2 Veigauna 17 - Ai Vola Tabu (Vakadewa Makawa Vakavoutaki 2021)

Sa Tui Juta ko Josefati

¹ A sa lewa ko Josefati na luvena, me kenai sosomi, ka sa vakaukauwataki koya me vala kei ira na Isireli.

² A sa lesia na mataivalu ki na veikoro vakabai kecega e Juta, a sa lesia nai valu i vakatawa e na vanua ko Juta, kei na veikoro i Ifereimi, ka rawa ko Esa na tamana.

³ A sa tiko vata kei Josefati ko Jiova, ni sa muria nai valavala eliu ni nona qase ko Tevita, ka sega ni qaravi ira na Peali;

⁴ ia sa qaravi koya na Kalou ni tamana, ka muria na nona vunau, ka sega ni muria na nodra i valavala na Isireli.

⁵ A sa vakataudeitaka kina vua ko Jiova na matanitu. A ra sa kauta na ka-ni-loloma kivei Josefati ko ira kecega na Juta, ka sa ka levu na nona i yau ka sa dokai vakalevu.

⁶ A sa vakauqeti na yalona me muria na sala i Jiova. Sa kauta tani talega ko koya na tikina cecere kei na kalouyalewa ni veikau mai Juta.

⁷ Ia e na kenai katolu ni yabaki ni nona lewa, sa talaki vei ira na nona tamata turaga, ia vei Peni-eili, kei Opetaia, kei Sakaraia, kei Nicaneli, kei Mekaia, me ra sa vakatavuvuli e na veikoro i Juta;

⁸ ka sa lako vata kei ira eso na Livai, ko Semaia, kei Necanaia, kei Sepataia, kei Asaeli kei Simiramoci, kei Jonacani, kei Atonaia, kei Topaia, kei Topi-atonaia, ko iratou na Livai; a sa lako vata kei ira ko Ilisama kei Jiorami, erau sa bete.

⁹ A ra sa vakatavuvuli e Juta, ka ra sa kauta nai vola ni vunau i Jiova, a ra sa lako voli e na veikoro kecega e Juta, ka vakavulici ira na tamata.

¹⁰ A ra sa rerevaki Jiova ko ira na matanitu kecega ni veivanua ka vakavolivoliti Juta, ka ra sa sega kina ni vala kei Josefati.

¹¹ Sa ra kauta na ka-ni-loloma kivei Josefati ko ira talega eso na kai Filisitia, kei nai vakacavacava siliva; a ra sa kauta vua eso na manumanu ko ira na kai Arapea, e vitu na udolu ka vitu na drau na sipi tagane, ka vitu na udolu ka vitu na drau na me tagane.

¹² A sa tubu ko Josefati me levu sara; a sa tara e Juta na veivale ni valu, kei na veikoro ni yau.

¹³ Ka sa levu na cakacaka e qisia e na nodra veikoro na Juta. Ia ko ira na nona tamata i valu, ko ira na nona tamata kaukauwa ka qaqa, era a tiko mai Jerusalemi.

¹⁴ Ia oqo na kedrai wiliwili me vaka na veimataqali ni nodra qase: Mai vei ira na Juta, ko ira na turaga ni yayaudolu: ko Atina sa liu, ka tiko vata kaya e le tolusagavulu na oba (300,000) na tamata i valu qaqa.

¹⁵ A sa taravi koya ko Jioanani na turaga, ka tiko vata kaya e le ruasagavulu ka walu na oba (280,000).

¹⁶ A sa taravi koya na luve i Sikiri ko Amasaia, ko koya sa soli koya vakayalodina kivei Jiova; a sa tiko vata kaya e le ruasagavulu na oba (200,000) na tamata i valu qaqa.

¹⁷ Mai vei Penijamini talega: ko Elaiata, e dua na tamata i valu qaqa, a sa tiko vata kaya e le ruasagavulu na oba (200,000) na tamata era vakaiyaragi e na dakai dina kei nai sasabai.

¹⁸ A sa taravi koya ko Jiosevata, ka sa tiko vata kaya e le tinikawalu na oba (180,000) na tamata era sa vakarau tu ki nai valu.

¹⁹ Sa qarava na tui ko ira oqo, a sa vo ko ira sa lesia ko koya na tui ki na veikoro vakabai e na veiyasana e Juta.