Emosi 5 - Ai Vola Tabu (Vakadewa Makawa Vakavoutaki 2021)

A Lele me Baleta na Nodra i Valavala Ca na Isireli

¹ Dou rogoca na vosa oqo ka'u sa lagata, io na kemudou lele, na vale i Isireli:

² “Sa bale na goneyalewa ko Isireli, ena sega ni tucake tale; sa biu laivi tu e nona vanua, sa sega e dua me vakaduri koya cake tale.”

³ Ni sa kaya vakaoqo na Turaga ko Jiova: “A koro ka daulako mai kina e le dua na udolu, ena vo ga kina e le dua na drau, kei na koro e daulako mai kina e le dua na drau ena vo ga kina e le tini, ki na vale i Isireli.”

⁴ Ni sa kaya vakaoqo ko Jiova ki na vale i Isireli: “Dou golevi au, mo dou bula kina;

⁵ ia kakua ni dou golevi Peceli, kakua talega ni curu ki Kilikali, kakua talega ni lako ki Peri-sepa; ni ko Kilikali ena kau tani vakabobula, kei Peceli ena yaco me ka wale sara.”

⁶ Dou golevi Jiova, mo dou bula, de kida ko koya me vaka na bukawaqa ki na vale i Josefa, ka sa kama voli, ka sega e dua mai Peceli me bokoca.

⁷ Oi kemudou sa vakatanitaka na lewa dodonu me ka gaga, kei nai valavala dodonu dou sa biuta no ga ki na qele!

⁸ Dou golevi koya ka buli Akituro kei Oraioni, ka sa vukica na butobuto loaloa me mataka, kei na siga sa vukica ko koya me bogi butobuto; ka sa kaciva na wai ni wasawasa, ka sovaraka sobu ki na dela i vuravura, ko Jiova na yacana,

⁹ o koya sa vagumatuataki koya e vakacacani me vorata na qaqa, me qai la'ki kaba na koro kaukauwa ko koya sa vakacacani.

¹⁰ Era cati koya sa ia na veivunauci e na matamata-ni-koro, ka vakasisilataki koya sa vosa dodonu.

¹¹ Ia ni dou sa buturaki koya sa dravudravua ka kovea mai vua nai kaukau sila, dou a tara na veivale e na veivatu e ta, ia dou na sega ni tiko kina; dou a tea na veiloga-ni-vaini domoni, ia dou na sega ni gunuva na kena waini.

¹² Ni'u sa kila na nomudou dautalaidredre, kei na levu ni nomudou i valavala ca— koi kemudou sa vakararawataka na yalododonu, ka taura nai solisoli ni veivaqumi, ka sa vakatala tani na dravudravua mai na matamata-ni-koro.

¹³ O koya oqo e na tiko lo ga na yalomatua e na gauna ko ya; ni sa gauna ca oqo.

¹⁴ Dou vakasaqara na ka vinaka ka segai na ka ca, mo dou bula kina; ena qai tiko vata kei kemudou ko Jiova, na Kalou-ni-lewevuqa, me vaka dou a kaya.

¹⁵ Dou cata na ka ca, ka vinakata na ka vinaka, ka vakadeitaka na lewa dodonu e na matamata-ni-koro; ena qai yalololoma beka ko Jiova na Kalou-ni-lewevuqa vei ira na kena vo vei Josefa.

¹⁶ O koya oqo sa kaya kina ko Jiova, na Kalou-ni-lewevuqa, na Turaga: “E na saqata ni koro kecega ena ia na tagi; e na salatu kece talega era na kaya, ‘Ulei! Ulei!’ Ka ra na kaciva nai vakatau-ni-were me tagi, kei ira sa dau-ni-lele me ra mai tagi yaso;

¹⁷ e na veiloga-ni-vaini kece ena ia na tagi, ni'u na lako voli yani e na kemudou maliwa,” sa kaya ko Jiova.

Na Siga i Jiova e Dua na Siga Butobuto

¹⁸ E ca vei kemudou sa gadreva me yaco na siga i Jiova! E vaka tale evei na kena yaga vei kemudou? A siga i Jiova sa butobuto, ka sega ni rarama;

¹⁹ sa vaka na tamata sa drotaka na laione, ka sa tavaki koya e dua na bea; se curu ki vale ka ravita na lalaga e na ligana, ka sa kati koya na gata.

²⁰ Ena sega li ni butobuto na siga i Jiova, ka sega ni rarama? Io, me butobuto sara ga, ka sega na rarama e tu kina?

²¹ “Au sa cata, au sa vakasisilataka na nomudou solevu, au na sega talega ni vinakata na nomudou soqosoqo tabu.

²² Ni dou vakacabora vei au nai soro kama kei na nomudou i madrali laukana, au na sega ni vakadonuya; ia nai soro ni veivinakati, na nomudou manumanu uro, au na sega ni goleva.

²³ Kauta tani vei au na domo ni nomudou meke; ia ka'u sa bese ni rogoca na domo ni nomudou api.

²⁴ Ia me dave yani me vaka na wai na lewa dodonu, kei nai valavala dodonu me vaka na uciwai sa vuabale.

²⁵ “Dou a vakacabora li vei au nai soro kei nai madrali e na vanua lala ka yabaki vasagavulu, oi kemudou na vale i Isireli?

²⁶ Ia dou a colata ga na vale ni nomudou Moloke kei Kaiuni na nomudou matakau, na kalokalo ni nomudou kalou, ko ya dou a cakava me nomudou.

²⁷ O koya oqo ka'u na vakauti kemudou tani kina vakabobula me sivi ko Tamasiko,” sa kaya ko Jiova, na Kalou-ni-lewevuqa na yacana.