Cakacaka 22 - Ai Vola Tabu (Vakadewa Makawa Vakavoutaki 2021)

¹ “Oi kemuni na veiwekani, kei na qase, ni vakarorogo mai ni ka’u sa tukuni au vei kemuni.”

² Ia ni ra sa rogoca sa vosa ko koya vei ira e na vosa vaka-Iperiu, era sa tiko lo sara. Sa qai kaya ko koya:

³ “Oi au e dua na Jiu, ka sucu mai Tarisu mai Silisia, ia ka’u a susugi cake e na koro oqo e na veivakatavulici nei Kamelieli, ka vulica na kena muri vakadodonu sara na nodra vunau na qase, ka’u sa gumatua e na vuku ni Kalou, ka me vakataki kemuni kecega e na siga oqo.

⁴ Au a vakacacani ira sa muria na Sala me ra mate, ni ka’u a vesuka ka biuta ki na valeniveivesu na tagane eso kei na yalewa eso.

⁵ Sa noqu i vakadinadina na bete levu kei ira kecega na qase, ni ka’u a taura na nodra i vola vei ira na veiwekani, ka lako ki Tamasiko, me’u vesuki ira era sa tiko kina ka kauti ira lesu mai ki Jerusalemi, me ra cudruvi.

Sa Tukuna ko Paula na Nona Veisau

⁶ “Ia sa yaco, ni ka’u sa lako yani, ka toro voleka ki Tamasiko e na siga levu tutu, sa dua na rarama levu sa cila vakasauri mai lomalagi ka vakavolivoliti au.

⁷ Au sa qai bale ki na qele, ka rogoca e dua na vosa sa kaya vei au, ‘I Saula, i Saula, ko sa vakacacani au e na vuku ni cava?’

⁸ Au sa qai taroga, ‘O cei beka koi kemuni, Turaga?’ A sa kaya vei au ko koya, ‘Oi au ko Jisu na kai Nasareci, ko koya ko sa vakacacana.’

⁹ A ra sa raica na rarama ko ira sa lako vata kei au, ia era sa sega ga ni rogoca na vosa i koya sa vosa mai vei au.

¹⁰ Au sa qai taroga, ‘A cava me’u kitaka, noqu Turaga?’ A sa kaya mai vei au na Turaga, ‘Mo tucake, ka lako ki Tamasiko; ena tukuni kina vei iko na ka kecega sa lesi vei iko mo kitaka.’

¹¹ Ia ni ka’u sa sega ni rai rawa e na vuku ni kena remoremo na rarama ko ya, era sa tuberi au ko ira sa lako vata kei au, ka’u sa yaco kina ki Tamasiko.

¹² “A sa dua na Ananaiasa, a tamata lotu dina me vaka na vunau, ka sa vosa vinakataki mai vei ira kecega na Jiu era sa tiko mai kina,

¹³ sa lako mai vei au; a sa tu e yasaqu, ka kaya vei au, ‘Na wekaqu Saula, mo rai vinaka tale!’ Ia, e na tiki-ni-siga ko ya, ka’u sa qai rai rawa tale ka raici koya.

¹⁴ A sa kaya ko koya, ‘Sa digitaki iko na nodra Kalou na noda qase mo kila na lomana, ka raici Koya na Yalododonu ka rogoca na vosa ni gusuna;

¹⁵ ni ko na dautukuni koya vei ira na tamata kecega e na ka ko sa raica ka rogoca.

¹⁶ Ko sa qai vakaberabera tale e na vuku ni cava? Tucake, mo papitaisotaki, ka vuya laivi na nomu i valavala ca, ka masuta na yaca ni Turaga.’

Sa Kacivi ko Paula me La'ki Vunau Vei Ira na Kai Matanitu Tani

¹⁷ “Ia ka yaco ni’u sa lesu tale mai ki Jerusalemi ka masu tiko e na vale-ni-soro, au a qai raica na raivotu,

¹⁸ ka'u a raici Jisu ni sa kaya vei au, ‘Kusa rawa mo lako tani e Jerusalemi, ni ra na sega ni vakabauta na nomu i tukutuku e na vukuqu.’

¹⁹ Au sa qai kaya, ‘Kemuni na Turaga, era sa kila ni ka’u a biuti ira ki na valeniveivesu era sa vakabauti kemuni ka vakanakuitataki ira e na valenilotu kecega.

²⁰ Ia ni sa vakadavei na dra kei Sitiveni ko koya ka dautukuni kemuni, au a tu voleka talega kina, ka vakadonuya na nona mate, ka maroroya na nodra i sulu era sa vakamatea.’

²¹ Sa qai kaya vei au ko koya, ‘Mo lako, ni ka’u na talai iko vakayawa vei ira na kai matanitu tani.’ ”

Na Ka e qai Yaco ena Vuku ni Vosa i Paula

²² Era sa vakarogoci koya ka yacova mada na vosa oqo, ka ra sa qai tabalaka cake na domodra, ka kaya, “Me kau tani e vuravura na mataqali tamata vakaoqo! Ni sa sega ni dodonu me bula.”

²³ Ia ni ra sa qoqolou tiko, ka cebuceburaka na nodra i sulu, ka kaburaka ki macawa na kuvu-ni-soso,

²⁴ a sa vakarota na komada me ra kauti koya ki na bure ni valu, ka sa kaya me tarogi ni sa vakanakuitataki, me kila ko koya se cava era sa qolouvaki koya kina vakaoqo.

²⁵ Ia ni ra sa vesuka tiko e na wa, sa taroga ko Paula vua na turaga-ni-valu sa tu kina, “E tara beka vei kemudou mo dou vakanakuitataka na kai Roma, ka sega mada ni lewai?”

²⁶ Ia ni sa rogoca na turaga-ni-valu ko ya, sa laki tukuna vua na komada, ka kaya, “Mo lewai iko vinaka e na ka ko kitaka? Ni sa kai Roma na tamata oqo.”

²⁷ Sa qai lako mai na komada, ka kaya vua, “Tukuna mai vei au, se ko sa kai Roma se segai.” Sa kaya ko koya, “Io.”

²⁸ Sa qai kaya na komada, “Sa ka levu nai lavo ka’u sa volia kina me’u lewe-ni-vanua.” A sa kaya ko Paula, “Ia ka’u sa lewe-ni-vanua e na noqu sucu.”

²⁹ Era sa qai lako tani sara ko ira sa lesi me ra tarogi koya; a sa rere talega na komada, ni sa kila e kai Roma ko koya, e na vuku talega ni nona vesuki koya.

Ko Paula ena Matadra na Lewe ni Matabose

³⁰ Ia e na mataka ni sa via kila ko koya na kena dina ni ka era sa beitaki koya kina ko ira na Jiu, sa sereka na kenai vesu ko koya, a sa kaya vei ira na bete levu kei na nodra mataveilewai kecega me ra lako mai. A sa qai kauti Paula sobu, ka vakatura e matadra.