Cakacaka 26 - Ai Vola Tabu (Vakadewa Makawa Vakavoutaki 2021)

Sa Taqomaki Koya ko Paula ena Mata i Akariva

¹ Sa qai kaya vei Paula ko Akariva, “Sa qai tara mo vakatusai iko mai.” Sa qai dodoka na ligana ko Paula, ka tukuni koya:

² “Au sa nanuma ni’u sa kalougata, kemuni Akariva na tui, ni’u na tukuni au edaidai e matamuni e na vuku ni ka kecega era sa beitaki au kina na Jiu,

³ ni kemuni sa kila kecega na nodra i valavala na Jiu kei na veika era sa dauveiletitaka. O koya oqo ka’u sa masuti kemuni kina mo ni vosota mada ga ka mo ni rogoci au.

⁴ “A noqu i valavala ni’u a gone ka yacova na siga oqo, ni’u a tiko kei ira na kai noqu mai Jerusalemi, era sa kila kecega na Jiu.

⁵ Era sa kilai au vakabalavu sara, ka rawa ni ra vakadinadinataka ke ra vinakata, ni’u sai valavala vaka-Farisi me vakataki ira era sa dau muria vakamatailalai sara na neimami lotu.

⁶ Au sa qai tu talega me’u lewai e na vuku ni ka’u sa vakanuinuitaka na vosa ni yalayala ka solia na Kalou kivei ira na neimami qase,

⁷ ka sai koya na ka oqo era sa nuitaka me ra rawata ko ira na neimami yavusa e tinikarua, era dausoro vagumatua e na siga kei na bogi. Ia e na vuku ni nuinui oqo, i Akariva na tui, era sa beitaki au kina ko ira na Jiu.

⁸ E vakaevei, dou sa nanuma beka ni sa ka e dauveivakatitiqataki, me vakaturi ira cake tale na mate na Kalou?

⁹ “Oi au talega, ka’u a nanuma e lomaqu ni sa dodonu me’u veimecaki e na ka e vuqa kei na yaca i Jisu na kai Nasareci.

¹⁰ Ia na ka talega oqo ka’u a kitaka mai Jerusalemi. A ra lewe vuqa era sa lotu ka’u a sogolati ira e na veivale ni veivesu, ni ra sa lesi au kina na bete levu; ia ni ra sa vakamatei, au sa tokona me vakakina.

¹¹ Ia ka’u a cudruvi ira vakavuqa e na veivalenilotu kecega, ka vakasaurarataki ira me ra biuta na lotu; ia ni’u sa cudru vakalevu sara vei ira, au a vakacacani ira talega e na veikoro tani.

Sa Tukuna ko Paula na Nona Veisau

¹² “Ia ni ka’u a lako tiko kina ki Tamasiko ni ra a lesi au ka talai au na bete levu,

¹³ ni sa siga levu toka ga, kemuni na tui, au a raica e na sala e dua na rarama mai lomalagi, sa uasivia na kena remoremo na mata-ni-siga, a sa cila vakavolivoliti au kei ira talega era lako vata kei au.

¹⁴ Ia ni keitou sa bale kecega ki na qele, au sa rogoca e dua na domo sa vosa vei au e na vosa vaka-Iperiu, ka kaya, ‘I Saula, i Saula, o sa vakacacani au e na vuku ni cava? E ca vei iko mo caqeta na mata ni moto.’

¹⁵ Au sa qai kaya, O cei koi kemuni, na Turaga? A sa kaya na Turaga, ‘Oi au ko Jisu, o koya ko sa vakacacana.

¹⁶ Ia mo duri cake ga, ka tu e yavamu; ni’u sa rairai vei iko e na vuku ni ka oqo, me’u lesi iko mo noqu tamata ka mo dautukuna na veika ko sa raica vei au kei na veika ka’u na rairai kina vei iko.

¹⁷ Ni’u na vakabulai iko mai vei ira na tamata na Isireli, kei ira na veimatanitu tani—ko ira ka’u sa qai talai iko kina

¹⁸ mo laki dolava na matadra, me ra saumaki mai na butobuto ki na rarama, mai na kaukauwa talega nei Setani ki vua na Kalou, me ra ciqoma kina na veivosoti ni valavala ca, me ra i taukei vata talega e muri kei ira era sa yalosavasava, ni ra sa vakabauti au.’

Sa Tukuna ko Paula na Nona Cakacaka

¹⁹ “Ia ni sa oti oqo, i Akariva na tui, au sa sega ni talaidredre ki na raivotu vakalomalagi.

²⁰ Ia ka’u sa tukuna mada eliu vei ira mai Tamasiko, kei Jerusalemi, kei na yasayasa kece vaka-Jutia, vei ira talega na veimatanitu tani, me ra veivutuni ka saumaki mai ki vua na Kalou, ka kitaka nai valavala e kilikili kei na veivutuni.

²¹ O koya oqo era sa tauri au kina na Jiu e na vale-ni-soro, ka segata me ra vakamatei au.

²² Ia ni sa vukei au na Kalou, au sa bula kina ka yacova na siga oqo, ia ka’u sa tukuna tiko vei ira era lalai kei ira talega era lelevu, ka sa sega na ka tani ka’u sa kaya ko ya ga era a tukuna na parofita kei Mosese ena yaco mai:

²³ ni na mate na Karisito, ni na kedrai matai era na tucake tale mai na mate, ka na vakatakila na rarama vei ira na tamata na Isireli, vei ira talega na veimatanitu tani.”

Na Ka e qai Yaco ena Vuku ni Vosa i Paula

²⁴ Ia ni sa tukuni koya tiko vakaoqo ko koya, sa vosa e na domo levu ko Fesito, ka kaya, “I Paula, o sa lialia! Sa vakaleqai iko na levu ni ka ko sa vulica!”

²⁵ A sa kaya ko koya, “I Fesito, na turaga dokai, au sa sega ni lialia, ia au sa cavuta ga na vosa dina ka dodonu.

²⁶ Ni sa kila na veika oqo na tui, ia ka’u sa vosa doudou kina vua; ni’u sa kila e sega ni vuni vei koya e dua na ka oqo, ni sa sega ni caka na ka e na dua na yasana vuni.

²⁷ I Akariva na tui, o ni sa vakadinati ira na parofita, se segai? Au sa kila kemuni sa vakadinata ga”.

²⁸ Sa qai kaya vei Paula ko Akariva, “Sa vo vakalailai mo rawai au me’u lotu va-Karisito.”

²⁹ Sa qai kaya ko Paula, “Ke mani totolo se sega, sa noqu masu ga vua na Kalou, e segai e na vukumu duaduaga, e na vukudra kece talega era sa rogoci au edaidai, mo dou vakataki au—ka vakavo ga na sinucodo oqo.”

³⁰ Sa qai tucake na tui, kei na kovana, kei Verenaisi, kei ira era sa tiko vata kei iratou;

³¹ ia ni ra sa lako vakatikitiki tani, era sa veivosaki vakai ira, ka kaya, “A tamata oqo sa sega ni kitaka e dua na ka sa dodonu me mate kina se me vesu kina.”

³² Sa qai kaya vei Fesito ko Akariva, “Na tamata oqo kevaka sa sega ni cavuti Sisa me lewai koya, e dodonu ga me a sereki.”