2 Veigauna 35 - Ai Vola Tabu (Vakadewa Makawa Vakavoutaki 2021)

Na Solevutaki ni Lako-sivia

¹ Sa cakava talega na solevu ni Lako-sivia vei Jiova ko Josaia e Jerusalemi, ka ra sa vakamatea na lami ni Lako-sivia e na kenai katinikava ni siga e nai matai ni vula.

² Ka sa lesi ira na bete ki na nodra i tavi, ka vagumatuataki ira e na cakacaka ni vale i Jiova.

³ Ka sa kaya vei ira na Livai era sa vakatavulici ira kecega na Isireli ka ra sa tabu me nei Jiova, “Dou vakacuruma na kato tabu ki na vale sa tara ko Solomoni na luve i Tevita na tui Isireli. Ena sega ni qai vakaocataka tale tiko na tabamudou. Ia oqo mo dou qaravi Jiova na nomudou Kalou, kei ira na nona tamata na Isireli.

⁴ Dou vakarau e na veimataqali ni nomudou qase, me vaka na nomudou i tavi, me vaka nai vola i Tevita na tui Isireli, ka vaka nai vola i Solomoni na luvena.

⁵ Ia dou tu e na tikina tabu, me vaka na kenai wasewase ni nodra veivuvale na nodra qase na wekamudou ko ira na tamata, kei nai wasewase ni nodra veivuvale na Livai.

⁶ Dou vakamatea vakakina na lami ni Lako-sivia, ka vakasavasavataki kemudou, ka vakarautaki ira na wekamudou, me ra cakava me vaka na vosa i Jiova e na gusu i Mosese.”

⁷ Ka sa solia ko Josaia kivei ira na tamata mai na qele ni sipi, eso na luve ni sipi ka so na luve ni me, me yaga kecega e na solevu ni Lako-sivia, me rauti ira kecega era sa tiko kina, a kenai wiliwili sa le tolusagavulu na udolu, ka tolu na udolu na bulumakau; oqo mai na nona i yau na tui.

⁸ A ra sa solia vakayalovinaka ko ira na nona tamata turaga kivei ira na tamata, kei ira na bete, kei ira na Livai. Ia ko Ilikaia, kei Sakaraia, kei Jieli, o iratou ka lewa e na vale ni Kalou, eratou solia kivei ira na bete, me yaga e na solevu ni Lako-sivia, e rua na udolu ka ono na drau na sipi, ka tolu na drau na bulumakau.

⁹ Sa solia talega ko Konenaia, kei Semaia, kei Nicaneli, ko ira na wekana, kei Esapaia, kei Jieli, kei Josapati, na nodra turaga na Livai, kivei ira na Livai, me yaga e na solevu ni Lako-sivia, e lima na udolu na sipi, ka lima na drau na bulumakau.

¹⁰ Ka sa vakarautaki na cakacaka, a ra sa tu ko ira na bete e na nodra tikina, kei ira na Livai e na nodra i tavi, me vaka na nona vosa na tui.

¹¹ Ka ra sa vakamatea na lami ni Lako-sivia, ka kureitaka na dra ko ira na bete mai na ligadra, ka vocia ko ira na Livai.

¹² A ra sa kauta tani nai soro kama, me ra vota me tautauvata kei nai wasewase ni nodra veivale ni nodra qase na tamata, me ra vakacabora vei Jiova, me vaka sa volai e nai vola i Mosese. Ka vakakina na bulumakau.

¹³ Ka ra sa tavuna na lami ni Lako-sivia e na bukawaqa, me vaka na kenai valavala; ia na kena ka tabu era sa vakasaqa e na kuro, kei na kuro lelevu, kei na tavuteke, a ra sa vota vakatotolo vei ira kecega na tamata.

¹⁴ Sa oti, era sa vakarautaka na kedra, kei na kedratou na bete, ka ni ra sa vakacabora tiko nai soro kama kei na uro ka bogicaka, ko iratou na bete na luve i Eroni; e na vuku ni ka oqo, sa vakarautaka na kedra ko ira na Livai, kei na kedratou na bete na luve i Eroni.

¹⁵ A sa tiko ko ira na dausere, na luve i Esava, e na nodra tikina, me vaka na vosa i Tevita, kei Esava, kei Imani, kei Jitucuni, na nona daurai na tui, ka sa tiko nai vakatawa e na veimatamata-ni-koro; era sega ni biuta na nodra i tavi; ni sa vakarautaka na kedra ko ira na wekadra na Livai.

¹⁶ Sa vakarautaki na cakacaka kecega i Jiova e na siga ko ya, me ia na solevu ni Lako-sivia, ka me vakacabora nai soro kama e dela ni cabocabo-ni-soro i Jiova, me vaka na vosa i Josaia na tui.

¹⁷ Ka ra sa ia na solevu ni Lako-sivia e na gauna ko ya ko ira na Isireli era tiko kina, kei na kana madrai sa sega ni vakaleveni, ka bogi vitu.

¹⁸ Ka sa sega e dua na solevu ni Lako-sivia sa caka e Isireli me tautauvata kaya mai na gauna i Samuela na parofita; ka sa sega e dua vei ira kecega na tui Isireli e cakava e dua na solevu ni Lako-sivia sa tautauvata kei na kena ka cakava ko Josaia, kei ira na bete, kei ira na Livai, kei ira kecega na Juta kei ira na Isireli era tiko kina, kei ira na kai Jerusalemi.

¹⁹ Sa caka na solevu ni Lako-sivia oqo e nai katinikawalu ni yabaki ni lewa i Josaia.

Nai Cavacava ni Veiliutaki i Josaia

²⁰ Sa oti na ka kecega oqo, ni sa vakarautaka oti na vale-ni-soro ko Josaia, sa cabe mai ko Niko na tui Ijipita me kabai Kakimisi e na bati ni Uferetisi, ka sa lako yani ko Josaia me vala kaya.

²¹ A sa vakatadu mata vua ko koya, ka kaya, “A cava beka me'u vala kina kei iko, na tui Juta? Sa sega na ka me'u vala kina kei iko e na siga edaidai, ia ki na vale ga au sa veivala tiko kaya; ni sa vosa vei au na Kalou me'u vakusakusa. Mo kakua ni vorata na Kalou, o koya sa tiko vata kei au, me kua kina ni vakarusai iko ko koya.”

²² Ia sa bese ga ko Josaia ni suka tani mai vua, ka sa liatamata tani ko koya, me rau veivala kaya, ka sega ni vakarorogo ki na vosa i Niko mai na gusu ni Kalou, a sa lako ga mai me vala e na buca ko Mikito.

²³ Sa ra qai vanai Josaia na tui ko ira na dauvanavana. Ka sa kaya na tui vei ira era qaravi koya, “Dou kauti au tani, ni'u sa mavoa vakaca.”

²⁴ A ra sa kauti koya ko ira na nona tamata mai na qiqi-ni-valu ko ya, ka vakavodoki koya ki nai karua ni qiqi-ni-valu sa tiko vei koya, ka kauti koya ki Jerusalemi. Ka sa ciba ko koya, ka sa bulu e na dua nai bulubulu ni nona qase. A ra sa tagicaki Josaia ko ira kecega na Juta kei Jerusalemi.

²⁵ Ka sa lelevaki Josaia ko Jeremaia, ka ra sa tagilagalagataki Josaia ko ira kecega na tagane dausere kei ira na yalewa dausere e na nodra lele, ka yacova na siga oqo. A ra cakava me dua nai vakarau e Isireli; ka raica, sa toqai e nai vola ni lele.

²⁶ Ia na kena vo ni cakacaka i Josaia, kei na nona i valavala vinaka, me vaka sa volai e na vunau i Jiova,

²⁷ kei na nona cakacaka, a kenai vakatekivu, kei na kenai otioti, raica, sa volai e na kedrai vola na tui Isireli kei Juta.