2 Veigauna 30 - Ai Vola Tabu (Vakadewa Makawa Vakavoutaki 2021)

Sa Vakaroti me Qaravi na Solevu ni Lako-sivia

¹ A sa talaki ko Esekaia kivei ira kecega na Isireli kei ira na Juta, ka sa vola talega nai vola kivei ira na Ifereimi kei ira na Manasa, me ra lako mai ki na vale i Jiova ki Jerusalemi, me ia na solevu ni Lako-sivia kivei Jiova na nodra Kalou na Isireli.

² Ni sa bose oti na tui, kei ira na nona tamata turaga, kei ira nai soqosoqo taucoko mai Jerusalemi, me ra ia na solevu ni Lako-sivia e na kenai karua ni vula.

³ Ni ra sega ni cakava rawa e na gauna ko ya, ni ra sega ni vakasavasavataki ira vakavinaka ko ira na bete, era sa sega talega ni soqoni ira vata mai ki Jerusalemi ko ira na tamata.

⁴ Ia sa dodonu ga oqo vua na tui, vei ira talega nai soqosoqo taucoko.

⁵ A ra sa vakarota me tukuni yani e na veiyasana kecega e Isireli, mai Peri-sepa ka yaco ki Tani, me ra lako mai me ra ia na solevu ni Lako-sivia mai Jerusalemi kivei Jiova na nodra Kalou na Isireli, ni sa dede era sa sega ni cakava me vaka sa volai.

⁶ A sa lako ko ira sa cicivaka nai vola mai vua na tui, kei ira na nona tamata turaga, ki na veiyasana e Isireli kei Juta, ka me vaka na nona vosa na tui, ka kaya, “Oi kemuni na Isireli, ni saumaki tale mai vei Jiova na Kalou i Eparaama, kei Aisake, kei Isireli, ena qai saumaki mai ko koya kivei kemuni sa vo, ka bula mai na ligadra na tui Asiria.

⁷ Ni kakua ni vakataki ira na nomuni qase, kei ira na wekamuni, era sai valavala ca vei Jiova na Kalou ni nodra qase, ka sa laivi ira kina me ra rusa, me vaka sa raica na matamuni.

⁸ Ia mo ni kakua ni domoqa, me vakataki ira na nomuni qase, ia mo ni soli kemuni kivei Jiova, ka curuma na nona vale tabu, sa vakatabuya ko koya ka tawa mudu, ka qaravi Jiova na nomuni Kalou, me saumaki tani vei kemuni na nona cudru bibi.

⁹ Io, kevaka kemuni sa lesu tale kivei Jiova, ena lomani kina ko ira na wekamuni kei na luvemuni e matadra era sa vakabobulataki ira, a ra na yaco tale mai kina ki na vanua oqo. Ni sa yalovinaka ka yalololoma ko Jiova na nomuni Kalou, ia ena sega ni vagolea tani vei kemuni na matana, kevaka kemuni sa lesu vua.”

¹⁰ A ra sa lako ko ira sa cicivaka nai vola ki na veikoro e na nodra veiyasana ko Ifereimi kei Manasa ka yaco ki Sevuloni; ia era sa dredrevaki ira sara, ka vakalialiai ira.

¹¹ Ia eso vei ira mai Aseri, kei Manasa, kei Sevuloni era sa vakayalomalumalumutaki ira, ka ra lako mai ki Jerusalemi.

¹² Mai Juta talega sa vakalomavatataki ira na Kalou, me ra mai cakava na nodra i vakaro na tui kei ira na turaga, me vaka na vosa i Jiova.

¹³ A ra sa soqoni vata mai ki Jerusalemi e lewe vuqa na tamata, me ra cakava na solevu ni madrai sa sega ni vakaleveni e na kenai karua ni vula, e dua nai soqosoqo levu sara.

¹⁴ A ra sa ia ka kauta tani nai cabocabo-ni-soro sa tu e Jerusalemi, kei nai cabocabo kecega ni ka boi vinaka era sa kauta tani, ka biuta ki na wai ko Kitironi.

¹⁵ A ra sa vakamatea na lami ni Lako-sivia e na kenai katinikava ni siga e nai karua ni vula. A ra sa madua ko ira na bete kei ira na Livai, ka vakasavasavataki ira, ka ra sa kauta mai nai soro kama ki na vale i Jiova.

¹⁶ A ra sa tu e na nodra tikina me vaka na kenai valavala, me vaka na vunau i Mosese na tamata ni Kalou. Ia ko ira na bete era sa kureitaka na dra sa ra solia vei ira ko ira na Livai.

¹⁷ Ni ra sa lewe vuqa vei ira nai soqosoqo era sa sega ni vakasavasavataki ira. A sa nodra i tavi kina na Livai me ra vakamatea na lami ni Lako-sivia e na vukudra yadua sa sega ni savasava, me ra vakasavasavataki vei Jiova.

¹⁸ Ni ra sa lewe vuqa vei ira na tamata, io sa le vuqa vei ira na Ifereimi, kei Manasa, kei Isakari, kei Sevuloni, era a sega ni vakasavasavataki ira, ia era sa kania vakatani na Lako-sivia, ka sega ni vaka na ka sa volai. Ia sa masulaki ira ko Esekaia, ka kaya, “Me kakua ni cudruva ko Jiova na dauyalovinaka e dua na tamata

¹⁹ sa vakarautaka na yalona me qarava na Kalou, io ko Jiova na Kalou ni nona qase, ke sa sega ni vakasavasavataki ko koya me vaka na kena vakasavasavataki ni vale-ni-soro.”

²⁰ A sa rogoci Esekaia ko Jiova, ka sa vakabulai ira na tamata.

²¹ A ra sa cakava e na marau levu ka bogi vitu na solevu ni madrai sa sega ni vakaleveni ko ira na Isireli era sa tiko mai Jerusalemi; a ra sa vakavinavinaka vei Jiova ko ira na Livai kei ira na bete e na veisiga, ka sere vata kei nai vakatagi domo levu vei Jiova.

²² Ka sa tauca na vosa ni veivakacegui ko Esekaia kivei ira kecega na Livai era sa vakatavulica na vuku vinaka i Jiova. A ra sa kana tiko e na solevu ko ya ka bogi vitu, a ra sa vakacabora nai soro ni veivinakati ka ra sa vakatusa na nodra i valavala ca vei Jiova na Kalou ni nodra qase.

Nai Karua ni Solevu

²³ A ra sa bose ko ira nai soqosoqo taucoko me ra ia tiko ka bogi vitu tale. Era sa qai cakava e na marau ka bogi vitu tale.

²⁴ Ni sa solia ko Esekaia na tui Juta vei ira nai soqosoqo e dua na udolu na bulumakau, ka vitu na udolu na sipi me vakacabori; ia ko ira na turaga era solia vei ira nai soqosoqo e dua na udolu na bulumakau, ka dua na oba (10,000) na sipi. Era sa lewe vuqa na bete era sa vakasavasavataki ira.

²⁵ Ka ra sa marau ko ira na nodra i soqosoqo taucoko na Juta, kei ira na bete kei ira na Livai, kei nai soqosoqo taucoko era lako mai Isireli, kei ira na vulagi era lako mai na vanua ko Isireli, kei ira era tiko e Juta.

²⁶ A sa levu na reki e Jerusalemi, ni sa sega na ka e Jerusalemi me sa vakakina, mai na gauna i Solomoni na luve i Tevita na tui Isireli.

²⁷ Sa qai tucake ko ira na bete, kei ira na Livai, ka vosavakalougatataki ira na tamata, ka sa rogoci na domodra, a sa lako cake na nodra masumasu ki na nona i tikotiko savasava, io ki lomalagi.