3 Joni 1 - Ai Vola Tabu (Vakadewa Makawa Vakavoutaki 2021)

¹ Mai vua na qase ni lotu kivei Keio, o koya ka'u sa lomana vakaidina.

Vakacaucautaki na Veiqaravi nei Keio

² Nai tokani lomani, sa dua bau na ka ka'u sa gadreva vakalevu, mo kalougata ka bula vinaka, me vaka sa bula vinaka sara na yalomu.

³ Ni'u sa reki vakalevu, ni ra sa lako mai na veiwekani ka tukuna na dina sa tu vei iko, me vaka ni ko sa dau muria na dina.

⁴ Sa ka levu na noqu reki e na vuku ni ka e dua bauga oqo, ni'u sa rogoca era muria na dina ko ira na luvequ.

Sa Vakacaucautaki ko Keio

⁵ Nai tokani lomani, ko sa kitaka vakadodonu na ka kecega ko sa kitaka vei ira na veiwekani, vei ira talega na vulagi;

⁶ ko ira era sa tukuna na nomu loloma e na matadra nai soqosoqo lotu. Ia kevaka ko sa vukei ira e na nodra lako mai me vaka sa vinaka vua na Kalou, ko na cakava na ka vinaka.

⁷ Ni ra a lako yani e na vuku ni yacana, a sa sega e dua na ka era taura mai vei ira sa tawa-lotu.

⁸ O koya oqo sa dodonu kina me da vakacegui ira era sa vakakina, me da veivuke kina e na dina.

Ko Tiotirifi kei Timitirio

⁹ Au a vola e dua na ka vei ira nai soqosoqo lotu, ia ko Tiotirifi, o koya sa viavia liu vei ira, sa sega ni ciqoma na neitou lewa.

¹⁰ O koya oqo ka'u na nanuma kina na nona i valavala sa kitaka ko koya, ni'u na lako yani, ni sa dau vosavakacacataki keitou e na vosa ca. A sa sega ni kitaka walega oqo, sa bese talega ni vakacegui ira na veiwekani, a sa tarovi ira era via kitaka, ka sa vakasivoi ira mai nai soqosoqo lotu.

¹¹ Kemuni nai tokani lomani, kakua ni muria na ka ca, muria ga na ka vinaka. O koya sa caka vinaka sa luve ni Kalou; ia ko koya sa caka ca sa sega ni raica na Kalou.

¹² Sa rogo vinaka ko Timitirio mai vei ira kecega, mai na dina talega. Io, keitou sa tukuna vakakina, ka dou sa kila sa dina na neitou i tukutuku.

Nai Otioti ni Vakanuinui Vinaka

¹³ Sa vuqa na ka vei au me'u vola, ia ka'u na sega ni vola vei iko e na wai ni volavola kei na peni;

¹⁴ ia ka'u sa nuitaka me'u na raici iko kusarawa, me daru veivosaki e na matanavotu.

¹⁵ Me tu vei iko na vakacegu. Sa loloma yani vei iko ko ira na veiwekani. Au sa loloma yani vei ira yadua na veiwekani.