2 Veigauna 33 - Ai Vola Tabu (Vakadewa Makawa Vakavoutaki 2021)

Sa Tui Juta ko Manasa

¹ Sa tinikarua na yabaki i Manasa ni sa buli me tui, ka sa lewa mai Jerusalemi ka yabaki limasagavulu ka lima.

² A sa caka ca e na mata i Jiova, me vaka na nodra i valavala vakasisila na veimatanitu tani, o ira ka biuta tani ko Jiova e matadra na Isireli.

³ Ni sa tara tale ko koya na veiyasana cecere ka basuka sobu ko Esekaia na tamana, ka sa vakaduria nai cabocabo-ni-soro me nodra na Peali, ka cakava eso na kalouyalewa ni veikau, ka soro ki na kalokalo kecega ni lomalagi, ka qaravi ira.

⁴ Sa cakava talega eso nai cabocabo-ni-soro e na vale i Jiova, sa kaya oti kina ko Jiova, “Ena tiko mai Jerusalemi na yacaqu ka sega ni mudu.”

⁵ Ka sa cakava eso nai cabocabo-ni-soro vei ira kecega na kalokalo ni lomalagi e na rara vakabai ruarua ni vale i Jiova.

⁶ A sa vakacabori ira na luvena e loma ni bukawaqa, e na buca ni luve i Inomi, ka sa daunanuma ki na siga eso, ka sa parofisai e na gata, ka dauveiriti kei ira na yalo mai bulu, kei ira na dauveinita. Sa caka ca vakalevu ko koya e na mata i Jiova, me vakacudrui koya.

⁷ Ka sa viritura e dua na matakau ceuceu, na matakau ka cakava ko koya, e na vale ni Kalou, oqori ka vosa kina na Kalou kivei Tevita kei Solomoni na luvena, ka vaka, “Au na vakatikora na yacaqu e na vale oqo, kei Jerusalemi, ko ya au sa digitaka e na nodra yavusa kecega na Isireli ka tawa mudu.

⁸ Ia ka'u na sega talega ni kauta tani na yavadra na Isireli mai na vanua au a lesia me nodra na nomudou qase, kevaka era na nanuma ga ka cakava na ka kecega au sa vakarota vei ira, me vaka na vunau taucoko, kei nai lesilesi, kei nai valavala ni soro, sa tukuna ko Mosese.”

⁹ Ka sa vakacalai ira na Juta kei ira na kai Jerusalemi ko Manasa, me ra sa uasivi cake vei ira na veimatanitu tani e nai valavala ca, o ira sa vakarusa ko Jiova e matadra na Isireli.

Sa Veivutuni ko Manasa ka sa Ciqomi Tale

¹⁰ A sa vosa ko Jiova kivei Manasa, vei ira talega na nona tamata, ia era sa bese ni rogoca.

¹¹ E na vuku ni ka oqo sa kauti ira mai ko Jiova na kavetani ni vale nei tui Asiria, a ra sa tauri Manasa e na loma ni veiwa-vakavotona, ka vesuki koya e na sinucodo, ka kauta ki Papiloni.

¹² Ia ni sa rarawa ko koya, sa vakamasuti Jiova na nona Kalou, ka vakayalomalumalumutaki koya vakalevu e na mata ni nodra Kalou na nona qase.

¹³ Ka sa masu kivei koya, ka sa yalovinaka vua ko koya, ka rogoca na nona vakamamasu, ka kauti koya tale ki Jerusalemi ki na nona matanitu. Sa qai kila ko Manasa ni sa Kalou ko Jiova.

¹⁴ Ia ni sa oti oqo, sa viria ko koya e dua na bai e taudaku ni koro i Tevita, e na yasa i Kioni sa donuya na ra, e na buca, ka yala ki nai curucuru ni matamata-ni-koro ni ika, ka vakavolivoliti Ofeli, a sa viria me cecere sara, ka sa lesia eso na kavetani ni valu ki na koro vakabai kecega nei Juta.

¹⁵ A sa kauta tani na kalou tani, kei na matakau mai na vale i Jiova, kei nai cabocabo-ni-soro kecega sa tara ko koya eliu e na ulunivanua ni vale i Jiova, e Jerusalemi talega, ka biuta tani ki taudaku ni koro.

¹⁶ A sa vakavinakataka nai cabocabo-ni-soro i Jiova, ka vakacabora kina nai soro ni veivinakati kei nai soro ni vakavinavinaka, ka vakarota vei ira na Juta me ra qaravi Jiova na nodra Kalou na Isireli.

¹⁷ Ia era sa vakacaboisoro tiko ko ira na tamata e na veitikina cecere, ia vei Jiova ga na nodra Kalou.

¹⁸ Ia na kena vo ni cakacaka i Manasa, kei na nona masu vua na nona Kalou, kei na nodra vosa na daurai era sa vosa vei koya e na yaca i Jiova na nodra Kalou na Isireli, raica, sa volai e na kedrai vola na tui Isireli.

¹⁹ A nona masu talega, kei na nona vakarogoci, kei na nona i valavala ca kecega, kei na nona caka cala, kei na veiyasana sa tara kina ko koya na veitikina cecere, ka vakaduria kina na kalouyalewa ni veikau kei na matakau ceuceu, ni se bera ni vakayalomalumalumutaki koya; raica, sa volai vata kei na nodra vosa na daurai.

²⁰ A sa moce vata kei ira na nona qase ko Manasa, a sa bulu e na nona vale, ka sa tui ko Emoni na luvena, me kenai sosomi.

Na Buli kei na Mate i Emoni na Tui Juta

²¹ Sa yabaki ruasagavulu ka rua ko Emoni ni sa buli me tui, ka sa lewa mai Jerusalemi ka yabaki rua.

²² A sa caka ca ko koya e na mata i Jiova, me vaka ka cakava ko Manasa na tamana. Ni sa vakacaboisoro ko Emoni ki na matakau ceuceu kecega ka cakava ko Manasa na tamana, ka qaravi ira.

²³ Ka sega ni vakayalomalumalumutaki koya e na mata i Jiova, me vaka ka vakayalomalumalumutaki koya ko Manasa na tamana; ia sa uasivi cake tiko e na nona caka cala ko Emoni.

²⁴ A sa buki kena vere ko ira na nona tamata, ka vakamatei koya e na nona vale.

²⁵ Ia ko ira na lewe-ni-vanua, era sa vakamatei ira kecega era sa bukia na vere kei Emoni na tui; ka ra sa buli Josaia na luvena ko ira na lewe-ni-vanua me tui, me kenai sosomi.