Cakacaka 23 - Ai Vola Tabu (Vakadewa Makawa Vakavoutaki 2021)

Na Vosa i Paula vei Ira na Lewe ni Matabose

¹ A sa vakaraici ira matua na mataveilewai ko Paula, ka kaya, “Oi kemuni na veiwekani, au sa muria tiko ka yacova na siga oqo na ka ka’u a nanuma sa dodonu e na mata ni Kalou.”

² A sa kaya ko Ananaiasa na bete levu vei ira sa tu voleka vua me ra sabilaka na gusuna.

³ Ena ka oqo sa kaya kina vua ko Paula, “Ena sabilaki iko na Kalou, o iko na lalaga boro vulavula! Ko sa dabe tiko ekeri mo lewai au me vaka na vunau, ia ko sa qai kaya tale me’u sabilaki, ka sa sega ni vaka na vunau?”

⁴ Sa qai tukuna ko ira sa tu voleka, “O cei o iko mo vosavakacacataka na bete levu ni Kalou?”

⁵ Sa qai kaya ko Paula, “Au sa sega ni kila, koi kemuni na veiwekani, ni sa bete levu ko koya; ni sa volai, ‘Mo kakua ni vosavakacacataka e dua sa veiliutaki vei ira na kai nomu.’ ”

Era Veileti na Farisi kei Ira nai Tokani i Setoki

⁶ Ia ni sa kunea ko Paula ni sai tokani i Setoki eso vei ira, ka so tale era Farisi, sa kaci ko koya e na matadra na mataveilewai, “Oi kemuni na veiwekani koi au na Farisi, a luve ni Farisi. E na vuku ni’u sa vakadinata ni na tucake tale na mate ka’u sa tarogi kina.”

⁷ Ia ni sa vosa oti vakaoqo ko koya, sa tubu na veileti vei ira na Farisi, kei ira nai tokani i Setoki; a sa tawase rua kina na lewe vuqa.

⁸ Ni sa dau kaya ko ira nai tokani i Setoki sa sega na tucake tale mai na mate, se agilosi, se yalo; a sa dau kaya ko ira na Farisi sa dina ruarua.

⁹ A sa levu na qoqolou, a sa qai tucake ko ira na vunivola era nodra i tokani na Farisi; a ra sa gumatua, ka kaya, “Keitou sa sega ni kunea e dua na ka ca vua na tamata oqo; ia ka vakaevei kevaka sa vosa vua e dua na agilosi se na yalo?”

¹⁰ Ni sa qai tubu na veileti levu, sa rere na komada, de ra basuraki Paula, a sa vosa vei ira na sotia, me ra lako sobu me ra kaliraka vakaukauwa mai vei ira, ka me ra kauta ki na bure ni valu.

¹¹ Ia e na bogi sa muri sa tu voleka vua ko koya na Turaga, ka kaya, “Mo yalo vakacegu ga, Paula! Ni sa kilikili mo tukuni au mai Roma talega, me vaka ko sa tukuni au e Jerusalemi.”

Bukivere me Vakamatei ko Paula

¹² Ia ni sa siga mai, sa bukivere ko ira na Jiu eso, a ra sa veivakadreti e na bubului, ka kaya me ra kakua ni kana se gunu me rawa mada na nodra vakamatei Paula.

¹³ A ra sa lewe vasagavulu vakacaca era sa bukia na vere oqo.

¹⁴ A ra sa lako mai vei ira na bete levu kei ira na qase, ka kaya, “Keitou sa veivakadreti e na bubului levu, me keitou kakua ni kania e dua na ka, me sa rawa mada na neitou vakamatei Paula.

¹⁵ Ia koi kemudou kei ira talega na mataveilewai, dou tukuna vua na komada me kauti koya sobu mai vei kemudou, me vaka dou sa via taroga vakadodonu e na vukuna. Ia koi keitou, ni se bera ni yaco ko koya, keitou sa vakarau tu me vakamatea.”

¹⁶ Ia sa rogoca na vere oqo na luvena-tagane na gane i Paula, ka sa lako ka curu ki na bure ni valu, ka tukuna vei Paula.

¹⁷ Sa qai kaciva e dua vei ira na turaga-ni-valu ko Paula, ka kaya, “Kauta na cauravou oqo vua na komada; sa dua na ka sa tu vua me tukuna vei koya.”

¹⁸ Sa qai kauta me rau lako vua na komada, a sa kaya, “Sa kacivi au ko Paula na tamata ka vesu tu, ka kaya me’u kauta mai vei iko na cauravou oqo, ni sa dua na ka sa tu vua me tukuna vei iko.”

¹⁹ Sa qai taura na ligana na komada, a rau sa lako vakatikitiki vakai rau; a sa taroga, “A cava beka na ka sa tu vei iko ko sa via tukuna vei au?”

²⁰ Sa qai kaya ko koya, “Sa lomavata ko ira na Jiu me ra masuti iko mo kauti Paula sobu e na mataka vei ira na mataveilewai, me vaka ko sa via taroga vakadodonu eso na ka e na vukuna;

²¹ ia mo kakua ni vakarogoca na nodra vakamamasu; ni ra sa le vasagavulu vakacaca era sa lawavaka, a ra sa veivakadreti vakai ira e na bubului, me ra kakua ni kana se gunu me ra vakamatei koya mada eliu. A ra sa qai vakarau tu, a ra sa waraka ga mo yalataka vei ira.”

²² Sa qai vakalaiva na cauravou ko koya na komada me lako yani, ka sa vakarota, “Mo kakua ni tukuna vua e dua ni ko sa mai vakatakila vei au na ka oqo.”

Sa Kau o Paula ki Vua na Kovana o Vilikesa

²³ A sa kacivi rau e lewe rua na turaga-ni-valu ko koya, ka kaya, Vakarautaka na sotia e lewe rua na drau, kei na tamata e le vitusagavulu era vodo ose, kei na tamata e le rua na drau sa vakaiyaragi e na moto, me ra lako ki Sisaria e nai katolu ni tiki ni bogi;

²⁴ ka vakarautaka talega eso na ose, me vodo kina ko Paula, me kau vakavinaka ki Sisaria vei Vilikesa na kovana.”

²⁵ A sa vola nai vola ko koya ka vakaoqo:

²⁶ “Koi au ko Kilotiu Laisiasa vua na turaga vinaka sara ko Vilikesa, sa loloma!

²⁷ A tamata oqo era a taura na Jiu, a sa voleka ni ra vakamatea; au sa qai kauti ira na sotia, ka vakabulai koya, ni ka’u sa kila e kai Roma ko koya.

²⁸ Ia ni’u sa via kila se cava era sa beitaki koya kina, au sa kauta ki na nodra mataveilewai.

²⁹ Ia ka’u sa kunea ni sa beitaki ko koya e na ka eso e veiletitaki e na nodra vunau, ia ka sega na ka sa beitaki vua sa dodonu me mate kina se me vesu.

³⁰ Ia ni sa tukuni mai vei au era sa lawavaki koya ko ira na Jiu, au sa vakariri me’u vakatala yani vei iko au sa vosa talega vei ira era beitaka me ra tukuna e matamu na veika sa beitaki kina ko koya. Sa loloma yani.”

Sa Kau ko Paula ki Sisaria

³¹ Sa qai kauti Paula ko ira na sotia, me vaka sa vakaroti vei ira, a ra sa kauta e na bogi ki Adipatiri.

³² Ia e na mataka era sa biuti ira sa vodo ose me ra lako vata kaya, a ra sa lesu tale ki na bure ni valu.

³³ Ia ni sa yaco ki Sisaria ko ira oqori, era sa solia nai vola vua na turaga, ka vakaraitaki Paula talega vua.

³⁴ Ia ni sa wilika oti na turaga, sa taroga se ko cei na nona vanua. Ni sa qai kila sa kai Silisia,

³⁵ sa kaya, “Au na rogoci na ka me baleti iko ni ra sa yaco mai ko ira era sa beitaki iko.” A sa vakarota me yadravi e na vale ni veilewai nei Eroti.