Emosi 3 - Ai Vola Tabu (Vakadewa Makawa Vakavoutaki 2021)

Na Cala kei na Cudruvi nei Isireli

¹ Dou rogoca na vosa oqo sa vosataka ko Jiova ka baleti kemudou na Isireli, ka baleta na vuvale kecega ka'u a kauta cake mai na vanua ko Ijipita, ka vaka:

² “Sai kemudou duaduaga ka'u sa kila vei ira na veimataqali kece e vuravura; o koya oqo ka'u na cudruvi kemudou kina e na vuku ni nomudou caka cala kecega.

³ “Me rau lako vata li e lewe rua kevaka erau sa sega ni yalovata?

⁴ Me na tagi li na laione mai veikau, ni sa sega na kena e kunea? Me na tabalaka li na domona na luve ni laione mai na nona i kotokoto, kevaka sa sega ni rawata e dua na kena?

⁵ Me na tudaitaki li na manumanu vuka e na dai e na qele, ni sa sega na kena dai? Me na riba li na dai mai na qele, ni sa sega sara na ka e tudaitaki?

⁶ Me na uvuci li na davui e loma ni koro, ka sega ni rere kina na tamata? Me dua li na ca e na koro, me na sega ni vakayacora ko Jiova?

⁷ “E dina, ena sega ni vakayacora e dua na ka na Turaga ko Jiova, ena vakaraitaka mada ga na nona vosa vuni vei ira na nona tamata na parofita.

⁸ Sa tagi na laione; ko cei me na sega ni rere? Sa vosa na Turaga ko Jiova; o cei me na sega ni parofisai?”

⁹ Dou vakarogoya e na veivale vakaturaga mai Asitoti, kei na veivale vakaturaga e na vanua ko Ijipita, ka kaya, “Dou vakasoqoni kemudou ki na veiulunivanua mai Samaria, ka raica na yavavala levu mai kina, kei ira era sa vakasaurarataki mai kina.”

¹⁰ “Ni ra sega ni kila me ra caka dodonu,” sa kaya ko Jiova, “era binia na ka e kovei ka butakoci e na nodra veivale vakaturaga.”

¹¹ O koya oqo sa kaya kina na Turaga ko Jiova: “Sa na dua mai na meca, io, sa na vakavolivolita na vanua, ka na kauta tani mai vei iko na nomu kaukauwa; ena vakayanaki talega na nomu veivale vakaturaga.”

¹² Sa kaya vakaoqo ko Jiova: “Me vaka nai vakatawa sa kaliraka mai na gusu ni laione e rua na yava ni sipi, se na tiki ni daligana; ena kaliraki vakakina na Isireli era tiko mai Samaria e na tutu ni mocemoce, kei ira mai Tamasiko e nai davodavo.

¹³ “Dou rogoca, ka vakadinadina ki na vale i Jekope,” sa kaya na Turaga ko Jiova, na Kalou-ni-lewevuqa:

¹⁴ “E na siga ka'u na cudruvi ira kina na Isireli e na vuku ni nodra talaidredre, ka'u na qai cudruva na veicabocabo-ni-soro mai Peceli; io, na tutuna balavu cake ni cabocabo-ni-soro ena qai tamusuki, ka na lutu ki na qele.

¹⁵ Au na vakacataka na vale ni vula i liliwa kei na vale ni vula i katakata; ena rusa talega na veivale ivori, ka na vakaoti laivi na veivale lelevu,” sa kaya ko Jiova.