2 Veigauna 15 - Ai Vola Tabu (Vakadewa Makawa Vakavoutaki 2021)

Na Veiveisau e Cakava ko Esa na Tui

¹ A sa curumi Asaraia na luve i Oteti na yalo ni Kalou,

² ka sa curu yani me tavaki Esa, ka sa kaya vua, “Ni rogoci au mai, kemuni Esa, kei kemuni kecega na Juta kei na Penijamini: Sa na tiko kei kemuni ko Jiova, kevaka kemuni sa tiko kei koya. Kevaka kemuni sa vakasaqarai koya, ena kune vei kemuni ko koya, ia kevaka kemuni sa biuti koya, ena biuti kemuni ko koya.

³ Ia, sa yali vakadede vei ira na Isireli na Kalou dina, ka sa yali na bete sai vakavuvuli, ka yali talega na vunau.

⁴ Ia, ni ra a lesu tale vei Jiova na nodra Kalou na Isireli e na gauna ni nodra rarawa, ka vakasaqarai koya, era sa kunei koya.

⁵ Ia e na gauna ko ya sa sega na vakacegu vua sa curu ki tautuba, se vua ka curu mai, ia na ka levu na rarawa ka yaco vei ira kecega na lewe ni veivanua.

⁶ A sa vakarusa na matanitu e dua na matanitu kadua, kei na koro e dua na koro kadua, ni sa vakararawataki ira na Kalou e na ka rarawa kecega.

⁷ Ia mo ni kaukauwa ga! Me kakua ni malumalumu na ligamuni, ni na saumi na nomuni cakacaka.”

⁸ Ia ni sa rogoca ko Esa na vosa oqo, kei na parofisai i Oteti na parofita, sa yalodoudou mai, a sa biuta tani na matakau vakasisila mai na vanua taucoko i Juta kei Penijamini, mai na veikoro talega sa rawa ko koya mai na vanua veiulunivanua ko Ifereimi, ka sa vakavinavinakataka tale nai cabocabo-ni-soro i Jiova, oqori ka tu e na mata ni varada i Jiova.

⁹ A sa vakasoqoni ira vata kecega na Juta kei ira na Penijamini, kei ira na vulagi mai Ifereimi kei Manasa, mai Simione talega, ni ra sa lewe vuqa vei ira na Isireli era vuki mai vua, ni ra raica sa tiko vata kaya ko Jiova na nona Kalou.

¹⁰ A ra sa soqoni vata mai ki Jerusalemi e nai katolu ni vula, e na kenai katinikalima ni yabaki ni lewa i Esa.

¹¹ A ra sa vakacabora kivei Jiova e na gauna ko ya eso na ka ni valu era a tokitaka, e vitu na drau na bulumakau, ka vitu na udolu na sipi.

¹² A ra cakava na veiyalayalati me ra qaravi Jiova na Kalou ni nodra qase, e na lomadra taucoko, kei na yalodra taucoko;

¹³ ka me sa vakamatei ko koya yadua sa bese ni qaravi Jiova na nodra Kalou na Isireli, ke sa tamata lailai se tamata levu, se tagane se yalewa.

¹⁴ A ra sa bubului kivei Jiova e na domo levu, kei na qoqolou, kei na uvu davui dina kei na koneti.

¹⁵ A ra sa marau ko ira kecega na Juta e na vuku ni bubului, ni ra sa bubului e na lomadra taucoko, ka ra sa golevi koya e na nodra gagadre kece; ka sa kune vei ira ko koya, a sa vakasaututaki ira ko Jiova e na veiyasana.

¹⁶ A sa vakasivoi Meeka talega, na tinana ko Esa na tui, me kakua ni ranadi, ni sa cakava ko koya e dua na matakau ki na kalouyalewa ni veikau; ka sa taya sobu na nona matakau ko Esa, ka vurumemeataka, ka visa mai na soniwai ko Kitironi.

¹⁷ Ia sa sega ni kau tani e Isireli na veitikina cecere. Ia sa dodonu ga na yalo i Esa e na veisiga kecega ni nona bula.

¹⁸ A sa kauta ko koya ki loma ni vale ni Kalou na veika sa vakacabora ko tamana, kei na veika sa vakacabora ga ko koya vakai koya—na siliva, kei na koula, kei nai yaya.

¹⁹ A sa sega tale nai valu ka yacova nai katolusagavulu ka lima ni yabaki ni lewa i Esa.