Kalatia 4 - Ai Vola Tabu (Vakadewa Makawa Vakavoutaki 2021)

Ko Ni sa Luve ni Kalou

¹ Ia ka'u sa kaya, ni sa gone tiko nai taukei e muri, sa tautauvata kei na tamata walega, ia ka sa nona ga na ka kecega;

² a sa lewai koya ko ira nai vakavuvuli kei ira na qase, me yaco mada na gauna ka lokuca eliu ko tamana.

³ Sa vakakina koi keda eliu, ni da a gone tiko, sa lewai keda na veivu-ni-ka sa vakavuravura me vaka eda bobula.

⁴ Ia ni sa yaco dina sara na kena gauna, sa qai tala yani na Luvena na Kalou, o koya sa sucu mai na yalewa, sa sucu me lewai koya na vunau,

⁵ me voli ira kina sa lewai ira na vunau, me da vakayacori kina me da luvena sa vakabau.

⁶ Ia ni dou sa qai luvena, sa tala na Kalou na Yalo ni Luvena ki na lomada, o koya sa daukaci, “Apa, Tama i keimami.”

⁷ O koya oqo ko sa qai sega kina ni tamata walega, a luvena ga; ia kevaka ko sa luvena, ko sa qai taukei e na vuku ni Kalou.

Sa Lomaleqataki Ira na kai Kalatia ko Paula

⁸ Ia eliu, ni dou a sega ni kila na Kalou, dou a dauqaravi ira sa sega ni nodra i tovo me vakalou.

⁹ Ia edaidai, ni dou sa qai kila na Kalou, se dina ga ni sa qai kilai kemudou na Kalou, dou sa qai lesu tale vakacava ki na veivu ni ka, sa malumalumu ka ka wale, ka dou sa vinakata mo dou qarava tale?

¹⁰ Dou sa vakatabuya na siga eso, kei na vula eso, kei na gauna eso, kei na yabaki eso.

¹¹ Au sa yalolailai e na vukumudou, de sega ni yaga na noqu cakacaka vei kemudou.

¹² Oi kemudou na veiwekani, au sa masuti kemudou, mo dou vakataki au, ni'u sa vakataki kemudou. Dou sa sega ni vakacacani au vakalailai.

¹³ Ia dou sa kila, ni'u a vunautaka vei kemudou eliu nai tukutuku-vinaka ni sa malumalumu na yagoqu.

¹⁴ Ia e na vuku ni ka ni yagoqu sa vakatovolei kemudou, dou sa sega ni beci au se vakasisilataka, ia dou a vakacegui au me vaka ka'u sa agilosi ni Kalou, me vakataki Karisito Jisu.

¹⁵ Sa qai tu evei na nomudou marau eliu? Ni'u sa vakadinadina vei kemudou, kevaka sa rawarawa, dou a leuta tani na matamudou, mo dou solia mai vei au.

¹⁶ Au sa qai yaco beka oqo me'u nomudou meca, ni'u sa vosa dina vei kemudou?

¹⁷ Era sa gumatua ni lomani kemudou, e segai e nai valavala vinaka, io era sa via tawasei kemudou tani, mo dou gumatua ni lomani ira.

¹⁸ Ia sa ka vinaka na gumatua tikoga e na cakacaka vinaka, me kakua ni ia walega ni'u sa tiko vata kei kemudou.

¹⁹ Na luvequ lalai, oi kemudou ka'u sa taratara tale kina, me buli mada na Karisito e na lomamudou!

²⁰ Ia ka'u sa via tiko vei kemudou edaidai ka me duatani na domoqu; ni'u sa nuinuica e na vukumudou.

Nai Vakatautauvata Baleti Eka kei Sera

²¹ Dou tukuna mai vei au, kemudou sa via vauci e na vunau, dou sa sega beka ni rogoca na vunau?

²² Ni sa volai, sa lewe rua na luve i Eparaama ka tagane, a tinana e dua na vada, a tinana kadua na marama.

²³ Ia ko koya sa luve ni vada, sa sucu vakatamata; ia ko koya sa luve ni marama, sa sucu e na vosa ni yalayala.

²⁴ Ia na ka oqo sa vakaibalebale: ni sa veiyalayalati e rua koi rau na yalewa oqo. E dua mai na Ulunivanua ko Saineai, o koya sa vakasucu gone me ra bobula, oqori ko Eka.

²⁵ Ia ko Eka oqo na Ulunivanua ko Saineai mai Arapea, a sa tautauvata kei Jerusalemi ka tu edaidai, a sa bobula tiko kei ira na luvena.

²⁶ Ia ko Jerusalemi mai cake, sa galala, o koya na tinada kecega.

²⁷ Ni sa volai, “Mo reki, ko iko sa yava, sa sega ni vakaluveni, mo tabalaka na kaci, o iko sa sega ni taratara; ni sa qai lewe vuqa na luvena ko koya ka biu ka lewe lailai vua sa vakawati.”

²⁸ Ia koi keda, na veiwekani, eda sa vakataki Aisake, ni da sa gone ni vosa ni yalayala.

²⁹ Ia na ka sa caka eliu sa caka talega edaidai, sa vakacacani koya sa sucu vakayalo ko koya sa sucu vakatamata.

³⁰ Ia ka cava sa kaya nai Vola Tabu? “Vakaseva tani na yalewa bobula kei na luvena, ni rau na sega ni taukena vata na luve ni yalewa bobula kei na luve ni yalewa galala.”

³¹ Sa vakaoqo, kemudou na veiwekani, eda sa sega ni luve ni yalewa bobula, ia eda sa luve ga ni yalewa galala.