula, nai apositolo i Karisito Jisu e na lewa ni Kalou, ko Timoci talega na taciqu,

² Kivei ira era sa lotu ka veiwekani dina, era sa tu vata kei Karisito, era sa tiko mai Kolosa: Me nomudou na loloma kei na vakacegu mai vua na Kalou ko Tamada.

Na Masu ni Vakavinavinaka

³ Keirau sa vakavinavinaka vua na Kalou na Tama i Jisu Karisito na noda Turaga, ka masulaki kemudou e na veisiga,

⁴ ni keirau a rogoca na nomudou vakabauti Karisito Jisu, kei na nomudou loloma vei ira kecega era sa lotu,

⁵ e na vuku ni ka dou sa vakanuinuitaka, o koya sa maroroi mai lomalagi me nomudou, ia dou a rogoca kina e na vosa dina ni tukutuku-vinaka,

⁶ sa yaco vei kemudou, me vaka talega ki vuravura taucoko; a sa vuataka na vuana, ka sa tubu tiko, me vaka talega kina vei kemudou, a sa vakatekivu vata kei na siga dou a rogoca kina, ka kila dina na loloma ni Kalou.

⁷ Me vaka dou sa kila mai vei Epafira, a neirau i tokani lomani. Ko koya oqo sai talatala yalodina i Karisito vei kemudou,

⁸ ka sa tukuna vei keirau na nomudou loloma e na Yalo Tabu.

⁹ E na vuku ni ka oqo koi keirau talega, sa vakatekivu vata kei na siga keirau a rogoca kina, keirau sa sega ni mudu kina ni masulaki kemudou, ka masu mo dou vakasinaiti e na nomudou kila na lomana, e na yalomatua kei na vuku vakayalo kecega,

¹⁰ mo dou ia kina nai valavala e kilikili kei ira sa nona na Turaga, me vinakata kecega ko koya, mo dou vakavuana tiko e na cakacaka vinaka kecega, me tubu cake talega na nomudou kila na Kalou.

¹¹ Mo dou kaukauwa mai e na kaukauwa kecega, me vaka na nona kaukauwa vakaidina, me tubu na vosota kecega kei na vosota vakadede e na marau;

¹² mo dou vakavinavinaka vua na Tamada, o koya sa vakarautaki keda me da rawata na kedrai votavota era sa yalosavasava, e na rarama.

¹³ O koya sa vakabulai keda mai na kaukauwa ni butobuto, ka sa kauti keda ki na matanitu nei koya na nona Gone ni toko,

¹⁴ ko koya eda sa rawata kina na bula e na vuku ni nona dra, ni sa vosoti na noda i valavala ca.

Nai Tutu Cecere kei na Cakacaka i Karisito

¹⁵ Sai koya na Karisito na yaloyalo ni Kalou sa sega ni rairai, ka vakatuburi eliu ka qai muri na ka kecega ka buli;

¹⁶ ni sa cakava na ka kecega ko koya, se ra tu mai lomalagi, se ra tu e vuravura, se ra rairai se ra sega ni rairai, se ra veitikotiko vakaturaga, se ra veimatanitu, se ra turaga sa liu, se ra turaga kaukauwa—sa cakava na ka kecega ko koya, ka me nona talega.

¹⁷ A sa bula eliu ko koya, ka sa muri na ka kecega, ka sa vakataudeitaka na ka kecega ko koya.

¹⁸ O koya na ulu talega ni yago, nai soqosoqo lotu; o koya nai vakatekivu, na ulumatua mai na mate, me uasivi cake kina ko koya e na ka kecega.

¹⁹ Ni sa vinakati me sinai ko koya e na ka kecega,

²⁰ ka me vakaduavatataki ira kaya na ka kecega e na vukuna, ni sa ia mada na ka ni veivinakati e na nona dra ni sa lauvako ki na kauveilatai, io, e na vukuna ga, se ra tu e vuravura se ra tu mai lomalagi.

²¹ Oi kemudou talega, dou a kai tani eliu ka meca e na vu ni yalomudou e na cakacaka ca, sa qai vakaveivinakatitaki kemudou ko koya,

²² e na yagona vakalewe ni sa mate, me vakaduavatataki kemudou kina ni dou sa yalosavasava ka sega ni beitaki rawa ka sega ni vunauci rawa e matana—

²³ kevaka dou sa vakabauta tikoga ka vakataudeitaki ka vakaukauwataki, ka sega ni vukici tani mai nai nuinui ni tukutuku-vinaka dou a rogoca, ka sa vunautaki vei ira na tamata kecega sa tiko e ruku i lomalagi. Ia koi au, ko Paula, au sa lesi me'u kenai talatala.

Na Veiqaravi nei Paula ena i Soqosoqo Lotu

²⁴ Au sa qai marau ni'u sa vakararawataki e na vukumudou, ka vakayacora e na yagoqu na kena vo ni rarawa e na vuku i Karisito, e na vuku ni yagona, ko ya nai soqosoqo lotu.

²⁵ Au sa lesi kina me'u kenai talatala, me vaka nai lesilesi ni Kalou, au sa lesi kina e na vukumudou, me'u vakayacora na vosa ni Kalou,

²⁶ na ka vuni ka vunitaki mai vei ira nai tabatamata e na gauna eliu, ia sa qai vakaraitaki mai vei ira na nona tamata yalosavasava.

²⁷ Ni sa vinakata na Kalou me vakatakila vei ira na kena vakaidina kei na kena talei ni ka vuni oqo e na kedra maliwa na veimatanitu, oqori na Karisito e na lomamudou, na lagilagi sa vakanuinuitaki.

²⁸ Ni sai koya keitou sa vunautaka, ni keitou sa vakasalataka tiko na tamata yadua, ka vakavulica na tamata yadua e na vuku kecega, me keitou vakarautaka kina na tamata yadua me ra matua sara e na vuku i Karisito.

²⁹ Oqo na ka ka'u sa daucakacaka talega kina, ka'u sa gumatua talega me vaka na nona cakacaka sa mana e na lomaqu.