2 Veigauna 2 - Ai Vola Tabu (Vakadewa Makawa Vakavoutaki 2021)

Sa Vakarau ko Solomoni me Tara na Valenisoro

¹ A sa lewa ko Solomoni me tara e dua na vale ki na yaca i Jiova, ka dua na nona vale vakamatanitu.

² A sa lesia ko Solomoni e le vitu na oba (70,000) na tamata me ra daucolacola, ka le walu na oba (80,000) me ta kau e na vanua veiulunivanua, ka le tolu na udolu ka ono na drau me vakaraici ira.

Na Veitokani kei Airami na Tui Taia

³ A sa talaki ko Solomoni kivei Irami na tui Taia, a sa kaya, “Me vaka na ka ko a kitaka vei Tevita na tamaqu, ni ko sa vakauta vei koya na sitari me tara kina na nona vale me tiko kina, mo kitaka vaka talega kina vei au.

⁴ Raica, au sa tara e dua na vale ki na yaca i Jiova na noqu Kalou, me'u vakatabuya me nona, ka me'u vakama e matana na ka boi vinaka, ka me tu talega kina na madrai sa dau yatuni tiko, ka me cabo kina nai soro kama vakamataka ka vakayakavi, e na veisiga ni vakacecegu, kei na veivula vou, kei na solevu tabu i Jiova na neimami Kalou. Oqo nai lesilesi vei ira na Isireli, me tawa mudu.

⁵ Ia na vale au na tara sa na ka levu, ni sa levu na neimami Kalou, ka sa uasivi cake vei ira na kalou kecega.

⁶ Ia, ko cei ena tara rawa na vale vei koya, ni sa sega ni yalani rawa ko koya e na lomalagi, kei na lomalagi e cake sara? Ia ko cei beka koi au me'u tara e dua na vale me nona, me vakamai kina na ka boi vinaka e matana?

⁷ Mo mai tala kina kivei au e dua na tamata vuku, me cakacaka e na koula, kei na siliva, kei na parasa, kei na kaukamea, kei na ka lokaloka, ka damuvakula, ka karakarawa, ka vuku talega me ia na ceuceu, me tiko vata kei ira na tamata vuku era sa tiko vata kei au e Juta kei Jerusalemi, ko ira sa digitaka ko Tevita na tamaqu.

⁸ Me kau talega mai kivei au eso na vu ni sitari, kei na vu ni damanu, kei na kau talei, mai Lepanoni, ni'u sa kila era sa vuku na nomu tamata e na ta kau e Lepanoni. Ka raica, ena tiko vata ko ira na noqu tamata kei ira na nomu tamata,

⁹ io me ra vakarautaka vakalevu vei au na kau, ni sa ka levu ka veivakurabuitaki na vale au na tara.

¹⁰ Ia raica, au na solia kivei ira na nomu tamata, ko ira sa dauta kau, e tinikaono na oba na puseli witi sa lautuki (2,000 na tani), ka tinikaono na oba na puseli barile (2,000 na tani), ka tinikalima na oba na qaloni waini (400,000 na lita), ka tinikalima na oba na qaloni waiwai (400,000 na lita).”

¹¹ Sa qai vola ko Irami na tui Taia e dua nai vola, vei Solomoni, ka vaka, “Ni sa lomani ira na nona tamata ko Jiova, sa buli iko ko koya mo nodra tui.”

¹² Sa kaya talega ko Irami, “Me vakavinavinakataki ko Jiova na nodra Kalou na Isireli, ko koya ka cakava na lomalagi kei vuravura, ko koya sa solia kivei Tevita na tui na gone vuku, sa tiko vua na yalomatua kei na kila-ka, me tara rawa e dua na vale me nei Jiova, ka dua na nona vale vakamatanitu.

¹³ “Ia, au sa qai tala yani e dua na tamata vuku ko Urami-avi, sa kila-ka,

¹⁴ ka sa luvena e dua na yalewa vei ira na yalewa ni Tani, a sa kai Taia ko tamana. Sa vulica ko koya me dau cakacaka e na koula, kei na siliva, e na parasa, e na kaukamea, e na vatu, kei na kau, e na ka lokaloka, e na ka karakarawa, kei na lineni matailalai, kei na lineni damuvakula, me ceuta talega na ka kecega me ceuti, ka me vaka na cakacaka vakavuku kecega ena vakaraitaki vei koya, me ia vata kei ira na nomu tamata vuku, kei ira na nona tamata vuku na noqu turaga ko Tevita na tamamu.

¹⁵ Ia oqo, na witi, kei na barile, na waiwai, kei na waini, sa cavuta ko koya na noqu turaga, e vinaka me kau mai vei keimami na nomu tamata.

¹⁶ Ia keimami na ta kau mai Lepanoni, me rauta na ka ena yaga vei iko; ia keimami na waqabilibilitaka vei iko e na wasawasa ki Jopa; ia ena nomu i tavi mo kauta cake mai kea ki Jerusalemi.”

Sa Tekivu me Tara na Valenisoro

¹⁷ A sa wiliki ira kecega na vulagi era sa tiko e na vanua nei Isireli ko Solomoni, me muria nai wiliwili sa wiliki ira kina ko Tevita na tamana; a sa kune ni ra sa le tinikalima na oba, ka tolu na udolu ka ono na drau (153,600).

¹⁸ A sa lesia e le vitu na oba (70,000) vei ira me ra daucolacola, ka le walu na oba (80,000) me ta kau e na vanua veiulunivanua, ka le tolu na udolu ka ono na drau me vakaraica, ka me vakarota vei ira na tamata na nodra cakacaka.