2 Veigauna 24 - Ai Vola Tabu (Vakadewa Makawa Vakavoutaki 2021)

Sa Vakavoutaka na Vale i Jiova ko Joasi

¹ Sa buli me tui ko Joasa ni sa vitu na nona yabaki, a sa lewa tiko ko koya mai Jerusalemi ka yabaki vasagavulu. A yaca i tinana talega ko Sipia mai Peri-sepa.

² A sa kitaka ko Joasa na ka dodonu e na mata i Jiova e na veisiga kecega sa bula kina ko Jioiata na bete.

³ A sa kauta vua e le rua na watina ko Jioiata, ka sa vakatubura eso na luvena tagane kei na luvena yalewa.

⁴ Sa oti na ka oqo, sa nanuma ko Joasa me vakavinakataka tale na vale i Jiova.

⁵ A sa vakasoqoni ira vata na bete kei ira na Livai, ka kaya vei ira, “Dou lako yani ki na nodra veikoro na Juta, ka kumuna vata nai lavo mai vei ira kecega na Isireli, me vakavinakataka tale na vale ni nomudou Kalou e na veiyabaki, ia dou kusava na ka oqo.” Ia era sa sega ni kusava ko ira na Livai.

⁶ A sa kacivi Jioiata, ko koya sa liu, ko koya na tui, ka kaya vua, “E vakaevei ni ko sa sega ni tarogi ira na Livai e na nodra kauta mai Juta kei Jerusalemi nai yau sa lesi me kumuni vata, me vaka nai vakaro i Mosese na tamata i Jiova, kei nai soqosoqo ni Isireli, e na vuku ni vale ka tu kina na vunau?”

⁷ Ni ra sa vakacacana oti na vale ni Kalou ko iratou na luve i Acalaia, na yalewa ca ko ya, kei nai yaya kecega sa vakacabori ki na vale i Jiova era a solia kivei ira na Peali.

⁸ A ra sa cakava e dua na kato, ni sa vakaroti ira ko koya na tui, a ra sa viritura e tautuba mai na matamata-ni-koro ni vale i Jiova.

⁹ A ra sa kacivaka e na veiyasana vaka-Juta kei Jerusalemi me sa kau mai kivei Jiova nai yau sa lesia ko Mosese na tamata ni Kalou kivei ira na Isireli e na vanua lala.

¹⁰ A ra sa marau ko ira kecega na turaga, kei ira kecega na tamata, ka ra kauta mai, ka biuta ki na kato, ka ra sa ia tiko me oti mada.

¹¹ Ia ni ra sa kauta na kato ko ira na Livai vua sa lesia ko koya na tui, ka ni ra sa raica sa ka levu nai lavo, erau sa lako mai na nona vunivola na tui, kei na tamata ni bete levu, ka rau sa vakalalataka na kato, ka kauta tale ki na kenai tutu. A ra sa cakava vakakina e na veisiga, ka kumuna vata vakalevu sara nai lavo.

¹² A rau sa solia na tui kei Jioiata kivei ira era sa lewa na cakacaka e na vale i Jiova; ka ra sa volia kina na matai ni vatu kei na matai ni kau me vakavinakataka na vale i Jiova, kei ira talega era sa daucaka kaukamea kei na parasa, me vakavinakataka na vale i Jiova.

¹³ A ra sa cakacaka ko ira na matai, ka vakaotia vakavinaka na cakacaka, ka ra sa cakava na vale ni Kalou me vaka eliu, ka vakaukauwataka.

¹⁴ Ia ni ra sa vakaotia, era sa kauta mai vei koya na tui kei Jioiata nai lavo ka vo, ka sa caka kina nai yaya ni vale i Jiova, nai yaya ni cakacaka, me vakacaboisoro kina, kei nai taki, kei na bilo koula kei na bilo siliva. A ra sa vakacabora tiko eso nai soro kama e na vale i Jiova e na veisiga kecega i Jioiata.

¹⁵ A sa qase mai ko Jioiata, ka sa vuqa na nona yabaki ni sa mate; sa dua na drau ka tolusagavulu na nona yabaki ni sa mate.

¹⁶ Ka sa bulu vata ko koya kei ira na tui e na koro i Tevita, ni sa caka vinaka e Isireli, ka vua na Kalou, kei na nona vale.

¹⁷ Ia ni sa mate ko Jioiata, sa ra lako mai na turaga ni Juta, ka sa vakarokoroko vua na tui. A sa vakarorogo vei ira ko koya na tui.

¹⁸ Ka ra sa biuta na vale i Jiova na Kalou ni nodra qase, ka qaravi ira na kalouyalewa ni veikau kei na matakau; ka sa yaco na cudru kivei ira na Juta kei ira mai Jerusalemi e na vuku ni nodra caka cala oqo.

¹⁹ Ia sa tala eso na parofita vei ira ko koya, me vakalesui ira tale kivei Jiova. A ra sa beitaki ira e na nodra i valavala, ka ra sa bese ga ni rogoca.

²⁰ A sa curu na Yalo ni Kalou kivei Sakaraia na luve i Jioiata na bete, ka sa tu e ra ko ira na tamata, a sa tu e cake ko koya ka kaya vei ira, “Sa vosa vakaoqo na Kalou, ‘A cava dou sa vakacacana kina na vunau i Jiova, ka sa dredre kina mo dou tamata yaco? Ni dou sa biuti Jiova, sa biuti kemudou talega ko koya.’ ”

²¹ A ra sa buki kena vere, a ra sa vakaviriki koya e na vatu, e na rara ni vale i Jiova ni sa vakarota ko koya na tui.

²² Io, sa sega ni nanuma ko Joasa na tui nai valavala vinaka ka cakava vei koya ko Jioiata na tamana, ia sa vakamatea ga na luvena. Ia ni sa mate, sa kaya, “Me raica mada oqo ko Jiova, ka taroga.”

Na Mate i Joasa

²³ Ia ni sa cava na yabaki, sa lako mai na nodra mataivalu na kai Siria me vala kei Joasa. A ra sa lako mai ki Juta kei Jerusalemi, a ra sa mokuti ira kecega na nodra turaga na tamata, a sa vakauta vua na tui Tamasiko na nodra i yau kecega era sa tokitaka.

²⁴ Sa mataivalu lailai na nodra mataivalu na kai Siria era lako mai, a sa solia ko Jiova na mataivalu levu sara ki na ligadra, ka ni ra sa biuti Jiova na Kalou ni nodra qase. Ka ra sa vakayacora kina na cudru kivei Joasa.

²⁵ Ia ni ra sa lako tani mai vua (ni sa levu na mate ka tauvi koya ni ra sa lako tani mai vua), sa ra qai buki kena vere ko ira na tamata era qaravi koya, e na vuku ni kedratou dra na luve i Jioiata na bete, ka ra sa vakamatei koya e na nona i mocemoce. Ka sa mate ko koya, ka ra sa buluti koya e na koro i Tevita, ia sa sega ni bulu ko koya e na nodra i bulubulu na tui.

²⁶ Ia koi rau oqo erau a buki kena vere, ko Sapati na luve i Semeaca, e dua na yalewa ni Amoni, kei Jiosevata na luve i Semerice, e dua na yalewa ni Moapi.

²⁷ Ia e na vukudratou na luvena tagane, kei na kena bibi ni colacola sa bikai koya, kei na kena vakavinakataki tale na vale ni Kalou, raica, sa volai e nai tukutuku ni kedrai vola na tui. Ka sa buli me tui ko Amasaia na luvena, me kenai sosomi.