2 Tui 7 - Ai Vola Tabu (Vakadewa Makawa Vakavoutaki 2021)

¹ A sa kaya ko Ilaisa, “Dou rogoca na vosa i Jiova: sa kaya vakaoqo ko Jiova, E na mataka, e na gauna vata vakaoqo, ena volitaki mai na matamata-ni-koro ko Samaria e dua nai vakarau madrai droka vinaka e na dua na sikeli, ka rua nai vakarau barile e na dua na sikeli.”

² Sa qai vosa mai na kavetani ka dauravita na ligana ko koya na tui, ka kaya vua na tamata ni Kalou, “Raica, kevaka sa cakava ko Jiova eso na katuba mai lomalagi, sa yaco rawa beka na ka oqo?” Ia sa kaya ko koya, “Raica, ko na kunea ga e matamu, ia ko na sega ni kana kina.”

Era sa Dro na Kai Siria

³ A sa tiko voleka ki na matamata ni koro eratou lewe va na tamata vukavuka. A ratou sa veikayaka vakai iratou, “A cava edatou sa dabe tikoga kina eke me yacova na nodatou mate?

⁴ Kevaka edatou kaya, ‘Me datou curu ki na loma ni koro’, sa tiko kina na dausiga, ia edatou na mate kina. Ia kevaka edatou na tiko vakadua eke, tou na mate talega. Ia oqo, tou ia tou lako mada ki na nodra i tikotiko ni valu na kai Siria. Kevaka era na vakabulai kedatou, edatou na bula; ia kevaka era na vakamatei kedatou, edatou na mate ga.”

⁵ A ratou sa cavu tu ni sa butobuto mai vakalailai na vanua, me ra lako ki na nodra i tikotiko ni valu na kai Siria. A ra sa yaco sara ki nai yalayala ni nodra i tikotiko ni valu na kai Siria, ka raica, sa sega e dua na tamata mai kea.

⁶ Ni sa vakavuna na Turaga me ra rogoca na mataivalu ni Siria na rorogo ni qiqi-ni-valu, kei na rorogo ni ose, io na rorogo ni dua na mataivalu levu, ka ra sa veikayaka vakataki ira, “Raica, ko koya na tui Isireli sa voli iratou na nodra tui na Itaiti, kei iratou na nodra tui na kai Ijipita me ra mai valuti keda.”

⁷ A ra sa mani dro kina ni sa butobuto mai vakalailai na vanua, ka biuta na nodra veivale laca, kei na nodra ose, kei na nodra asa, io nai tikotiko ni valu sa toka ga, ka ra sa dro me ra bula kina.

⁸ E na gauna eratou sa yaco yani kina na vukavuka oqori ki nai yalayala ni tikotiko ni valu, eratou sa curu ki na dua na valelaca ka kana ka gunu, ka kauta tani mai kina na siliva, kei na koula, kei nai sulu, ka la'ki vunia. Eratou sa qai lesu tale mai, ka curu ki na dua tale na valelaca, ka kauta talega mai kina na veika eso, ka la'ki vunia.

⁹ Eratou sa qai veikayaka vakataki iratou, “Sa sega ni dodonu na ka edatou sa cakava. A siga ni rogorogo vinaka na siga oqo. Ia kevaka edatou sa galu ga ka waraka me kida na mataka, ena yacovi kedatou na ka ca. Ia oqo, tou lako; tou la'ki tukuna ki na vale-ni-tui.”

¹⁰ A ratou sa qai lako ka kacivi iratou nai vakatawa mai na matamata-ni-koro; a ratou sa tukuna vei iratou, ka kaya, “Keitou a lako ki na nodra i tikotiko ni valu na kai Siria, ka raica, sa sega na tamata sa tiko kina, se dua na domo ni tamata ka rorogo, a sa noka tu ga na ose, ka noka na asa, kei na veivale laca sa toka ga.”

¹¹ E ratou sa qai kacivaka mai nai vakatawa ni matamata-ni-koro ka ratou sa tukuna kivei ira e na vale-ni-tui.

¹² A sa duri cake na tui e na lomaloma ni bogi, ka kaya vei iratou na dauveiqaravi, “Au na vakatakila vei kemudou na ka era sa cakava vei keda ko ira na kai Siria. Era sa kila ni da sa viakana; a ra sa lako tani kina mai nai tikotiko ni valu me vunitaki ira e na were, ni ra sa nanuma, ‘Ni ra sa curu yani mai na koro, eda na tauri ira bula, eda na qai curu ki na koro.’ ”

¹³ A sa vosa e dua vei iratou sa dauqaravi koya, ka kaya, “Me so na noda me kauta mada e lima na ose sa vo tu, e loma ni koro, (raica, eratou sa tautauvata kei na lewe vuqa kecega ni Isireli sa vo tu kina; ka ratou sa tautauvata kei na lewe vuqa kecega ni Isireli sa mate;) ia me da talatala mada me da raica.”

¹⁴ Era sa qai vakauta e rua na tamata dauvodo ose; ka sa tala na tui me ratou muria na nodra mataivalu na kai Siria, ka kaya, “Dou lako ka la'ki raica.”

¹⁵ A ratou sa la'ki muri ira ka yacova na Joritani, ka raica, sa oso walega na salatu e nai sulu kei nai yaya era sa biuta tani na kai Siria ni ra sa vakatotolo yani. A sa lesu mai ko iratou ka talai, ka tukuna vua na tui.

¹⁶ A ra sa qai lako yani ko ira na tamata, ka yanaka na nodra i tikotiko ni valu na kai Siria. A sa volitaki e dua nai vakarau madrai droka vinaka e na dua na sikeli, ka rua nai vakarau barile e na dua na sikeli, me vaka na vosa i Jiova.

¹⁷ Ia sa lesia ko koya na tui na kavetani ka dauravita na ligana me la'ki vakatawa na matamata-ni-koro. A ra sa buturaki koya mai na matamata-ni-koro ko ira na tamata, ka sa mate kina ko koya, me vaka sa kaya oti na tamata ni Kalou e na gauna ka lako sobu kina na tui ki vua.

¹⁸ Ni gauna e vosa kina ko koya na tamata ni Kalou vua na tui, ka kaya, “Ena volitaki e rua nai vakarau barile e na dua na sikeli, ka dua nai vakarau madrai droka vinaka e na sikeli e dua, mai na matamata-ni-koro mai Samaria, e na gauna vata vakaoqo ni mataka,”

¹⁹ a sa vosa vua na tamata ni Kalou na kavetani ko ya, ka kaya, “Raica, kevaka sa cakava ko Jiova eso na katuba mai lomalagi, sa yaco rawa beka na ka oqo?” Ka sa kaya na tamata ni Kalou, “Raica, ko na kunea ga e matamu, ia ko na sega ni kana kina.”

²⁰ A sa yaco vakakina vua, ni ra sa butubuturaka ko ira na tamata mai na matamata-ni-koro, ka sa mate kina ko koya.