Dauveilewai 3 - Ai Vola Tabu (Vakadewa Makawa Vakavoutaki 2021)

Na Veimatanitu era Tiko Voli ga e Kenani

¹ Ia ko ira oqo na veimatanitu ka laiva ko Jiova, me vakatovolei ira kina na Isireli, io ko ira kece era a sega ni kila nai valu kecega mai Kenani;

² me ra kila ga kina ko ira na nodra veitabatamata na Isireli, ka me ra vuli e nai valu ko ira era a sega ni kila eliu.

³ E lewe lima na nodra turaga na kai Filisitia, kei ira kecega na kai Kenani, kei ira na kai Saitoni, kei ira na Aivaiti era tiko mai na Ulunivanua ko Lepanoni, mai na Ulunivanua ko Peali-erimoni ka yaco ki nai curucuru ki Emaci.

⁴ Ia ko ira oqo me ra vakatovolei kina na Isireli, me kilai se ra na vakarorogo, se segai, ki nai vakaro i Jiova, sa vakarota ko koya vei ira na nodra qase e na gusu i Mosese.

⁵ Ia ko ira na Isireli era sa tiko ga e na kedra maliwa na kai Kenani, kei ira na Itaiti, kei ira na Amoraiti, kei ira na Perisaiti, kei ira na Aivaiti, kei ira na Jepusaiti,

⁶ ka ra sa vakawati kei ira na nodra goneyalewa, ka ra musuki ira na nodra goneyalewa kivei ira na luvedra, a ra sa qarava na nodra kalou.

Ko Ocinieli

⁷ Ia era sa kitaka na ka ca e na mata i Jiova ko ira na Isireli, ka guilecavi Jiova na nodra Kalou, ka qaravi ira na Peali kei ira na kalouyalewa ni veikau.

⁸ A sa waqa kina na cudru i Jiova vei ira na Isireli, a sa volitaki ira ko koya ki na liga i Kusani-risaceimi na tui Mesopotemia. A ra sa qali kivei Kusani-risaceimi ko ira na Isireli ka yabaki walu.

⁹ Ia ni ra sa tagi vei Jiova ko ira na Isireli, sa vakatubura vei ira na Isireli e dua nai vakabula ko Jiova, ka vakabulai ira, io ko Ocinieli na luve i Kinasi, na taci Kelepi.

¹⁰ A sa tiko vei koya na Yalo i Jiova, a sa lewai ira na Isireli ko koya, ka la'ki veivala; a sa soli Kusani-risaceimi na tui Mesopotemia ko Jiova ki na ligana. A sa gumatua na ligana vei Kusani-risaceimi.

¹¹ A sa vakacegu na vanua ka yabaki vasagavulu. A sa mate ko Ocinieli na luve i Kinasi.

Ko Eute

¹² A ra sa kitaka tale na ka ca e na mata i Jiova ko ira na Isireli; a sa vakaukauwataki Ekiloni na tui Moapi ko Jiova me veivala kei ira na Isireli, ni ra sa caka ca e na mata i Jiova.

¹³ A sa kauti ira na luve i Amoni kei Amaleki ko koya me nona i to, ka sa la'ki mokuti ira na Isireli, ka ra sa mai taukena na koro ni veibalabala.

¹⁴ A ra sa qali vei Ekiloni na tui Moapi ko ira na Isireli ka yabaki tinikawalu.

¹⁵ Ia ni ra sa tagi vei Jiova ko ira na Isireli, sa vakatubura ko Jiova e dua na nodra i vakabula ko Eute na luve i Kira, e na yavusa i Penijamini, a tamata sa ligai mawi. A sa talai koya ko ira na Isireli me kauta e dua na ka ni loloma vei Ekiloni na tui Moapi.

¹⁶ A sa cakava ko Eute e dua na nona i seleiwau bati rua e dua na kiupiti na kena balavu, a sa vauca ki na dibina i matau, e ruku ni nona i sulu.

¹⁷ A sa kauta ko koya na ka ni loloma vei Ekiloni na tui Moapi. A sa tamata levulevu sara ko Ekiloni.

¹⁸ Ia ni sa solia oti ko koya na ka ni loloma, sa talai iratou yani na tamata eratou a kauta mai na ka ni loloma.

¹⁹ Ia sa vuki lesu tale mai ko koya mai na veimatakau sa tu voleka ki Kilikali, ka sa kaya, “Kemuni na tui, e tiko oqo e dua nai tukutuku vuni me'u tukuna vei kemuni.” Sa qai kaya ko koya, “Dou tiko lo.” A ra sa lako tani ki tautuba ko ira kecega era tu vata kaya.

²⁰ A sa toro vei koya ko Eute ni sa tiko duaduaga ko koya e na nona vale vakamudremudre. A sa kaya ko Eute, “E tiko oqo na nonai tukutuku na Kalou kivei kemuni.” A sa tucake ko koya mai na nona i dabedabe vakaturaga.

²¹ A sa tatara yani e na ligana i mawi ko Eute, ka ucuna nai seleiwau mai na dibina i matau, ka suaka na ketena.

²² A sa yali ki loma na yame ni sele kei na kena dia, ni sa bulu na yamena e na uro, ka ni sa sega ni cavuta tani ko koya nai seleiwau mai na ketena; ka sa basika ki tuba na benu.

²³ A sa curu yani e na varada ki tautuba ko Eute, ka sogota na katuba ni vale, ka lokataki koya ki loma.

²⁴ Ia ni sa lako yani ko koya, era sa lako mai na nona tamata. Ni ra sa raica ni lokataki tu na katuba ni vale, era sa kaya, “Sa vakara beka ko koya e na vale vakamudremudre.”

²⁵ Ia era sa madua ni ra wawa vakadede. Ka raica, ni sa sega ni dolava ko koya na katuba ni vale, era sa qai taura e dua nai dola, ka dolava. Ka raica, sa bale matemate koto na nodra turaga e na buturara ni vale.

²⁶ Ia ni ra sa berabera tiko, sa dro ko Eute, ka lako sivita na veimatakau, ka dro ki Seiraci.

²⁷ Ni sa yaco kina ko koya, a sa uvuca na davui e na vanua veiulunivanua ko Ifereimi. Era sa qai lako sobu kaya ko ira na Isireli mai na vanua veiulunivanua, ka sa liutaki ira ko koya.

²⁸ A sa kaya vei ira ko koya, “Dou muri au mai, ni sa soli ira na nomudou meca na Moapi ki na ligamudou ko Jiova.” A ra sa muri koya sobu, ka sogosogota na veivutovuto ni Joritani vaka ki Moapi, ka sega ni laiva e dua na tamata me vuto-kosova.

²⁹ Era a mokuta mate rawa e na gauna ko ya era lewe tini beka na udolu na kai Moapi, ka ra tamata bulicaki kaukauwa kecega, ka tamata qaqa; ka sega ni dro bula e dua na tamata.

³⁰ A sa vakamalumalumutaki ko ira na Moapi e na ligadra na Isireli e na siga ko ya. A sa tiko vakacegu na vanua ka yabaki walusagavulu.

Ko Samikari

³¹ A sa taravi koya ko Samikari na luve i Anaci, ko koya sa vakamatea e lewe ono na drau vei ira na kai Filisitia e na moto ni bulumakau. O koya talega sa vakabulai ira na Isireli.