Cakacaka 10 - Ai Vola Tabu (Vakadewa Makawa Vakavoutaki 2021)

Na Raivotu i Konilio

¹ Sa dua na tamata mai Sisaria, ko Konilio na yacana, a nodra turaga na mata sotia sa vakayacani vaka-Itali,

² a tamata daulotu, a sa rerevaka na Kalou, ko koya, kei ira kecega na nona lewe ni vuvale, a sa dausolia vakalevu na ka-ni-loloma vei ira na tamata, a sa daumasu vua na Kalou e na veisiga.

³ Sa raica ko koya e na raivotu, e nai kaciwa ni aua, e dua na agilosi ni Kalou ni sa curu vua, a sa kaya vua, “I Konilio.”

⁴ Ia ni sa vakaraica, sa rerevaka, ka kaya, “Sa vakaevei noqu Turaga?” A sa kaya vua ko koya, “A nomu masu kei na nomu ka-ni-loloma sa lako cake ki na mata ni Kalou mo nanumi kina.

⁵ Ia mo tala eso na tamata ki Jopa, me lakovi Saimoni, a yacana talega ko Pita.

⁶ Sa tiko vata ko koya kei Saimoni na daucaka kuli-ni-manumanu, sa tu e baravi na nona vale, ka na tukuna vei iko ko koya na ka e dodonu mo cakava.”

⁷ Ia ni sa lesu tale na agilosi ka vosa vei Konilio, sa qai kaciva e lewe rua na nona lewe ni vuvale kei na dua na sotia sa daulotu mai vei ira ka dauqaravi koya,

⁸ ka sa tukuna vei iratou na ka kecega, ka sa talai iratou ki Jopa.

⁹ Ia e na mataka, ni ratou sa lako tu e na gaunisala, ka toro voleka ki na koro, sa cabe cake ki dela ni vale ko Pita me masu e nai kaono ni aua;

¹⁰ a sa viakana sara, ka garova na ka me kania; ia ni ra sa vakarau tiko, sa raica na raivotu,

¹¹ sa raici lomalagi sa tawase rua, a sa dua na ka sa lako sobu mai vua, sa vaka nai tutuvi levu sa buki na tutuna vava, a sa tukuci sobu mai ki vuravura;

¹² a sa tiko kina na manumanu ni vanua e yavai va e dui nodra veimataqali kecega, kei na manumanu kila, kei na veika sa dauqasi voli kei na manumanu vuka.

¹³ Sa qai rogo mai vua na vosa, “Tucake, Pita; mo vakamatea ka kania.”

¹⁴ Ia sa kaya ko Pita, “Me’u kakua noqu Turaga; ni’u se sega vakadua ni kania na ka sa tabu se tawa-savasava.”

¹⁵ A sa rogo vakarua tale vua na vosa, “A ka sa vakasavasavataka na Kalou, mo kakua ni kaya ni tabu.”

¹⁶ A sa yaco vakatolu na ka oqo, ka sa qai kau tale na ka oqo ki lomalagi.

¹⁷ Ia ni sa taqaya tiko na loma i Pita, se cava nai balebale ni raivotu, raica, sa taroga na vale i Saimoni ko iratou na tamata sa tala ko Konilio, a ratou sa tu e na matamata-ni-koro;

¹⁸ a ratou sa kaci, ka taroga, se sa tiko ekeri ko Saimoni, a yacana talega ko Pita, se segai.

¹⁹ Ia ni sa vakananuma tiko na raivotu ko Pita, sa kaya vei koya na Yalo Tabu, “Raica, e lewe tolu na tamata sa vakasaqarai iko.

²⁰ Mo tucake kina ka lako sobu, ia mo lako vata kei iratou, me kakua ni veileti na lomamu, ni’u sa talai iratou mai.”

²¹ Sa qai lako sobu ko Pita vei iratou na tamata, ka sa kaya, “Raica, koi au ga oqo dou sa vakasaqara. A cava na vu ni nomudou lako mai?”

²² A ratou sa kaya, “Sa dua na agilosi yalosavasava sa vakatakila vei Konilio, e dua na turaga-ni-valu, a tamata yalododonu, ka sa rerevaka na Kalou, a sa rogorogo vinaka vei ira kecega na Jiu, me lakovi iko, mo mai lako ki nona vale, me rogoca vei iko na vosa ko koya.”

²³ Sa qai kacivi iratou mai ko koya, ka vakacegui iratou. E na siga ka tarava sa lako vata kei iratou ko Pita, ka sa lako kaya eso na veiwekani mai Jopa.

²⁴ Ia e na bogi rua eratou sa curu ki Sisaria. A sa waraki iratou ko Konilio, a sa vakasoqoni ira vata oti na kai nona kei na wekana dina.

Sota ko Pita kei Konilio

²⁵ Ni sa curu yani ko Pita, sa tavaki koya ko Konilio, a sa cuva sobu ki yavana, ka vakarokoroko vua.

²⁶ Ia sa vakaduri koya cake ko Pita, ka kaya, “Duri cake; au sa tamata talega koi au.”

²⁷ A rau sa veivosaki kaya, ka sa qai curu ki loma, a sa kunei ira na lewe vuqa era sa soqoni vata mai.

²⁸ A sa kaya vei ira ko koya, “Dou sa kila ni sa ka tabu vua na Jiu me tiko vata, se me veiriti kaya na tamata sa matanitu tani; ia sa vakatakila vei au na Kalou me’u kakua ni vakatoka e dua na tamata me tabu se tawa-savasava.

²⁹ O koya ga oqo ka’u sa lako mai kina ka sega ni veileti, ni’u sa lakovi yani; au sa taroga kina se cava dou sa lakovi au yani kina.”

³⁰ A sa kaya ko Konilio, “Sa qai oti ga e va na bogi ka’u a lolo ka yacova na aua oqo; e nai kaciwa ni aua ka’u a masu e na noqu vale, ka raica, sa dua na tamata sa tu e mataqu sa vakaisulu lumilumisa,

³¹ a sa kaya, ‘I Konilio, sa rogo na nomu masu, a sa vakananumi na nomu ka-ni-loloma e na mata ni Kalou.

³² O koya ga oqo mo qai talaki ki Jopa, ka lakovi Saimoni mai, a yacana talega ko Pita. Sa tiko ko koya e na vale nei Saimoni na daucaka kuli-ni-manumanu mai baravi, ni sa lako mai ko koya, ena vosa vei iko.’

³³ O koya ga oqo ka’u sa talaki sara kina vei iko; ia ko sa caka vinaka ni ko sa lako mai. Keimami sa qai tiko kecega eke e na mata ni Kalou, me keimami rogoca na ka kecega sa vakarota vei iko na Kalou.”

Era Rogoca nai Tukutuku-vinaka na Kai Matanitu Tani

³⁴ Sa qai vosa ko Pita, ka kaya, “E dina ka’u sa qai kila ni sa sega ni digitaki ira vakailoa na tamata na Kalou,

³⁵ ia e na veivanua kecega, sa vinaka vua ko koya sa rerevaki koya ka caka dodonu.

³⁶ Dou sa kila nai vakavuvuli sa tukuna ko koya vei ira na luve i Isireli, ni sa vunautaki na veivinakati e na vuku i Jisu Karisito—ko koya sa Turaga ni ka kecega.

³⁷ Nai vakavuvuli ko ya sa vunautaki mai Jutia taucoko, ka sa tekivu mai Kalili, ni sa oti na papitaiso ka vunautaka ko Joni:

³⁸ ni sa lumuti Jisu na kai Nasareci na Kalou e na Yalo Tabu kei na kaukauwa. Ko koya ka lako voli ka daucaka vinaka, a sa vakabulai ira kecega sa vakasaurarataki ira na tevoro, ni sa tiko vata kei koya na Kalou.

³⁹ Ia keitou sa yaco me i vakadinadina ni veika kecega ka cakava ko koya e na nodra vanua na Jiu, mai Jerusalemi talega. Ko koya era sa vakamatea ni ra sa vakarubeca e na kau,

⁴⁰ ia sa vakaturi koya cake na Kalou e nai katolu ni siga, ka sa vakatakilai koya votu,

⁴¹ e segai vei ira na tamata kecega, vei ira ga ka digitaka eliu na Kalou, me ra dautukuna, io vei keitou, koi keitou a kana ka gunu kaya ni sa tucake tale mai na mate ko koya.

⁴² A sa vakarota vei keitou me keitou vunau vei ira na tamata, ka vakadinadina ni sai koya ga ka lesia eliu na Kalou me lewai ira na bula kei ira na mate.

⁴³ O koya era sa dautukuna ko ira kecega na parofita, ni na vosoti e na vuku ni yacana na nodra i valavala ca na tamata kecega era sa vakabauti koya.”

Sobuti ira na Kai Matanitu Tani na Yalo Tabu

⁴⁴ Ni sa tukuna tiko na vosa oqo ko Pita, sa lutu na Yalo Tabu kivei ira kece era sa rogoca na vosa.

⁴⁵ Ia ko iratou sa cili ka sa vakabauta, ka sa lako vata mai kei Pita, eratou sa kurabui, ni sa sovaraki na Yalo Tabu kivei ira talega era sa matanitu tani.

⁴⁶ Ni ratou sa rogoci ira ni ra sa vosataka na vosa ni veivanua tani, ka vakarokorokotaka na Kalou. Sa qai kaya ko Pita,

⁴⁷ “Sa dua beka na tamata me bureitaka na wai, me kakua ni papitaisotaki ko ira na tamata oqo, era sa rawata na Yalo Tabu me vakataki keda?”

⁴⁸ A sa qai kaya me ra papitaisotaki e na yaca i Jisu Karisito. A ra sa qai masuti koya me tiko mada kei ira e na veisiga eso.