Cakacaka 27 - Ai Vola Tabu (Vakadewa Makawa Vakavoutaki 2021)

Sa Soko ki Roma ko Paula

¹ Ia ni sa lewai oti me keitou soko ki Itali, era sa soli Paula, ka so tale na tamata sa vesu, vua e dua na turaga ni mata sotia nei Akusito, na yacana ko Juliasi.

² Ia ni keimami sa vodoka e dua na waqa ni Atiramitio, keimami sa vakarewa, ka nakita me keimami soko ravita na baravi kei Esia; a sa dua na kai Masitonia mai Cesalonaika, o Arisitako, sa lako kei keimami.

³ Ia e na mataka keimami sa uru ki Saitoni. A sa lomavinaka vei Paula ko Juliasi, a sa sereki koya me lako vei ira na wekana me vakacegui kina.

⁴ Keimami sa qai soko tani yani eke, ka soko raviti Saipurusi, ni sa ca na cagi.

⁵ Ia keimami sa sokota na wasawasa kei Silisia kei Pamifilia, ka yaco sara ki Maira mai Lisia.

⁶ A sa kunea kina na turaga-ni-valu e dua na waqa ni Alekisadria, sa soko ki Itali; a sa vakavodoki keimami kina.

⁷ Ia ni keimami sa soko malua ga ka bogi vuqa, ka yaco vakadredre me donui Nito, ni sa tarovi keimami na cagi, keimami sa soko raviti Kiriti, ka donui Salimoni;

⁸ a sa vo vakalailai me dredre ni sivia, keimami sa yacova e dua na yasana na yacana na Toba Vinaka; a sa voleka kina e dua na koro ko Lasea.

⁹ Ia ni sa qai bogi vuqa, a sa mani dredre na soko, ka ni sa qai oti na gauna ni Lolo, sa qai vakasalataki ira ko Paula,

¹⁰ ka kaya vei ira, “Oi kemuni na turaga, au sa kila ena levu na ka e ca kei na ka eda na biuta e na soko oqo, ena sega ni ca walega nai usana kei na waqa, oi keda talega.”

¹¹ Ia na turaga-ni-valu sa vakabauti rau na turaga ni waqa kei na kenai taukei, ka segai na veika sa kaya ko Paula.

¹² Ia ni sa sega ni vinaka na toba ko ya me kele kina e na vula i liliwa, era sa lewe vuqa vei ira sa lewa me ra soko tani yani, ni ra nanuma de sa rawa ki Finiki, me ra kele kina e na vula i liliwa; ko ya na toba ki Kiriti, a sa donuya na ceva-i-ra kei na vua-i-ra.

Na Cava e Loma ni Wasawasa

¹³ Ni sa qai liwa vakamalua na ceva, era sa vakasama ni ra sa rawata na ka era a nakita, era sa cavui kelekele, ka soko raviti Kiriti.

¹⁴ A sa sega mada ni dede, sa qai laba na cava levu, a yacana ko Urokilitoni.

¹⁵ Ia ni sa lebuka na laca ni waqa, ka sega kina ni tau rawa ki na mata ni cagi, keimami sa laiva ga me savu yani.

¹⁶ A sa savu kina ka volekata e dua na yanuyanu na yacana ko Kilota, a sa vo vakalailai sara me keimami sega ni rawata na velovelo.

¹⁷ Ni ra sa vakarewataka cake mai oqo, era sa cakava nai vakatukuwalu, a ra sa vakatukuwalutaka kina na waqa; ia ni ra sa rere de ra kasa ki na nuku, era sa sereka na gacagaca, ka savu yani.

¹⁸ Ia ni keimami sa suaigelegele vakalevu sara e na cava, e na mataka era sa biuta nai usana,

¹⁹ ia e na bogi tolu keimami sa biuta ki wai na gacagaca ni waqa e na ligaimami.

²⁰ Ni sa qai bogi vuqa ka sega ni rairai na mata-ni-siga se na veikalokalo, a sa laba na cava levu, sa qai takali sara vei keimami na nuitaka na bula.

Sa Vosa ko Paula Vei Ira na Kaiwaqa

²¹ Ia ni sa dede na nodra sega ni kana, sa tucake ko Paula e na kedra maliwa, ka kaya, “Oi kemuni na turaga, sa dodonu mo ni vakarogoci au eliu, ka kakua ni cavui kelekele mai Kiriti, sa yaco kina na ca oqo kei na veika sa vakayali.

²² Ia oqo, au sa masuti kemuni mo ni kua ni yalolailai, ni sa sega e dua vei kemuni ena yali na nona bula, ena ca ga na waqa.

²³ Ni sa tu voleka vei au e na bogi oqo e dua na agilosi ni Kalou, o koya ka’u sa nona, o koya talega ka’u sa qarava,

²⁴ a sa kaya, ‘Kakua ni rere, Paula; o na kau ga kivei Sisa; ka raica, sa soli ira kecega vei iko na Kalou o ira dou sa soko vata.’

²⁵ O koya oqo, koi kemuni na turaga, mo ni tiko vakacegu, ni’u sa vakabauta na Kalou, ni na yaco ga na ka me vaka sa tukuni mai vei au.

²⁶ Ia sa da na biu ga ki na dua na yanuyanu.”

Era sa Via Dro na Kaimua

²⁷ Ia ni sa yaco mai nai katinikava ni bogi, ni keitou sa veisavuyaki tiko e na wasawasa ko Atiria, ni sa lomaloma ni bogi era sa nanuma na lewe ni waqa era sa volekata e dua na vanua;

²⁸ a ra sa vakarautaka na wai, a ra sa kila sa katu ruasagavulu; ia ni ra sa savu yani vakalailai, ka vakarautaka tale na wai, era sa kila sa katu tinikalima.

²⁹ Ia ni ra sa rere de keimami kasa ki na veivatu, era sa biuta nai kelekele e va mai na mua ni waqa e muri, ka masulaka me siga na vanua.

³⁰ Ia ni ra sa vakarau me dro tani mai na waqa ko ira na kai mua, ni ra sa tukuca na velovelo ki wai, me vaka era sa ia me biuta nai kelekele mai na mua ki liu,

³¹ sa kaya ko Paula vua na turaga-ni-valu, vei ira talega na sotia, “Kevaka era na sega ni tiko ga e na waqa ko ira oqo, kemuni na sega ni bula rawa.”

³² Era sa qai seledrutia nai noka ni velovelo ko ira na sotia, a ra sa biuta me ciri yani.

³³ Ia ni sa voleka mai na siga, sa cikevi ira kecega ko Paula me ra kana, ka kaya, “Oqo na kenai katinikava ni bogi kemuni sa wawa voli ga ka lolo, ka sega ni kania e dua na ka.

³⁴ O koya oqo ka’u sa masuti kemuni kina mo ni kana mada, e na yaga mo ni bula kina. Ni sa sega ni dua vei kemuni ena lutu mai e dua na drau ni uluna.”

³⁵ Ia ni sa vosa oti vakaoqo, sa taura na madrai; a sa vakavinavinaka vua na Kalou e na matadra kecega, ia ni sa dovia, sa vakatekivu me kana.

³⁶ A ra sa qai vakacegui kecega, ka ra kana talega ko ira.

³⁷ Ia koi keimami kecega sa tiko e waqa keimami sa le rua na drau ka vitusagavulu ka ono.

³⁸ Ia ni ra sa kana oti ka mamau, era sa vakamamadataka na waqa, ka biuta na sila ki wai.

Voca na Waqa

³⁹ Ni sa qai siga mai, era sa sega ni kila na vanua, ia era sa kunea e dua na toba sa vakamatasawa, a ra sa bosea me ra vakasa kina na waqa, kevaka e rawa.

⁴⁰ Era sa qai musuka laivi nai kelekele ni waqa ka ra biuta tu yani ki wai, ka sereka nai noka ni uli, ka vakarewataka na laca levu ki na cagi, ka sasaga yani ki matasawa.

⁴¹ A ra sa ciri ki na vanua e sota vata kina e rua na kui ni wai, ka ra sa vakasa na waqa. A sa coba sara na mua ni waqa ki liu, ka sega ni yavala rawa, a sa kasere na mua ni waqa e muri e na kaukauwa ni biau.

⁴² A ra sa bose ko ira na sotia me ra vakamatei ira na tamata era sa vesu tu, de ra qalo dro eso, ka bula.

⁴³ Ia sa vinakata na turaga-ni-valu me vakabulai Paula, ka sa tarovi ira kina mai na ka era sa nanuma. A sa kaya me rika eliu ko ira sa qalo rawa; me ra liu ki vanua,

⁴⁴ ka qai muri ko ira na kena vo, ka so vei ira e na papa eso, ka so tale e na tikitiki ni waqa. A sa vakaoqo, ka ra sa cabe bula kecega ki vanua.