Dauveilewai 17 - Ai Vola Tabu (Vakadewa Makawa Vakavoutaki 2021)

Ko Maika kei Koya na Livai

¹ Sa dua na tamata mai na vanua veiulunivanua ko Ifereimi na yacana ko Maika.

² A sa kaya vua na tinana ko koya, “Na tiki ni siliva e dua na udolu ka dua na drau ka sa kau tani mai vei iko, na ka ko a vosa vakacudrucudru kina, ka vosataka talega kina vei au, raica, sa tu vei au na siliva; sai au ga ka kauta.” Ka sa kaya ko tinana, “Me vakalougatataki na luvequ mai vei Jiova.”

³ A sa qai vakasuka ko koya vei tinana na tiki ni siliva e dua na udolu ka dua na drau. Ka sa kaya ko tinana, “Au sa vakacabora oti vakaidina na siliva vei Jiova mai na ligaqu me nei luvequ, me caka kina e dua na matakau ceuceu ka dua na matakau kaukamea. Ia oqo, au na vakasuka tale vei iko.”

⁴ Ia ni sa vakasuka ko koya na siliva vua na tinana, sa taura ko tinana e rua na drau na tiki ni siliva, ka solia vua na kena matai, ka sa cakava kina ko koya e dua na matakau ceuceu kei na dua na matakau kaukamea. A sa la'ki tu ga e na vale i Maika.

⁵ A sa dua na nona burekalou na tamata oqo ko Maika, ka sa cakava ko koya e dua na efoti kei na so na matakau, ka sa bulia e dua na luvena me nona bete.

⁶ E na gauna ko ya sa sega na tui vei ira na Isireli; era sa dui cakava ga ko ira na tamata yadua na ka sa vinakata ko koya.

⁷ A sa dua na cauravou mai Peceliema e Juta, e na yavusa i Juta; e dua vei ira na Livai ko koya, ka sa tiko vulagi mai kea.

⁸ A sa lako na tamata ko ya mai na koro ko Peceliema mai Juta me la'ki tiko vulagi e na dua na vanua ena kunea. Ia ni sa lako tu, sa yaco ki na vanua veiulunivanua ko Ifereimi, ki na vale i Maika.

⁹ A sa kaya vua ko Maika, “O sa lako mai vei?” A sa kaya vua ko koya, “Koi au na Livai mai Peceliema e Juta, ia ka'u sa lako tu me'u tiko vulagi e na dua na vanua ka'u na kunea.”

¹⁰ A sa kaya vua ko Maika, “Mo tiko ga kei au, mo tamaqu ka mo noqu bete, ia ka'u na solia vei iko e tini na tiki ni siliva e na veiyabaki, kei nai sulu me rauti iko, kei na kemu.” A sa curu ki loma na Livai.

¹¹ A sa vinakata na Livai me tiko vata kei koya, ka sa vaka e dua na luvena ko koya na cauravou.

¹² A sa buli koya na Livai ko Maika, ka sa yaco na cauravou me nona bete, ka sa tiko e na vale i Maika.

¹³ Sa qai kaya ko Maika, “Au sa qai kila, ni na caka vinaka vei au ko Jiova, ni sa noqu bete e dua na Livai.”