Cakacaka 24 - Ai Vola Tabu (Vakadewa Makawa Vakavoutaki 2021)

Era sa Beitaki Paula na Jiu

¹ Sa bogi lima sa qai lako sobu ko Ananaiasa na bete levu kei ira na qase, ka dua na tamata sa vuku e na vosa, ko Teritulu, era sa beitaki Paula vua na turaga.

² Ia ni sa kacivi mai ko koya, sa vakatekivu ko Teritulu me beitaka, ka kaya, “Keitou sa vakacegu vakalevu e na vukumuni, a sa yaco me vinaka na matanitu oqo e na nomuni lewa vakavuku,

³ keitou sa vakavinavinaka kina e na veisiga kecega kei na veiyasana kecega, i'saka Vilikesa na turaga, ni keitou sa rekitaka.

⁴ Ia de balavu walega vei kemuni na noqu vosa, au masuti kemuni mo ni yalovinaka mo ni rogoci keitou mada vakalailai.

⁵ Ni keitou sa kunea na tamata la oqo e dauveivakacalai, a sa dauvakatubu ca ko koya vei ira kecega na Jiu e vuravura, ka nodra i liuliu nai tokani ni kai Nasareci.

⁶ Ka sa ia me vakacacana talega na vale-ni-soro, ka keitou a vesuka, ka via veilewaitaka me vaka na neitou vunau.

⁷ Ia ko Laisiasa na turaga levu ni valu sa lako vakaukauwa mai, ka kaliraka mai na liga i keitou,

⁸ a sa vosa vei ira era sa beitaki koya me ra lako mai vei kemuni. Ia ni kemuni sa tarogi koya, ko ni na kila rawa na ka kecega keitou sa beitaka vua.”

⁹ A ra sa veitokoni kina ko ira na Jiu, ka kaya sa dina na veika oqo.

Nai Vakamacala i Paula vei Vilikesa

¹⁰ Ia ni sa deguvacu na turaga vei Paula me vosa, sa qai kaya ko koya, “Ni’u sa kila sa vuqa na yabaki ko ni sa turaganilewa kina e na vanua oqo, au sa vinakata vakalevu me’u tukuni au.

¹¹ O ni sa kila, sa qai oti walega e tinikarua na bogi ni ka’u a lako cake kina ki Jerusalemi me’u laki sokalou.

¹² A ra sa sega ni kunei au ni keirau sa veileti kaya e dua e na vale-ni-soro, se ni’u sa vakatubu ca vei ira na lewe vuqa, sa sega ga e na veivalenilotu, se e na koro;

¹³ a ra sa sega talega ni vakatakila rawa ni sa dina na veika era sa beitaki au kina.

¹⁴ Ia na ka oqo ka’u sa vakatusa vei kemuni, ni sa vu talega mai na Sala—o koya era sa kaya ni vakabauta vakatani—ka'u sa qarava vakakina na nodra Kalou na noda qase, ka vakadinata na ka kecega sa volai e na vunau kei ira na parofita.

¹⁵ Au sa vakanuinui vua na Kalou—na vakanuinui era sa nuitaka talega ko ira oqo—ni na tucake tale ko ira na mate vei ira na yalododonu kei ira na sega ni yalododonu.

¹⁶ A ka oqo ka’u sa gumatua kina me kakua ni dua na siga me cala kina na lewa-ni-lomaqu vua na Kalou se vei ira na tamata.

¹⁷ Ia ni sa oti e vuqa na yabaki, ka’u a lako mai me’u kauta na ka-ni-loloma ki na noqu vanua, kei nai madrali eso.

¹⁸ Ni'u se cakava tiko oqo, era sa kunei au ni’u sa vakasavasavataki e na vale-ni-soro, ka keitou sa sega ni lewe vuqa se me dua na maue.

¹⁹ Ia ka sa tiko eso na Jiu mai Esia—e dodonu talega me ra mai tu ka veibeitaki e matamuni eke, kevaka era sa kila e dua na ka ca vei au.

²⁰ Se me ra tukuna ko ira oqo, kevaka era sa kunea e dua na ka ca vei au, ni’u sa tu e na matadra na mataveilewai,

²¹ ka vakavo ga na ka e dua bauga oqo ka'u a kacivaka yani ni’u sa tu e na kedra maliwa, ‘E na vuku ni nodra tucake tale na mate ka dou sa vakatarogi au kina e na siga oqo.’ ”

Ena qai Tau Malua na Lewa Baleti Paula

²² Ia ko Vilikesa, ni sa kila vinaka na veika me baleta na Sala, sa vakasukai ira, ka sa kaya, “Ni sa lako sobu mai ko Laisiasa na komada, ka’u na qai lewa na ka dou sa veiletitaka.”

²³ A sa qai vosa ko koya vua e dua na turaga-ni-valu me vakatawai Paula, me laiva ga me lako voli, ka me kakua ni vakatabuya e dua na wekana sa qaravi koya, se lako mai vua.

Ko Paula ena Mata i Vilikesa kei Tarusila

²⁴ Ia ni sa bogi vica, sa lako mai ko Vilikesa kei na watina ko Tarusila, na yalewa ni Jutia, ka sa talaki me lako mai ko Paula, ka sa vakarogoci koya ni sa vakamacala me baleta na vakabauti Karisito Jisu.

²⁵ Ia ni sa vakamacalataka tiko ko koya nai valavala dodonu, nai valavala malua, kei na veilewai sa bera mai, sa sautaninini ko Vilikesa, ka kaya, “Mo lako tani mada oqo. Ke dua noqu gauna galala, ka’u na kacivi iko mai.”

²⁶ A sa nuitaka talega ni na soli lavo vua ko Paula, o koya oqo sa talatala vakavuqa kina, me rau veivosaki kaya.

²⁷ Ia ni sa oti e rua na yabaki, sa lako mai ko Porisiu Fesito mei sosomi kei Vilikesa; ka ni sa vinakata ko Vilikesa me vakayalovinakataki ira na Jiu vua, sa biuti Paula me vesu tu ga.