2 Veigauna 36 - Ai Vola Tabu (Vakadewa Makawa Vakavoutaki 2021)

Sa Tui Juta ko Jioaasi

¹ Era sa qai kauti Jioaasi na luve i Josaia ko ira na lewe-ni-vanua, ka buli koya me tui, mei sosomi kei tamana mai Jerusalemi.

² Sa yabaki ruasagavulu ka tolu ko Jioaasi ni sa buli me tui, ka sa lewa mai Jerusalemi ka vula tolu.

³ A sa vakasivoi koya mai Jerusalemi ko koya na tui Ijipita, a sa lewa me totogi na vanua me dua na drau na taledi siliva ka dua na taledi koula.

⁴ Ka sa buli Elaiakimi na tacina na tui Ijipita, me tui Juta kei Jerusalemi, ka vakatoka na yacana me Jioiakimi. A sa tauri Jioaasi na tuakana ko Niko, ka kauta ki Ijipita.

Sa Tui Juta ko Jioiakimi

⁵ Sa yabaki ruasagavulu ka lima ko Jioiakimi ni sa buli me tui, a sa lewa mai Jerusalemi ka yabaki tinikadua. A sa caka ca ko koya e na mata i Jiova na nona Kalou.

⁶ A sa lako cake mai ko Nepukanesa na tui Papiloni, me vala kaya, ka sa vesuka e na sinucodo, me kauta ki Papiloni.

⁷ Sa kauta talega ki Papiloni ko Nepukanesa eso nai yaya ni vale i Jiova, ka virinoca e na nona burekalou mai Papiloni.

⁸ Ia na kena vo ni cakacaka i Jioiakimi, kei na nona i valavala vakasisila ka cakava ko koya, kei na ka sa kune vua, raica, sa volai e na kedrai vola na tui Isireli kei Juta. A sa lewa ko Jioiakini na luvena, me kenai sosomi.

Sa Tui Juta ko Jioiakini

⁹ Sa yabaki walu ko Jioiakini ni sa buli me tui, ka sa lewa mai Jerusalemi ka vula tolu ka bogi tini. Ka sa caka ca ko koya e na mata i Jiova.

¹⁰ Ia ni sa oti na yabaki ko ya, sa talaki ko Nepukanesa na tui, ka kauti koya ki Papiloni, kei nai yaya talei mai na vale i Jiova, ka buli Setekaia na tamana lailai me tui Juta kei Jerusalemi.

Sa Tui Juta ko Setekaia

¹¹ Sa yabaki ruasagavulu ka dua ko Setekaia ni sa buli me tui, ka sa lewa mai Jerusalemi ka yabaki tinikadua.

¹² A sa caka ca ko koya e na mata i Jiova na nona Kalou; sa sega ni vakayalomalumalumutaki koya e na mata i Jeremaia na parofita, ni sa vosa vua mai na gusu i Jiova.

¹³ A sa vuki tani talega vei Nepukanesa na tui, o koya ka vakabubuluitaki koya ka me cavuta na Kalou. A sa vakadomoqataki koya ga, ka vakaukauwataka na lomana me kakua kina ni saumaki kivei Jiova na nodra Kalou na Isireli.

¹⁴ Ka ra sa caka cala vakalevu ko ira kecega sa liu vei ira na bete, kei ira na tamata, me vaka nai valavala vakasisila ni veimatanitu tani; a ra sa vakavelavelataka na vale i Jiova ka vakatabuya ko koya mai Jerusalemi.

Na Rusa i Jerusalemi

¹⁵ A sa talai ira na nona tamata kivei ira ko Jiova na Kalou ni nodra qase, sa sou e na mataka, ka talai ira; ni sa yalololoma ko koya vei ira na nona tamata, kei na yasana sa dautiko kina ko koya.

¹⁶ Ia era a vakalialiai ira nai talai ni Kalou, ka beca na nona vosa, ka vakacacani ira na nona parofita, ka sa tubu kina na cudru i Jiova vei ira na nona tamata, ka sa dredre me ra vakabulai.

Na Tiko Vakavesu i Juta

¹⁷ E na vuku ni ka oqo, sa kauta mai vei ira ko koya na nodra tui na kai Kalitia, o koya ka vakamatea e nai seleiwau na nodra cauravou e na nodra vale tabu, ka sega ni lomana na cauravou se na goneyalewa, na tagane qase, se o koya sa roko-lako ni sa qase sara; sa soli ira kecega ki na ligana.

¹⁸ Kei nai yaya kecega ni vale ni Kalou, na ka lelevu kei na ka lalai, kei nai yau ni vale i Jiova, kei na nona i yau na tui, kei na nodra talega na nona tamata turaga; sa kauta kecega ki Papiloni.

¹⁹ A ra sa visa na vale ni Kalou, ka talaraka sobu na bai kei Jerusalemi, ka visa na kena veivale vakaturaga kecega e na bukawaqa, ka vakacacataka na kenai yaya vinaka kecega.

²⁰ Ia ko ira era a bula mai nai seleiwau, sa kauta yani ko koya ki Papiloni; ka ra sa bobula vei koya, ka vei ira na luvena, ka yacova na gauna sa lewa kina na matanitu ko Perisia,

²¹ me vakayacora na vosa i Jiova e na gusu i Jeremaia, me rekitaka mada na vanua na kena gauna ni vakacecegu. Ka ni sa biu tu sa qai vakacegu tiko, ka me cava mada na yabaki e vitusagavulu.

Sa Kacivaka ko Sairusi me ra Sereki na Bobula

²² Ia e na kenai matai ni yabaki i Sairusi na tui Perisia, me vakayacori kina na vosa i Jiova e na gusu i Jeremaia, sa vakauqeta na yalo i Sairusi na tui Perisia ko Jiova, me kacivaki yani e na veiyasana kecega ni nona matanitu, ka sa vola talega ko koya ka vaka,

²³ “Sa vosa vakaoqo ko Sairusi na tui Perisia, Sa solia oti vei au ko Jiova na Kalou ni lomalagi na veimatanitu kecega e vuravura; a sa vakaroti au me'u tara e dua na nona vale mai Jerusalemi, mai Juta. O koya yadua vei ira kecega na nona tamata, sa tiko vata kei kemudou me tiko kaya ko Jiova na nona Kalou, ka me lako cake ko koya.”