Dauveilewai 13 - Ai Vola Tabu (Vakadewa Makawa Vakavoutaki 2021)

Na Sucu nei Samisoni

¹ A ra sa daucaka ca tale e na mata i Jiova, ko ira na Isireli; a sa soli ira ko Jiova ki na ligadra na kai Filisitia ka yabaki vasagavulu.

² A sa dua na tagane mai Sora, e na yavusa i Tani, na yacana ko Manoa; a sa yava na watina, ka sega ni vakaluvea.

³ A sa rairai vua na yalewa na agilosi i Jiova, ka kaya vua, “Raica mada, ko sa yava, ka sega ni vakaluveni; ia ko na kunekune ga, ka vakasucuma e dua na gonetagane.

⁴ Ia mo qarauni iko mada, mo kakua ni gunu waini se na yaqona, kakua talega ni kania e dua na ka sa sega ni savasava,

⁵ ia raica, ko na kunekune, ka vakasucuma e dua na gonetagane. Ia ena sega ni tasi na uluna, ka ni na Nasiraiti [vakatabui] me nona na Kalou ko koya na gone ni sa qai sucu. Ko koya ena vakatekivu me vakabulai ira na Isireli mai na ligadra na kai Filisitia.”

⁶ A sa lako na yalewa ka tukuna vua na watina, ka kaya, “Sa lako mai vei au e dua na tamata ni Kalou, ia sa ka rerevaki sara na kenai rairai, sa vaka nai rairai ni agilosi ni Kalou. Ia ka'u a sega ni tarogi koya se sa lako mai vei, ka sa sega ni tukuna vei au na yacana ko koya;

⁷ ia sa kaya vei au ko koya, ‘Raica, ko na kunekune, ka vakasucuma e dua na gonetagane. Ia mo kakua ni gunu waini se na yaqona, kakua talega ni kania e dua na ka sa sega ni savasava, ni na vakatabui [nasiraiti] me nona na Kalou ko koya na gone ni sa qai sucu, ka yacova na siga ena mate kina.’ ”

⁸ A sa vakamasuti Jiova ko Manoa, ka kaya, “Au masuti kemuni, noqu Turaga, me lako tale mada mai vei keirau ko koya na tamata ni Kalou ko ni a tala mai eliu, me mai vakavulici keirau e na ka me caka vua na gone ena sucu mai.”

⁹ A sa vakarogoca na vosa i Manoa na Kalou; a sa lako tale mai na agilosi ni Kalou vua na yalewa ni sa tiko e na were. Ia sa sega ni tiko kaya ko Manoa na watina.

¹⁰ A sa cici kusarawa na yalewa, ka tukuna vua na watina, ka kaya vua, “Raica, sa rairai mai vei au ko koya na tamata ka lako mai vei au e na siga ko ya.”

¹¹ A sa cavu tu ko Manoa, ka muri watina, ka lako vua na tamata, ka kaya vua, “O iko beka na tamata ka vosa vua na yalewa?” A sa kaya ko koya, “Koi au ga.”

¹² A sa kaya ko Manoa, “Me yaco ga na nomuni vosa, ia me na vakaevei na neirau i valavala vua na gone, ka cava na ka me caka vua?”

¹³ A sa kaya vei Manoa na agilosi i Jiova, “Na ka kecega ka'u a kaya vua na yalewa, me muria ga ko koya.

¹⁴ Me kakua ni kania ko koya e dua na ka sa tubu mai na vaini, me kakua talega ni gunu waini se na yaqona, se kania e dua na ka sa sega ni savasava. Me vakabauta ko koya na ka kecega ka'u a vakarota vua.”

¹⁵ A sa kaya vua na agilosi i Jiova ko Manoa, “Me keirau tarovi kemuni mada me keirau vakarautaka e dua na kemuni luve ni me.”

¹⁶ A sa kaya vei Manoa na agilosi i Jiova, “Kevaka ko sa tarovi au, ka'u na sega ni kania na kakana ko vakarautaka, ia kevaka ko sa cakava e dua nai soro kama, mo vakacabora ga vei Jiova.” (Ni sa sega ni kila ko Manoa ni sai koya na agilosi i Jiova.)

¹⁷ A sa kaya vua na agilosi i Jiova ko Manoa, “Ko cei na yacamuni, me keirau na vakarokoroko vei kemuni, ni sa yaco na nomuni vosa?”

¹⁸ A sa kaya vei koya na agilosi i Jiova, “A cava ko sa taroga kina na yacaqu? Sa rui veivakurabuitaki.”

¹⁹ A sa kauta ko Manoa na luve ni me kei nai madrali laukana, ka vakacabora vei Jiova e na dela ni vatu, ki vei koya sa daucakava na ka veivakurabuitaki, ka rau sa vakaraica matua ko Manoa kei na watina.

²⁰ Ka ni sa lako cake tiko na yameyame ni bukawaqa mai nai cabocabo-ni-soro vaka ki lomalagi, sa qai lako cake na agilosi i Jiova e na yameyame ni bukawaqa mai nai cabocabo-ni-soro. A sa raica ko Manoa kei na watina, ka rau sa cuva vakatoboicu ki na qele.

²¹ A sa sega ni rairai tale mai na agilosi i Jiova vei Manoa se vua na watina. Sa qai kila ko Manoa ni sai koya na agilosi i Jiova.

²² A sa kaya vua na watina ko Manoa, “E daru na mate vakaidina, ni daru sa raica na Kalou.”

²³ Ia sa kaya vua na watina, “Kevaka sa via vakamatei kedaru ko Jiova, ke sa sega ni vakadonuya na nodaru i soro kama, kei nai madrali laukana, ka sa sega ni vakatakila vei kedaru na ka kecega oqo, ka sega ni tukuna mai vei kedaru edaidai na ka vakaoqo.”

²⁴ A sa vakasucuma na gonetagane na yalewa, ka vakatoka na yacana ko Samisoni. A sa tubu cake na gone, ka sa vakalougatataki koya ko Jiova.

²⁵ A sa vakatekivu me vakauqeti koya na Yalo i Jiova mai Meene-tani, e na maliwa i Sora kei Esitaoli.