Kalatia 6 - Ai Vola Tabu (Vakadewa Makawa Vakavoutaki 2021)

Ni Veivuketaka na Nomuni i Colacola

¹ Oi kemudou na veiwekani, kevaka sa vakidacalataki e dua na tamata mei valavala ca, mo dou vakavinakataki koya e na yalo malumalumu, oi kemudou sa vakayalo; ka mo vakaraici iko, de ko sa dauveretaki talega.

² Dou veivukei e na colati ni nomudou i colacola, ka mo dou vakayacora kina na vunau i Karisito.

³ Kevaka e dua sa nanumi koya me ka levu, ia sa ka walega, sa qai vakaisini koya vakai koya.

⁴ Ia me lewa deivaka na nona cakacaka na tamata yadua, ena qai rekitaki koya e na vuku i koya ga ka segai e na vukuna na tani.

⁵ Ni na colata na nona i colacola na tamata yadua.

⁶ Ia ko koya sa vakatavulici e na Vosa, me solia nai votavota ni ka kecega e vinaka vei koya sa vakatavulica.

⁷ Mo dou kakua ni vakaisini kemudou; a Kalou ena sega ni vakalialiai, na ka kecega sa kaburaka na tamata ena tamusuka talega ko koya.

⁸ Ko koya sa kaburaka na ka ni nona i tovo vakayago ena tamusuka na rusa mai nai tovo vakayago, ia ko koya sa kaburaka na ka ni Yalo Tabu, ena tamusuka na bula tawa mudu mai na Yalo Tabu.

⁹ Ia me da kakua ni ceguoca e na caka vinaka, ni da na tamusuka e na kena yabaki, kevaka eda sa sega ni oca.

¹⁰ O koya oqo, ni sa rawa, me da caka vinaka vei ira na tamata kecega, ka vakalevu vei ira era veitokani e na vakabauta.

Nai Otioti ni Vakasala kei na Loloma

¹¹ Dou raica na mata ni vola lelevu ka'u sa volavola kina vei kemudou e na ligaqu dina.

¹² O ira era sa via rairai vinaka vakayago, era sa vakasaurarataki kemudou mo dou cilivi—me ra kakua ga ni vakacacani kina e na vuku ni kauveilatai nei Karisito.

¹³ Ia ko ira era sa cilivi era sa sega ni talairawarawa ki na vunau; era gadreva ga mo dou cilivi me ra rekitaka na lewemudou.

¹⁴ Ia koi au, me kakua sara na ka tani me'u rekitaka, na kauveilatai ga ni noda Turaga ko Jisu Karisito, o koya sa lauvako kina vei au e na kauveilatai na veika vakavuravura, koi au talega ki na veika vakavuravura.

¹⁵ Ni sa sega ni yaga me cili, se me sega ni cili, sa yaga ga me tamata buli vou.

¹⁶ Ia me yaco na vakacegu kei na yalololoma kivei ira kecega era sai valavala tiko me vaka nai vakarau oqo, vei ira talega na Isireli ni Kalou.

¹⁷ Me kakua e dua me vakararawataki au e na gauna e muri; ni sa tu ga e na yagoqu na we ni noqu mavoa e na vuku i Jisu.

¹⁸ Me tiko kei na yalomudou na veiwekani na loloma ni noda Turaga ko Jisu Karisito. Emeni.