Cakacaka 21 - Ai Vola Tabu (Vakadewa Makawa Vakavoutaki 2021)

Tekivu nai Lakolako i Paula ki Jerusalemi

¹ Ia ni keitou sa biuti ira, keitou sa vakarewa ka soko yani ki Kosa, ka vakadodonu ki Roti e na siga tarava, ka mai kea ki Patara.

² Ia ni keitou sa kunea e dua na waqa sa soko yani ki Finisia, keitou sa vodoka ka soko yani.

³ Ia ni keitou sa raici Saipurusi, keitou sa soko baleta e na neitou i mawi, ka keitou sa soko ki Siria, ka kele yani ki Taia, ni sa sobu kina nai usana ni waqa.

⁴ Ka keitou sa kunei ira na tisaipeli, ka sa tiko kina me bogi vitu. E na veiliutaki ni Yalo Tabu, era sa kaya vei Paula me kakua ni lako cake ko koya ki Jerusalemi.

⁵ Ia ni keitou sa vakaotia na veisiga ko ya, keitou a qai cavu tu ka lako yani; era sa mai veitalatala vei keitou ko ira kecega kei ira na watidra, kei ira na luvedra, ka yaco sara ki nai bili ni koro. E kea, keitou sa qai tekiduru e matasawa ka masu,

⁶ ka keitou sa veitataunaki. Keitou sa qai vodo ki waqa, ka ra sa suka tale ki nodratou.

⁷ Ia ni keitou sa soko mai Taia, keitou sa yaco ki Toleme, ka veikidavaki kei ira na veiwekani, ka tiko vata kei ira ka bogi dua.

⁸ E na mataka cake keitou sa lako yani koi keitou sa lako vata kei Paula, ka yaco ko Sisaria; ia keitou sa curu ki na vale i Filipe nai vakavuvuli, ko koya sa dua vei ira na lewe vitu, ka keitou sa tiko vata kaya.

⁹ A sa lewe va na luvena, eratou sa goneyalewa, a ratou sa dauparofisai.

¹⁰ Ia ni keitou sa bogi vuqa mai kea, sa lako sobu mai Jutia e dua na parofita, ko Akapo na yacana.

¹¹ Ia ni sa curu mai vei keitou ko koya, sa taura nai vau-ni-sulu nei Paula, a sa vesuka na ligana kei na yavana, ka kaya, “Sa vakaoqo na vosa ni Yalo Tabu, ‘Era na vesuka vakaoqo nai taukei ni vau-ni-sulu oqo ko ira na Jiu era sa tiko mai Jerusalemi, a ra na solia ki na ligadra era sa sega ni lotu.’ ”

¹² Ia ni keitou a rogoca na veika oqo, koi keitou kei ira talega nai taukei, keitou a vakamasuti koya me kakua ni lako cake ki Jerusalemi.

¹³ Sa qai kaya ko Paula, “A cava dou sa kitaka ni dou sa tagi ka vakadatuvutaka na lomaqu? Ni’u sa sega ni vakarau me’u vesu walega, me’u mate talega mai Jerusalemi e na vuku ni yaca ni Turaga ko Jisu.”

¹⁴ Ia ni sa bese ni vakarogoca ko koya, keitou sa kua soti, ka kaya, “Me yaco ga na nona lewa na Turaga.”

¹⁵ Ia ni sa oti na veisiga oqo, keitou sa vakasosolo na neitou veika, ka lako cake ki Jerusalemi.

¹⁶ Eso talega era sa lotu mai Sisaria, era sa lako vata kei keitou, a ra sa kauta e dua sa lotu makawa, ko Nasoni, na kai Saipurusi, me keitou moce e nona vale.

Sa Laki Sikovi Jemesa ko Paula

¹⁷ Ia ni keitou sa yaco ki Jerusalemi, era sa vakacegui keitou e na reki ko ira na veiwekani.

¹⁸ Ia ni mataka cake sa lako vata kei keitou ko Paula kei Jemesa; a ra sa tiko kina ko ira kecega na qase.

¹⁹ Ia ni sa veikidavaki kei ira ko koya sa qai tukuna yadua na ka kece ka cakava na Kalou e na kedra maliwa na veimatanitu e na nona vunau tiko.

²⁰ Ia ni ra sa rogoca, era sa vakavinavinaka vua na Kalou, a ra sa kaya vua, “O iko na wekai keitou, ko sa raica, era sa le vica na udolu na Jiu era sa vakabauta, ka ra sa gumatua kecega me ra muria na vunau.

²¹ Ia ka so sa tukuni iko vei ira, ni ko sa vakavulici ira kecega na Jiu, era sa tiko e na kedra maliwa na veimatanitu tani, me ra biuti Mosese, ni ko sa kaya me ra kakua ni cilivi ira na gone, se muria nai valavala eliu.

²² Ena vaka beka evei oqo? Ni ra na rogoca dina ko sa tadu mai.

²³ O koya mo qai kitaka na ka oqo keitou sa kaya vei iko. E le va na tamata sa tiko vata kei keitou, eratou sa vauci e na bubului.

²⁴ Mo kauti iratou, ka vakasavasavataki iko vata kei iratou, ka volia na nodratou i madrali, me ratou tasia na uludratou. Era na kila kecega kina ni sa sega ni dina na ka kecega ko sa tukuni kina vei ira, ka ni ko sa muria talega na vunau e na nomu i valavala.

²⁵ Ia e na vukudra na veimatanitu tani era sa vakabauta, eda sa vola oti kina ka lewa, me ra maroroi ira ga mai na ka sa cabo ki na veimatakau, mai na dra talega, kei na ka sa kuna, kei na veidauci.”

²⁶ Sa qai kauti iratou na tamata ko Paula, ia ni sa vakasavasavataki koya vata kei iratou e na mataka, sa curu ki na vale-ni-soro, me tukuna na siga ena oti kina na vakasavasavataki, ka me cabori nai madrali e na vukudratou yadua.

Sa Vesu ko Paula e Valenisoro

²⁷ Ia ni sa vakarau oti na bogi vitu, ni ra sa raici koya e na vale-ni-soro ko ira na Jiu mai Esia, era sa vakauqeti ira na tamata kecega, ka tauri koya,

²⁸ a ra sa qoqolou, “Oi kemudou na Isireli, dou veivuke mai! Ko koya oqo na tamata sa dauvakavulici ira na tamata kece, e na veiyasana kecega, me ra cati ira na kai noda, kei na vunau, kei na tikina oqo; a sa kauta talega eso era sa matanitu tani ki na vale-ni-soro, a sa vakadukadukalitaka na tikina tabu oqo.”

²⁹ Ni ra a raica eliu sa tiko vata kaya e na koro ko Tirofimo na kai Efeso, a ra sa nanuma sa kauta ko Paula ki na vale-ni-soro.

³⁰ A ra sa ue kecega na lewe ni koro, a ra sa cici vata yani na tamata. A ra sa tauri Paula ka yarataka mai na vale-ni-soro ki tautuba, ka sa sogo sara na katuba.

³¹ Ia ni ra sa segata me ra vakamatei koya, sa yaco vua na komada nai tukutuku, ni sa ue ko Jerusalemi taucoko.

³² A sa kauta sara ko koya eso na sotia, ka so na turaga-ni-valu, ka cici sobu vei ira. Ia ni ra sa raica na komada kei ira na sotia, era sa mudu ni mokulaki Paula.

³³ Sa qai lako voleka na komada, ka tauri koya, a sa kaya me vesuki e na sinucodo e rua. A sa taroga se ko cei ko koya, ka cava talega ka kitaka.

³⁴ A ra sa kacivaka eso na lewe vuqa e dua na ka, ka dua tale na ka eso tale. Ia ni sa sega ni kila ko koya na kena dina e na vuku ni ue, sa qai kaya me kau ko koya ki na bure ni sotia.

³⁵ Ni sa yaco ko Paula ki nai kabakaba, era sa colati koya yani na sotia e na vuku ni nodra i valavala vakaukauwa na lewe vuqa.

³⁶ Era sa lewe vuqa na tamata era sa muria, ka qolouvaka, “Kauta tani yani!”

Sa Vosa me Taqomaki Koya ko Paula

³⁷ Ia ni sa tuberi tiko ko Paula ki na bure ni valu, sa kaya ko koya vua na komada, “E tara me’u vosa mada vei kemuni?” Sa qai kaya ko koya, “Ko sa kila li na vosa va-Kirisi?

³⁸ Ko sa sega li ni koya na kai Ijipita, ko koya ka vere e na gauna sa oti, ka kauti ira ki na vanua lala e le va na udolu na daulaba?”

³⁹ Sa qai kaya ko Paula, “Oi au na Jiu, na kai Tarisu mai Silisia, na lewe-ni-vanua ni dua na koro dokai; ka’u sa masuti kemuni, mo ni laivi au mada me’u vosa vei ira na tamata.”

⁴⁰ Ia ni sa vakatara ko koya, sa tucake ko Paula e nai kabakaba, ka vakatabataba vei ira na tamata. Ia ni ra sa tiko lo sara, sa vosa vei ira ko koya e na vosa vaka-Iperiu, ka kaya: