Cakacaka 4 - Ai Vola Tabu (Vakadewa Makawa Vakavoutaki 2021)

Ko Pita kei Joni ena Matadra na Lewe ni Matabose

¹ Ia ni rau sa vosa tiko vei ira na tamata, sa lako mai vei rau ko ira na bete, kei na turaga ni vale-ni-soro, kei ira nai tokani i Setoki,

² ni ra sa cudru ni rau sa vakavulici ira na tamata, ka vunautaka na tucake tale mai na mate e na vuku i Jisu.

³ A ra sa tauri rau, ka biuta ki na valeniveivesu me mataka mada; ni sa qai yakavi.

⁴ Ia ka lewe vuqa era sa rogoca na vunau, era sa vakabauta; ia na kedrai wiliwili na tagane sa le lima beka na udolu.

⁵ Ia ni sa mataka, era sa soqoni vata mai Jerusalemi ko ira na nodra turaga, kei ira na qase, kei ira na vunivola,

⁶ kei Anasa na bete levu, kei Kaiafa, kei Joni, kei Alekisada, kei ira kecega na lewe ni vuvale ni bete levu.

⁷ Ia ni ra sa vakaturi rau e na kedra maliwa, era sa taroga, “A kaukauwa cava, se na yaca i cei, drau sa cakava kina na ka oqo?”

⁸ Sa qai sinai ko Pita e na Yalo Tabu, a sa kaya vei ira, “Oi kemuni na nodra turaga na tamata, kei na nodra qase na Isireli,

⁹ kevaka keirau sa tarogi e na siga edaidai e na cakacaka vinaka vua na tamata lokiloki, se cava sa qai bula kina,

¹⁰ mo ni kila kecega kei ira kecega na Isireli ni sa yaca i Jisu Karisito na kai Nasareci, ko koya kemuni a vakota ki na kauveilatai, ko koya sa vakatura cake tale na Kalou mai na mate, io, e na vukuna ga sa tu kina eke ko koya oqo e na matamuni ka sa bula vinaka.

¹¹ O koya ‘na vatu kemuni a cata sara koi kemuni na matai ni vale, ko ya sa yaco me kenai vakadei ni yavu e na tutu ni vale.’

¹² Sa sega na bula e na vukuna e dua tale, ni sa sega sara e dua tale na yaca e ruku i lomalagi sa soli kivei ira na tamata, me da bula rawa kina.”

¹³ Ia ni ra sa raica na nodrau doudou ko Pita kei Joni, ni ra sa kila talega erau sa sega so ni vuku, se tamata vuli, era sa kurabui kina; a ra sa qai vakasami rau, ni ratou a dautiko vata kei Jisu.

¹⁴ Ia ni ra sa raica na tamata ka vakabulai, ni sa wavu tu vata kei rau, era sa sega ni vakatitiqataka rawa.

¹⁵ Ia ni ra sa vakatalai rau me rau lako tani e na vale ni veibose, era sa qai bose vakai ira,

¹⁶ ka kaya, “A cava me da kitaka vei rau na tamata oqo? Ni ra sa kila ko ira kecega sa tiko e Jerusalemi, ni sa dua na cakacaka-mana rogo erau sa cakava; ia eda sa sega ni vakatitiqataka rawa.

¹⁷ Ia de tukuni vakalevu vei ira na tamata, me da kaya ga, me rau cudruvi sara kevaka erau vakavuvuli tale vua e dua na tamata e na yaca oqo.”

¹⁸ A ra sa kacivi rau, ka vakarota vei rau me rau kakua sara ni vosa se vakatavuvuli e na yaca i Jisu.

¹⁹ Sa qai vosa ko Pita kei Joni, a rau sa kaya vei ira, “Mo ni lewa ga se sa dodonu se segai e na mata ni Kalou me keirau vakarorogo vei kemuni ka kua vua na Kalou;

²⁰ ni sa dredre vei keirau me keirau kua ni tukuna na veika keirau a raica ka rogoca.”

²¹ Ia ni ra sa sega ni kunea e dua na ka me rau cudruvi kina, era sa vosa vakacudrucudruya tale vei rau, a ra sa qai sereki rau me rau lako, e na vukudra na tamata ni ra sa vakarokorokotaka na Kalou ko ira kecega e na vuku ni ka sa qai caka.

²² Ni sa vasagavulu vakacaca na nona yabaki ko koya na tamata sa caka vua na cakacaka-mana oqo ka bula kina.

Masulaka ko Ira sa Vakabauta me Soli Vei Ira na Yalodoudou

²³ Ia ni rau sa sereki, erau sa lako vei ira na nodrau i tokani, ka tukuna na ka kecega era a vosataka vei rau ko ira na bete levu kei ira na qase.

²⁴ Ia ni ra sa rogoca, era sa lomavata ka tabalaka cake na domodra vua na Kalou, ka kaya, “Kemuni na Turaga, koi kemuni na Kalou, ko ni a buli lomalagi, kei vuravura, kei na waitui, kei na ka kecega sa tu kina,

²⁵ e na gusu i Tevita na nomuni dauveiqaravi, ko ni a kaya: ‘Sa daucudru na veimatanitu e na vuku ni cava, ka sa vakananuma na ka wale ko ira na lewe ni veivanua?

²⁶ Era sa tuvai valu na tui kei vuravura, a ra sa soqoni vata ko ira na turaga me ra veivala kei Jiova, kei na nona Karisito.’

²⁷ Ni sa dina, era sa soqoni vata e na koro oqo me ra veisaqasaqa kaya na Luvemuni yalosavasava ko Jisu, ko koya ko ni a lumuta, koi rau ko Eroti kei Ponitio Pailato, kei ira na veimatanitu, kei ira na Isireli,

²⁸ me ra kitaka kecega na ka ko ni a lesia eliu me caka, me vaka na nomuni kaukauwa kei na nomuni naki.

²⁹ Ia oqo, Kemuni na Turaga, mo ni raica na nodra vosa vakacudrucudruya, ka solia kivei ira na nomuni tamata dauveiqaravi, me ra doudou vakalevu ni ra tukuna na nomuni vosa,

³⁰ ni kemuni sa dodoka tiko na ligamuni me ia na veivakabulai, me caka talega nai vakatakilakila eso kei na ka e veivakurabuitaki, e na yaca ni Luvemuni yalosavasava ko Jisu.”

³¹ Ia ni ra sa masu oti, sa vakayavalati na vale era sa soqoni vata kina; a ra sa dui vakasinaiti kecega e na Yalo Tabu, a ra sa doudou kina ni ra sa tukuna na vosa ni Kalou.

Era Wasea na Veika Era Taukena ko Ira sa Vakabauta

³² Ia ko ira na lewe vuqa era sa vakabauta, era sa lomavata ka yalovata; a sa sega e dua e kaya me nona duaduaga na ka sa tu vua; a ra sa taukena vata na nona i yau yadua.

³³ A sa levu na nodra kaukauwa nai apositolo, ni ra sa tukuna sa tucake tale mai na mate na Turaga ko Jisu, ka sa vinakati vakalevu ko ira kecega.

³⁴ Ni sa sega e dua vei ira sa dravudravua; ko ira kecega sa taukena na vanua se na veivale, era sa volitaka ka ra sa kauta nai voli ni ka era sa volitaka.

³⁵ A ra sa tauca ki na yavadra nai apositolo, ka sa votai vei ira kecega me vaka na nodra dui dravudravua.

³⁶ Ko Josefa talega, ko koya era sa vakatoka ko ira nai apositolo me Panapasa (a kenai balebale, “A luve ni veivakayaloqaqataki”), a luve i Livai, a kai Saipurusi,

³⁷ ko koya sa taukena e dua na tiki ni vanua, sa volitaka, ka kauta na kenai voli, ka tauca ki na yavadra nai apositolo.