Dauveilewai 15 - Ai Vola Tabu (Vakadewa Makawa Vakavoutaki 2021)

Vakadrukai Ira na kai Filisitia ko Samisoni

¹ Ia e muri, e na vula ka tamusuki kina na witi, sa la'ki raici watina ko Samisoni, ka kauta e dua na luve ni me; ka kaya, “Au na lako vua na watiqu ki loqi.” Ia sa sega ni vakadonui koya me curu kina ko tamana na yalewa.

² A sa kaya na tama ni yalewa, “Au sa vakadinata ni ko sa cati koya, ka'u a soli koya kina vua na nomu i tau. Sa sega li ni matavinaka cake ko tacina? Me nomu mada ga ko koya, me kenai sosomi.”

³ A sa kaya vei ira ko Samisoni, “E na gauna oqo, kevaka ka'u na vakacacani ira na kai Filisitia, au na sega ni beitaki kina.”

⁴ A sa mani lako ko Samisoni, ka toboka e tolu na drau na fokisi, ka saumaka me veiuturi na buidra ka qai bukuya vata vakayayarua, ka vauca e dua na buka e na maliwa ni buidra yarua kecega.

⁵ A sa tutuvaka na buka, ka biuti ira me ra lako e loma ni nodra sila na kai Filisitia sa sega ni tamusuki, ka sa vakama na veibinibini sila, kei na sila sa sega ni tamusuki, kei na veiwere ni olive.

⁶ A ra sa taro na kai Filisitia, “O cei sa cakava na ka oqo?” A ra sa kaya, “Ko Samisoni, na vugona na kai Timinaca, ni sa kauta ko koya na watina, ka solia ki na nona i tau.” A ra sa lako cake na kai Filisitia, ka vakamai koya na yalewa kei na tamana e na bukawaqa.

⁷ A sa kaya vei ira ko Samisoni, “Dou sa cakava na ka oqo, ia ka'u na sauma mada ga vei kemudou, ka'u na qai vakacegu.”

⁸ A sa mokuti ira e nai moku levu, ka sa ravusebetaki ira; ka sa lako sobu ko koya ka la'ki tiko e na yasa ni vatu ko Etami.

⁹ A ra sa lako cake na kai Filisitia, ka tiko vakaivalu mai Juta, ka sa robota na vanua mai Liai.

¹⁰ A ra sa kaya ko ira na yavusa i Juta, “A cava dou sa lako cake mai kina vei keimami?” A ra sa kaya, “Keimami sa lako cake mai me vesuki Samisoni, me keimami cakava vua me vaka sa cakava vei keimami ko koya.”

¹¹ Sa qai lako sobu e lewe tolu na udolu na tamata vei ira na yavusa i Juta, ki na yasa ni vatu ko Etami, ka ra sa kaya vei Samisoni, “Ko sa sega li ni kila ni ra sa lewai keda na kai Filisitia? Ia a cava na ka oqo ko sa cakava vei keimami?” A sa kaya vei ira ko koya, “Au sa cakava ga vei ira me vaka na ka era sa cakava vei au.”

¹² A ra sa kaya vua, “Keitou sa lako sobu mai me vesuki iko, me soli iko ki na ligadra na kai Filisitia.” A sa kaya vei ira ko Samisoni, “Dou bubului mada vei au ni dou na sega ni mokuti au koi kemudou.”

¹³ A ra sa kaya vua, “E sega, ia keitou na vesuki iko matua ga, ka soli iko ki na ligadra. Ia keitou na sega sara ni vakamatei iko.” A ra sa qai vesuki koya e na dali vou e rua, ka kauti koya cake mai na vatu.

¹⁴ Ni sa yaco ko koya ki Liai, era sa kaikaila na kai Filisitia ni ra sa la'ki tavaki koya. A sa curumi koya vakaukauwa na Yalo i Jiova, a sa vuki na dali e ligana me vaka na wa sa kama yavu, a sa tasere mai na ligana na kenai vesu.

¹⁵ A sa kunea ko koya e dua na sui-ni-galegale ni asa ka se qai mate ga, ka sa dodoka na ligana, ka taura, ka mokuta kina e le dua na udolu na tamata.

¹⁶ A sa kaya ko Samisoni, “E na sui-ni-galegale ni asa, sa veibinibini cake nai binibini, e na sui-ni-galegale ni asa ka'u sa mokuta e le dua na udolu na tamata.”

¹⁷ Ia ni sa vosa oti ko koya, sa qai biuta tani e ligana na sui-ni-galegale, ka vakayacana na tikina ko ya ko Rama i Liai [Na Delana ni Sui-ni-galegale].

¹⁸ A sa mate e na viagunu, ka sa tagi vei Jiova, ka kaya, “O ni sa ia na veivakabulai levu oqo e na ligaqu na nomuni tamata, ia ka me'u na qai mate beka e na viagunu, ka bale ki na ligadra ko ira sa sega ni cili?”

¹⁹ A sa kavidalaka na vatu mai Liai na Kalou, a sa vure mai kina na wai, a sa gunu ko koya, ka sa lesu tale mai na yalona, ka sa bula mai. O koya sa vakatoka kina na yacana ko Eni-akori [Nai vurewai mei koya ka tagi], ko ya mai Liai, ka yacova na siga oqo.

²⁰ A sa lewai ira na Isireli ko koya, e na nodra gauna na kai Filisitia, ka yabaki ruasagavulu.