Dauveilewai 6 - Ai Vola Tabu (Vakadewa Makawa Vakavoutaki 2021)

Na Nodra Veivakalolomataki na Kai Mitiani

¹ A ra sa kitaka na ka ca e na mata i Jiova ko ira na Isireli; a sa soli ira ko Jiova ki na ligadra na kai Mitiani ka yabaki vitu.

² A sa kaukauwa na ligadra na kai Mitiani vei ira na Isireli; ia e na vukudra na kai Mitiani, era sa cakava ko ira na Isireli na veiqakilo kei na veiqara kei na veikoro ni valu, mai na veiulunivanua.

³ Ia kevaka era sa kaburaki sila ko ira na Isireli, sa qai ia ko ira na kai Mitiani, kei ira na Amalekaiti, kei ira mai na tokalau, ka lako cake vakaivalu vei ira;

⁴ ka ra tiko vakaivalu vei ira, ka vakacacana na vuata ni vanua, ka yacovi Qasa, ka sega ni vakavoca na kakana me ra bula kina ko ira na Isireli, ka sega na sipi, se na bulumakau, se na asa.

⁵ Ni ra sa lako cake ka kauta na nodra manumanu, kei na nodra veivale laca; a ra sa lako mai ka ra vaka na vodre na kedrai wiliwili; ia sa sega ni wili rawa ko ira kei na nodra kameli; ka ra sa lako mai ki na vanua me vakacacana sara.

⁶ A ra sa vakadravudravuataki vakalevu sara ko ira na Isireli e na vukudra na kai Mitiani; a ra sa tagi vei Jiova ko ira na Isireli.

⁷ Ia ni ra sa tagi vei Jiova ko ira na Isireli e na vukudra na kai Mitiani,

⁸ sa qai tala e dua na parofita ko Jiova vei ira na Isireli, o koya ka kaya vei ira, “Sa kaya vakaoqo ko Jiova na Kalou ni Isireli, Au a kauti kemudou cake mai Ijipita, ka kauti kemudou mai na vale ni veivakabobulataki;

⁹ ia ka'u a vakabulai kemudou mai na ligadra na kai Ijipita, kei na ligadra kecega era vakararawataki kemudou, ia ka'u a vakasevi ira tani mai na matamudou, ka solia vei kemudou na nodra vanua.

¹⁰ Ia ka'u a kaya vei kemudou, ‘Koi au ko Jiova na nomudou Kalou; kakua ni rerevaki ira na nodra kalou na Amoraiti, a nodra vanua dou sa tiko kina.’ Ia dou sa sega ni vakarorogo ki na noqu vosa.”

Na Kacivi nei Kitione

¹¹ A sa lako mai ko koya na agilosi i Jiova, ka tiko sobu e ruku ni oki mai Ofira, a nei Joasa na luve i Epieseri, a sa samu sila tiko ko Kitione na luvena mai na tikina sa daucaka kina na waini, me vunia mai vei ira na kai Mitiani.

¹² A sa rairai vua ko koya na agilosi i Jiova, ka kaya vua, “Sa tiko vata kei iko ko Jiova, ko iko na tamata-i-valu qaqa.”

¹³ A sa kaya vua ko Kitione, “Isa lei, noqu turaga, kevaka sa tiko vata kei keimami ko Jiova, a cava sa yacovi keimami kina na ka kecega oqo? Ka sa evei beka na nona cakacaka vakurabui kecega era a tukuna vei keimami ko ira na neimami qase, ni ra kaya, ‘Sa sega li ni kauti keda cake mai Ijipita ko Jiova?’ Ia ka sa qai biuti keimami ko Jiova, ka soli keimami yani ki na ligadra na kai Mitiani.”

¹⁴ A sa gole vua ko Jiova, ka kaya, “Mo lako e na nomu kaukauwa oqo, ia ko na vakabulai ira na Isireli mai na ligadra na kai Mitiani; au sa sega li ni talai iko?”

¹⁵ A sa kaya vua ko koya, “Isa lei, kemuni na Turaga, au na vakabulai ira vakaevei na Isireli? Ni raica, na noqu mataqali sa kena e malumalumu duadua e na kedra maliwa na Manasa, ia koi au, au sa lailai sara e na vale i tamaqu.”

¹⁶ A sa kaya vua ko Jiova, “Au na tiko vakaidina kei iko, ia ko na mokuti ira na kai Mitiani me vaka era le dua bauga na tamata.”

¹⁷ A sa kaya vua ko koya, “Kevaka au sa kune loloma e matamuni, mo ni cakava mada e dua nai vakadinadina ni sai kemuni ga ka vosa vei au.

¹⁸ Mo ni kakua ni lako tani eke, ka me'u lesu tale mada mai vei kemuni, ka kauta mai na noqu i madrali, ka vakacabora e matamuni.” A sa kaya ko koya, “Au na tiko ga ka yacova na nomu lesu tale mai.”

¹⁹ A sa lako ko Kitione, ka vakarautaka e dua na luve ni me, kei na keke sa sega ni vakaleveni sa caka e na dua na efa madrai droka. Sa virikotora na lewe ni manumanu e na sova, ka sova na kena su ki na kuro, a sa kauta mai ki na ruku ni oki, ka vakacabora vua.

²⁰ A sa kaya vua na agilosi ni Kalou, “Kauta na lewe ni manumanu, kei na keke sa sega ni vakaleveni, ka biuta e na dela ni vatu oqo, ka sova na kena su.” A sa kitaka vakakina ko koya.

²¹ Ia na agilosi i Jiova sa qai tara e na mua ni titoko sa tu e ligana na lewe ni manumanu kei na keke sa sega ni vakaleveni; ka sa tubu cake na bukawaqa mai na vatu, ka kania na lewe ni manumanu kei na keke sa sega ni vakaleveni. Sa qai lako tani mai vua ko koya na agilosi i Jiova.

²² Sa qai kila ko Kitione ni sai koya na agilosi i Jiova, ka sa kaya ko Kitione, “Ulei, na Turaga ko Jiova! Ni'u sa qai raica e mataqu dina na agilosi i Jiova.”

²³ A sa kaya vua ko Jiova, “Mo vakacegu ga. Kakua ni rere; ko na sega ni mate.”

²⁴ Sa qai cakava mai kea e dua nai cabocabo-ni-soro vei Jiova ko Kitione, a sa vakatoka ko Jiova-salomi [Ko Jiova sa dauveivakacegui]. Ka sa tu ga mai Ofira, ka nodra na luve i Epieseri, ka yacova na siga edaidai.

²⁵ A sa kaya vua ko Jiova e na bogi ko ya, “Mo kauta na bulumakau tagane ka nei tamamu, io na kenai karua ni bulumakau sa yabaki vitu, ka talaraka sobu nai cabocabo-ni-soro i Peali, ko ya sa nei tamamu, ka taya sobu na kalou yalewa ni veikau sa tu kina;

²⁶ ka mo cakava e dua nai cabocabo-ni-soro vei Jiova na nomu Kalou, e cake e na koro kaukauwa oqo, ka me caka vakavinaka, ka kauta na kenai karua ni bulumakau, ka vakacabora mei soro kama, e na buka ni kalou yalewa ni veikau o koya ko na taya sobu.”

²⁷ A sa kauta ko Kitione e lewe tini na nona tamata, ka cakava me vaka ka kaya vua ko Jiova. Ia ni sa rerevaki ira na lewe-ni-vuvale i tamana, kei ira na lewe ni koro ko koya, sa sega kina ni kitaka e na siga, sa kitaka ga e na bogi.

Sa Vakarusa nai Cabocabo-ni-soro i Peali ko Kitione

²⁸ Ia ni ra sa sou e na mataka na lewe ni koro, raica, sa talaraki sobu nai cabocabo-ni-soro i Peali, a sa ta sobu na kalou yalewa ni veikau o koya ka tu kina, ka sa vakacabori na kenai karua ni bulumakau e na dela ni cabocabo-ni-soro sa qai caka.

²⁹ A ra sa veitarotarogi vakai ira, “O cei sa cakava na ka oqo?” A ra sa veitarotarogi ka qaqa, ka ra kaya, “O Kitione na luve i Joasa sa kitaka na ka oqo.”

³⁰ A ra sa kaya vei Joasa ko ira na lewe ni koro, “Kauta mai na luvemu, me mate mada, ni sa talaraka sobu nai cabocabo-ni-soro i Peali, ka ni sa taya sobu talega na kalou yalewa ni veikau o koya ka tu kina.”

³¹ A sa kaya ko Joasa vei ira kecega era sa tu voleka vua, “Dou na totaki Peali? Dou na vakabulai koya li? O koya sa totaki koya, me sa vakamatei ni sa mataka tiko. Ke sa kalou ko koya, me vala e na vukuna ga, ni sa dua sa talaraka sobu na nona i cabocabo-ni-soro.”

³² A sa vakatokai ko koya e na siga ko ya ko Jerupeali, ni sa kainaki, “Me veivala kaya ko Peali”, ni sa talaraka sobu ko koya na nona i cabocabo-ni-soro.

³³ A ra sa soqoni vata ko ira kecega na kai Mitiani, kei ira na Amalekaiti, kei ira mai na tokalau, ka ra lako yani, ka la'ki tiko e na buca mai Jesireli.

³⁴ A sa curumi Kitione na Yalo i Jiova a sa uvu davui ko koya; ka ra sa vakasoqoni vata ko ira na luve i Epieseri me ra muri koya.

³⁵ A sa tala ko koya eso na tamata kivei ira kecega na Manasa, ka ra sa kacivi talega ko ira me ra muri koya. A sa tala eso na tamata vei ira na Aseri, kei ira na Sevuloni, kei ira na Navitalai; a ra sa lako mai me ra veitata kaya.

Nai Vakatakilakila ni Vutika ni Sipi

³⁶ A sa kaya vua na Kalou ko Kitione, “Kevaka ko ni na vakabulai ira na Isireli e na ligaqu, me vaka ko ni a kaya,

³⁷ raica, au na vakotora e na rara ni samu sila na vutika ni sipi sa koti. Kevaka sa suasua na vutika ni sipi duaduaga e na tegu, ka sa mamaca na qele kecega, au na qai kila ni ko ni na vakabulai ira na Isireli e na ligaqu, me vaka ko ni a kaya.”

³⁸ A sa yaco me vakakina. Ka ni sa sou e na mataka ko koya, sa qumia vata na vutika ni sipi, ka lobaka na tegu mai na vutika ni sipi, a sa sinai kina e dua na sedre e na wai.

³⁹ A sa kaya vua na Kalou ko Kitione, “Me kakua ni katakata na nomuni cudru vei au, ka me'u vosa tale vakadua ga. Au kerea me'u bau vakatovolea tale mada vakadua ga e na vutika ni sipi; me mamaca mada na vutika ni sipi duaduaga, ka me no e na qele taucoko na tegu.”

⁴⁰ A sa cakava vakakina na Kalou e na bogi ko ya. Ni sa mamaca na vutika ni sipi duaduaga, ka sa no e na qele taucoko na tegu.