Dauveilewai 20 - Ai Vola Tabu (Vakadewa Makawa Vakavoutaki 2021)

Era Valuti Penijamini na Vo ni Veimataqali

¹ Sa qai lako yani ko ira kecega na Isireli, a ra sa soqoni vata vei Jiova ki Misipa ko ira nai soqosoqo, me vaka era le dua bauga na tamata, mai Tani ka yaco ki Peri-sepa, kei na vanua ko Kiliati.

² Ia sa tu vata kei na nodra i soqosoqo na tamata ni Kalou ko ira na nodra turaga na tamata kecega, io na yavusa kecega i Isireli, era le vasagavulu na oba (400,000) na tamata era sa taubale ka sa vakaiseleiwau.

³ (Ia sa rogoca ko ira na yavusa i Penijamini ni sa lako cake ki Misipa ko ira na veiyavusa i Isireli.) Era sa qai kaya ko ira na Isireli, “Dou tukuna mai, se sa yaco vakaevei na ka ca oqo.”

⁴ A sa vosa na Livai, na watina na yalewa ka vakamatei, ka kaya, “Au a lako mai ki Kipea sa nei Penijamini, koi keirau kei na watiqu lailai, me moce kina.

⁵ A ra sa ia me ra vakacacani au ko ira na kai Kipea, ka volita na vale ka'u sa tiko kina e na bogi. Era sa nanuma me ra vakamatei au, ia era a taura vakaukauwa na watiqu lailai, ka vakacacana, ka sa mate kina ko koya.

⁶ Ia ka'u a qai taura na watiqu lailai ka musumusulaka, ka vakauta ki na vanua taucoko era sa taukena ko ira na Isireli; ni ra a kitaka na ka vakasisila kei na ka lialia e Isireli.

⁷ Raica, koi kemudou kecega na Isireli; dou tukuna mada mai na ka dou sa nanuma, kei na nomudou lewa.”

⁸ A sa tucake na tamata kecega me vaka era le dua bauga na tamata, ka kaya, “Ena sega e dua vei keda me lako ki na nona valelaca, ena sega talega ni lesu e dua na tamata ki nona vale.

⁹ Ia oqo ga na ka eda na qai kitaka vei Kipea: eda na vakawiri madigi, ka lako cake kina.

¹⁰ Eda na kauta na tamata e lewe tini mai na le dua na drau mai na yavusa yadua ni Isireli, kei na le dua na drau mai vei ira na le dua na udolu, kei na le dua na udolu mai vei ira na le oba (10,000), me ra kau kakana vei ira na tamata, ka gauna era yaco mai kina, me ra qai sauma lesu vei Kipea e Penijamini me vaka na ka lialia era a kitaka e Isireli.”

¹¹ A ra sa soqoni vata me ra kaba na koro ko ira kecega na Isireli, ka ra sa yalovata me vaka era le dua bauga na tamata.

¹² A ra sa talai ira na tamata eso ko ira na veiyavusa e Isireli ki na yavusa taucoko i Penijamini, ka kaya, “A cava na ka ca oqo sa caka e na kemudou maliwa?

¹³ Ia mo dou qai soli ira na tamata, na luve ni ca era tiko e Kipea, me keitou vakamatei ira, ka vakaotia laivi nai valavala ca mai vei ira na Isireli.” Ia ko ira na yavusa i Penijamini era sa bese ni muria na vosa ni wekadra, na Isireli.

¹⁴ A ra sa soqoni vata ki Kipea ko ira na yavusa i Penijamini mai na veikoro, me ra la'ki veivala kei ira na Isireli.

¹⁵ A ra sa wili na yavusa i Penijamini mai na veikoro e na siga ko ya, ka ra sa le ruasagavulu ka ono na udolu na tamata era vakaiseleiwau, kei ira tale na kai Kipea era sa wili, era sa le vitu na drau na tamata digitaki.

¹⁶ Vei ira na tamata kecega oqo era sa le vitu na drau na tamata digitaki sa ligai mawi; ka ra sa daurabotaka yadua na vatu me sega ni cala sa na lauta e dua na drau ni ulu.

¹⁷ Ia ko ira na Isireli, ni ra sa sega ni wili vata kei ira na Penijamini, era sa le vasagavulu na oba (400,000) na tamata na kedrai wiliwili era sa vakaiseleiwau; era sa tamata i valu ko ira kecega oqo.

¹⁸ A ra sa cavu tu na Isireli, ka lako cake ki na vale ni Kalou, ka taroga na Kalou, ka kaya, “O cei vei keimami me liu yani, me veivala kei ira na yavusa i Penijamini?” A sa kaya ko Jiova, “Me ra liu ko ira na yavusa i Juta.”

¹⁹ A ra sa cavu tu e na mataka ko ira na Isireli, ka la'ki tiko vakaivalu me ravuti Kipea.

²⁰ A sa lako yani ko ira na Isireli me veivala kei ira na Penijamini; ka ra tuvai valu ko ira na Isireli me ra veivala kei ira mai Kipea.

²¹ A ra sa curu yani mai Kipea ko ira na Penijamini, a ra sa vakamatea e lewe rua na oba ka rua na udolu (22,000) na tamata vei ira na Isireli, e na siga ko ya.

²² (23) Ia ko ira na Isireli, era sa vakayaloqaqataki ira, ka tuvai ira tale vakaivalu e na tikina era a tuvai valu kina e nai matai ni siga.

²³ (22) A ra sa lako cake ko ira na Isireli, ka tagi e na mata i Jiova ka yakavi mai, a ra sa tarogi Jiova, ka kaya, “Me keimami lako tale, me keimami vala kei ira na Penijamini na taci keimami, se segai?” A sa kaya ko Jiova, “Dou lako ka vala kei ira.”

²⁴ A ra sa toro voleka yani vei ira na Penijamini ko ira na Isireli e nai karua ni siga.

²⁵ A sa curu yani e Kipea ko ira na Penijamini me vala kei ira e nai karua ni siga, ka ra yaviti ira tale na Isireli ka sa mate kina e le dua na oba ka walu na udolu (18,000) na tamata; era sa vakaiseleiwau ko ira kecega oqo.

²⁶ Era sa qai lako cake ko ira kecega na Isireli, kei ira kecega na tamata, ka lako ki na vale ni Kalou, ka tagi, ka tiko kina e na mata i Jiova, ka lolo e na siga ko ya ka bogivaka, a ra sa vakacabora eso nai soro kama, ka so nai madrali ni veivinakati, e na mata i Jiova.

²⁷ A ra sa tarogi Jiova ko ira na Isireli, (ni sa tiko mai kea na kato ni veiyalayalati ni Kalou e na gauna ko ya,

²⁸ a sa dauqarava ko Finiasi, na luve i Iliesa, na luve i Eroni, e na gauna ko ya,) ka kaya, “Me keimami lako tale me veivala kei ira na Penijamini, na taci keimami, se me kakua?” A sa kaya ko Jiova, “Dou lako cake; ni'u na soli ira ki na ligamu e na mataka.”

²⁹ A sa lesia eso na tamata ko ira na Isireli me ra vuni koto ka viribaiti Kipea.

³⁰ A ra sa lako cake ko ira na Isireli vei ira na Penijamini e nai katolu ni siga, a ra sa tuvai valu ki Kipea, me vaka eliu.

³¹ A ra sa curu yani ko ira na Penijamini me tavaki ira na tamata, ka ra sa vakayarayarataki mai na koro. A ra sa vakatekivu me ra yaviti ira na tamata, ka mokuti ira mate, me vaka eliu, e na veisalatu, sa lako cake edua vaka ki na vale ni Kalou, ia na kenai karua sa lako e na were ki Kipea, era sa le tolusagavulu beka vei ira na Isireli.

³² A ra sa kaya ko ira na Penijamini, “Era sa moku tale, me vaka eda mokuti ira eliu.” Ia era sa kaya ko ira na Isireli, “Tou dro mada, ka vakayarayarataki ira mai na koro ki na veisalatu.”

³³ A ra sa cavu tu ko ira kecega na Isireli mai na nodra tikina, ka tuvai ira vakaivalu mai Peali-tamari, ia ko ira na Isireli era wawa koto vakavuni, era sa lako mai na nodra tikina, mai na vanua veico ni Kipea.

³⁴ A ra sa lako mai vaka ki Kipea e le dua na oba (10,000) na tamata digitaki mai vei ira kecega na Isireli, a sa ka levu nai valu. Ia era sa sega ni kila na Penijamini ni sa voleka vei ira na ca.

³⁵ A sa yaviti ira na Penijamini e matadra na Isireli ko Jiova, ka sa vakamatea ko ira na Isireli e na siga ko ya e le rua na oba ka lima na udolu ka dua na drau (25,100) vei ira na Penijamini. Era sa vakaiseleiwau ko ira kecega oqo.

³⁶ A ra kunea ko ira na Penijamini ni ra sa vakadrukai. Era sa drotaki ira na Penijamini ko ira na Isireli, baleta ni ra sa vakararavi vei ira era sa lesi me ra wawa koto vakavuni mai Kipea.

³⁷ A ra sa qai toso vakatotolo sara ko ira na wawa koto vakavuni, ka sikiti Kipea. Era sa lako tu ka samuta na koro taucoko e nai seleiwau.

³⁸ Ia sa lesi e dua nai vakatakilakila vei ira na Isireli kei ira na tiko vakavuni, me ra vakuvuya e dua na kubou levu me lako cake mai na koro.

³⁹ Ia ni sa suka mai nai valu ko ira na Isireli, sa ia ko ira na Penijamini ka mokuta mate e le tolusagavulu beka vei ira na Isireli; ni ra sa kaya, “Era sa vakadrukai vakaidina e matada, me vaka e nai valu eliu.”

⁴⁰ Ia ni sa kuvu cake na duru kubou mai na koro, era sa rai ki muri na Penijamini ka raica, sa lako cake ki lomalagi na kubou mai na koro taucoko.

⁴¹ Ia ni ra sa qai vuki mai ko ira na Isireli, sa kidroa ko ira na Penijamini, ni ra sa raica sa yacovi ira na leqa.

⁴² Ia era sa vuki kina ka dro mai vei ira na Isireli, e na sala ki na vanua lala; ia sa vauci ira nai valu. Ia ko ira mai na veikoro era sa vakarusai e na kedra maliwa.

⁴³ Sa buku na kedra lawa na Penijamini, ka ra sa vakasavi ira, ka buturaki ira vakarawarawa e na yasai Kipea, vaka ki nai cadracadra ni mata-ni-siga.

⁴⁴ A sa mate vei ira na Penijamini e le dua na oba ka walu na udolu (18,000) na tamata; era sa tamata qaqa ko ira kecega oqo.

⁴⁵ Ia era sa lesu ka dro ki na vanua lala ki na uluvatu ko Rimoni, ka ra sa vakamatea vei ira nai se e na veisalatu e le lima na udolu na tamata; ka ra sa vakasavi ira matua ka yacovi Kitomi, ka yavita vei ira e le rua na udolu na tamata.

⁴⁶ Ia ko ira kecega sa mate vei ira na Penijamini e na siga ko ya, era sa lewe ruasagavulu ka lima na udolu na tamata era vakaiseleiwau; era sa tamata qaqa ko ira kecega oqo.

⁴⁷ Ia sa lesu e le ono na drau na tamata, ka dro ki na vanua lala, ki na uluvatu ko Rimoni; a ra sa tiko mai na uluvatu ko Rimoni ka vula va.

⁴⁸ A ra sa lesu tale mai ko ira na Isireli vei ira na Penijamini, ka yaviti ira na tamata e na veikoro, e nai seleiwau, kei na manumanu e yavai va, kei na ka kecega era sa kunea. A ra sa vakama na veikoro kecega era sa kunea.