Kalatia 1 - Ai Vola Tabu (Vakadewa Makawa Vakavoutaki 2021)

¹ Mai vei Paula nai apositolo—ka sa sega ni talai mai vei ira na tamata se vakailesilesi vakatamata, ia sai lesilesi ga i Jisu Karisito kei na Kalou ko Tamana, ko koya ka vakaturi koya cake mai na mate—

² kei ira kecega na mataveiwekani sa tiko vei au, Kivei ira na veisoqosoqo lotu mai Kalatia:

³ Me nomudou na loloma kei na vakacegu mai vua na Kalou ko Tamada kei na noda Turaga ko Jisu Karisito,

⁴ o koya ka soli koya e na vuku ni noda i valavala ca, me vakabulai keda kina mai na vuravura ca oqo, me vaka na loma ni Kalou ko Tamada,

⁵ me nona na vakarokoroko ka sega ni mudu. Emeni.

Nai Tukutuku-vinaka e Duabau

⁶ Au sa kurabui dina ni dou sa biuti koya vakatotolo ka a kacivi kemudou e na loloma i Karisito, ka vuki ki na dua tale nai tukutuku-vinaka—

⁷ ka segai ni sa tiko tale e dua, ia sa tiko ga eso ka ra sa vakararawataki kemudou ka via vakatanitaka nai tukutuku-vinaka kei Karisito.

⁸ Ia kevaka koi keitou, se dua na agilosi mai lomalagi, sa vunautaka vei kemudou e dua tale nai tukutuku-vinaka sa sega ni vaka oqori keitou a vunautaka vei kemudou, me rusa ko koya.

⁹ Me vaka na ka keitou a kaya eliu, au sa qai kaya tale vakakina, Kevaka e dua na tamata sa vunautaka vei kemudou e duatani nai tukutuku-vinaka sa sega ni vaka na ka dou sa vakabauta, me rusa ko koya.

¹⁰ Ia, ka'u sa qai vakalomavinakataki cei, na tamata, se na Kalou? Seu segata beka me ra vinakati au ko ira na tamata? Kevaka sa ka ga me ra vinakati au kina ko ira na tamata, au sa qai sega ni dauveiqaravi nei Karisito.

Na Kacivi nei Paula me i Apositolo

¹¹ Ia ka'u sa vakatakila vei kemudou, na veiwekani, ni sa sega ni ka vakatamata nai tukutuku-vinaka ka'u a vunautaka;

¹² ni'u a sega ni rawata mai vua e dua na tamata, seu vakatavulici kina, ia sa yaco vei au ni sa vakaraitaka ko Jisu Karisito.

¹³ Ni dou a rogoca na noqu i valavala eliu e na nodra lotu na Jiu ka ni'u a vakacacana vakalevu sara nai soqosoqo lotu ni Kalou, ka vaqeavutaka.

¹⁴ Ia ka'u sa uasivi cake e na lotu vaka-Jiu vei ira na kai noqu era lewe vuqa era taba vata kei au, ni'u sa gumatua vakalevu sara tiko e na nodra i tukuni na noqu qase.

¹⁵ Ia ni sa vinaka vua na Kalou, o koya sa lesi au, mai na kete i tinaqu, ka qai kacivi au e na nona loloma walega,

¹⁶ me vakatakila na Luvena ki na lomaqu, me'u vunautaki koya vei ira na veimatanitu tani; au sa qai sega ni bose kei ira na tamata,

¹⁷ seu lako cake ki Jerusalemi vei ira era sai apositolo taumada vei au, ia ka'u sa lako sara ki Arapea ka lesu tale ki Tamasiko.

¹⁸ Ia ni sa oti e tolu na yabaki, au sa qai lako cake ki Jerusalemi me keirau veikilai kei Kifa, ka keirau a tiko vata ka bogi tinikalima;

¹⁹ ia ka'u sa sega ni raica e dua tale vei ira nai apositolo, ko Jemesa ga na tacina na Turaga.

²⁰ Ia na ka ka'u sa qai vola vei kemudou, raica, e na mata ni Kalou, au sa sega ni lasu.

²¹ Au sa qai lako ki na veiyasana mai Siria kei Silisia;

²² a ra sa sega tiko ni kila na mataqu ko ira na veisoqosoqo lewe ni lotu mai Jutia era sa tu vata kei Karisito.

²³ Era sa rogoca ga, “O koya ka vakacacani keda eliu, sa qai vunautaka na vakabauta ka vaqeavutaka eliu.”

²⁴ A ra sa vakarokorokotaka na Kalou e na vukuqu.