2 Veigauna 4 - Ai Vola Tabu (Vakadewa Makawa Vakavoutaki 2021)

Nai Yaya ni Vale ni Kalou

¹ Ka sa cakava e dua nai cabocabo-ni-soro parasa, sa ruasagavulu na kiupiti na kena balavu, ka ruasagavulu na kiupiti na kena raraba, ka tini na kiupiti na kena cecere.

² A sa cakava e na ka sa vakawaicalataki na taqe levu, e tini na kiupiti mai na batina e dua ki na batina kadua; sa momokiti, a sa lima na kiupiti na kena cecere, ka sa vakavolivoliti e na dua na wa sa na tolusagavulu na kena kiupiti.

³ A sa so nai vakatakarakara ni bulumakau e rukuna, sa vakavolivolita, e tini e na dua na kiupiti, ka volita na taqe levu; sa vakawaicalataki na bulumakau me rua nai yatu ni sa vakawaicalataki vata.

⁴ Sa tu e deladra na bulumakau e tinikarua, e tolu sa vakanamata ki na vualiku, ka tolu sa vakanamata ki na ra, ka tolu sa vakanamata ki na ceva, ka tolu sa vakanamata ki na tokalau. A sa toka e cake e deladra na taqe levu, a ra sa vakanadaku ki loma kecega.

⁵ Ia na kena vavaku sa tautauvata kei na raba ni liga, a sa caka na batina me vaka na bati ni bilo, e na se ni viavia; ka sa rauta e rua na oba ka rua na udolu ka lima na drau na qaloni (rauta ni 60,000 na lita).

⁶ Sa cakava talega ko koya e tini na taqe; a sa viritura e lima e nai matau, ka lima e nai mawi, me deredere kina. Na veika era sa vakacabora mei soro kama era sa derea kina, ia na taqe levu sa nodra i vuivui na bete.

⁷ A sa cakava ko koya e tini nai tutu-ni-cina koula, me vaka na kedrai vakatakarakara, ka viritura e na vale-ni-soro, e lima e nai matau, ka lima e nai mawi.

⁸ Sa cakava talega ko koya e tini na tepeli, ka vakatikora e na vale-ni-soro, e lima e nai matau, ka lima e nai mawi. A sa cakava e dua na drau na beseni koula.

⁹ Sa cakava talega ko koya na nodra rara vakabai na bete, kei na rara vakabai levu, kei nai sogo ni rara vakabai, a sa botana na kedrai sogo e na parasa.

¹⁰ A sa viritura na taqe levu e na yasa i matau ni vale vaka ki na tokalau, ka donuya na ceva.

¹¹ A sa cakava na sedre ko Urami, kei nai sivi me kau tani kina na dravusa, kei na beseni me kau kina na dra me kureitaki. A sa vakaotia ko Urami na cakacaka kecega sa cakava ko koya vei Solomoni na tui, ki na vale ni Kalou:

¹² e rua na duru, kei nai ukuuku momokiti e na domodomo sa tu e na dela ni duru ruarua; ka rua na ka sa caka vakalawa, me ubia nai ukuuku momokiti ruarua e na domodomo sa tu e na deladrau na duru;

¹³ kei nai ukuuku e va na drau e vaka na pomekaraneti, ki na ka vakalawa ruarua; e rua na yatu ukuuku e vaka na pomekaraneti ki na dua na lawa, me ubia nai ukuuku momokiti ruarua e na domodomo sa tu e na deladrau na duru;

¹⁴ sa cakava talega na veitutu, a sa cakava na taqe e na deladratou nai tutu;

¹⁵ e dua na taqe levu, kei na bulumakau e tinikarua e rukuna;

¹⁶ kei na kuro, kei nai sivi me kau tani kina na dravusa, kei nai cula ni lewe ni manumanu; ia na parasa sa solo vakavinaka nai yaya kecega oqo sa cakava ko Urami-avi vei Solomoni na tui, ki na vale i Jiova.

¹⁷ Sa cakava oqo na tui e na buca mai Joritani, e na vanua tete e na maliwa i Sukoci kei Siretaca.

¹⁸ A sa cakava nai yaya kecega oqo ko Solomoni, ka sa ka levu sara, ni sa sega ni qarai na kena bibi na parasa.

¹⁹ A sa cakava ko Solomoni nai yaya kecega sa tu e na vale ni Kalou: nai cabocabo koula, kei na tepeli sa dautu kina na madrai dauraici,

²⁰ kei nai tutu-ni-cina koula dina, kei na nodra cina me caudre me vaka na kenai valavala, e na mata ni loqi ni Vosa;

²¹ kei na senikau, kei na cina, kei na saga-ni-buka, e na koula, io na koula talei;

²² kei nai koti-ni-cina, kei na beseni, kei nai taki, kei na miqa ni ka boi vinaka, e na koula dina; ia e nai curucuru ni vale, sa caka e na koula na kenai sogo e loma ki na tikina tabu sara, kei nai sogo ni vale, ko ya na vale-ni-soro.