2 Tui 6 - Ai Vola Tabu (Vakadewa Makawa Vakavoutaki 2021)

Sa Nawa na Kaukamea

¹ A sa kaya vei Ilaisa ko ira na luvedra na parofita, “Raica mada, eda sa tiko osooso ga e na noda i tikotiko oqo.

² Tou lako mada ki na Joritani, ka me da dui kauta mai kina e dua na kau, ka me da vakacokotaka mai kea e dua na noda i tikotiko me da tiko kina.” A sa kaya ko koya, “Dou lako.”

³ Sa kaya e dua, “Mo yalovinaka mada, mo ni lako vata kei keitou na nomuni tamata.” Sa kaya ko koya, “Au na lako yani.”

⁴ A sa lako vata kei ira ko koya. Ia ni ra sa yaco ki na Joritani, era sa ta kau.

⁵ Ia ni sa taya tiko e dua na kau e dua vei ira, sa lutu ki wai na matau; a sa tagi ko koya, ka kaya, “Isa, noqu turaga! Ni sa kerei ga na matau.”

⁶ Sa kaya na tamata ni Kalou, “Sa lutu evei?” A sa vakatakila vua ko koya na tikina ka lutu kina. A sa taya ko koya e dua na tabanikau, ka biuta ki kea, ka sa nawa na kaukamea.

⁷ A sa kaya ko koya, “Mo taura cake mai.” A sa dodoka yani na ligana, ka taura.

Ko Ira na Kai Siria kei Ilaisa

⁸ A sa yaco me vala kei ira na Isireli ko tui Siria, ka sa bose vata kei ira na nona tamata, ka kaya, “E na tikina vaka ka vaka ena tiko kina na noqu i tikotiko ni valu.”

⁹ Ia sa talaki vei tui Isireli ko koya na tamata ni Kalou, ka kaya, “Mo qarauni iko mo kakua ni lako voli e na tikina oqo, ni ra sa lako sobu kina na kai Siria.”

¹⁰ A sa talaki ko tui Isireli me qarauni na tikina ka sa vakasalataka vua na tamata ni Kalou. A sa dauvakasalataki koya ka sa vakabulai koya kina, ka sega ni yaco ga vakadua se vakarua.

¹¹ A sa rarawa sara na yalo i tui Siria e na vuku ni ka oqo, ka sa kacivi ira na nona tamata, ka kaya vei ira, “Dou na sega beka ni vakatakila vei au, se ko cei vei keda sa totaki koya na tui Isireli?”

¹² A sa kaya e dua vei ira na nona tamata, “Sa segai, noqu turaga na tui; ia ko Ilaisa ga, na parofita ka tiko vei ira na Isireli, o koya sa dautukuna vua na tui Isireli na vosa ko sa cavuta lo e na nomu loqi ni moce.”

¹³ A sa kaya ko koya, “Dou la'ki raica se sa evei ko koya, me'u talaki ka vesuki koya mai.” A sa tukuni vua, “Sa tiko mai Tocani ko koya.”

¹⁴ A sa tala ki kea eso na ose, ka so na qiqi-ni-valu, kei na mataivalu levu; a ra sa lako e na bogi, ka buku na druadrua ni koro.

¹⁵ Ia ni sa sou e na mataka na nona dauveiqaravi na tamata ni Kalou ka lako yani, ka raica, sa buku na druadrua ni koro e nai valu, kei na ose, kei na qiqi-ni-valu. A sa kaya vua na nona cauravou, “Isa noqu turaga! A cava me daru cakava?”

¹⁶ A sa kaya ko koya, “Kakua ni rere, ni ra sa lewe vuqa era sa tiko kei kedaru, ka lewe lailai era sa tiko kei ira.”

¹⁷ A sa masu ko Ilaisa, ka kaya, “Kemuni Jiova, mo ni dolava mada na matana, me rai rawa ko koya.” A sa dolava na matana na cauravou ko Jiova, ka sa rai ko koya; ka raica, sa oso na ulunivanua e na ose, kei na qiqi bukawaqa era tiko vakavolivoliti Ilaisa.

¹⁸ Ia ni ra sa lako sobu vua na mataivalu ni kai Siria, sa vakamamasu vei Jiova ko Ilaisa, ka kaya, “Ni yalololoma, mo ni yaviti ira mada na tamata oqo, me ra mataboko.” A sa yaviti ira ko koya me ra mataboko, me vaka na vosa i Ilaisa.

¹⁹ A sa kaya vei ira ko Ilaisa, “Sa sala tani oqo, ka sa koro tani oqo. Dou muri au mai, ka'u na kauti kemudou vua na tamata dou sa vakasaqara tiko.” A sa kauti ira ki Samaria.

²⁰ Ni ra sa yaco ki Samaria, a sa kaya ko Ilaisa, “Kemuni Jiova, mo ni dolava na matadra na tamata oqo, me ra rai rawa.” A sa dolava na matadra ko Jiova, ka ra sa rai rawa; ka raica, era sa tiko e loma i Samaria.

²¹ Ia ni sa raici ira ko tui Isireli, sa kaya vei Ilaisa, “I tamaqu, me'u yaviti ira? Me'u yavita ira, ne?”

²² A sa kaya ko koya, “Mo kakua ni yaviti ira. Ko na yaviti ira li ko sa vakabobulataka e na nomu i seleiwau kei na nomu dakai? Mo tauca ga e matadra na kakana kei na wai, me ra kana ka gunu, ka lako yani vua na nodra turaga.”

²³ A sa qai cakava vei ira ko koya e dua na magiti levu; a ra sa kana ka gunu, ka sa talai ira yani ko koya, ka ra sa lako vua na nodra turaga. A sa sega ni lako tale mai ki na nodra vanua na Isireli na nodra veimataivalu na kai Siria.

Buku na Druadrua kei Samaria

²⁴ E na dua na gauna e muri, a sa vakasoqona vata na nona mataivalu taucoko ko Peni-etati na tui Siria, ka lako cake, ka buku na druadrua ki Samaria.

²⁵ A sa ka levu na dausiga mai Samaria, ka raica, sa buku tiko na druadrua, ka sa volitaki kina e dua na ulu ni asa e na siliva e walusagavulu, kei na de-ni-ruve sa tolu na paidi (200 na karamu) e na siliva e lima.

²⁶ Ia ni sa lako voli e na dela ni bai ko tui Isireli, sa tagi vua e dua na yalewa, ka kaya, “Mo ni veivuke mada, noqu turaga na tui!”

²⁷ A sa kaya ko koya, “Kevaka e sega ni vukei iko ko Jiova, au na vukei iko rawa vakavei? Mai na rara ni samu sila, se mai nai keli-waini?”

²⁸ Ka sa kaya vua ko koya na tui, “A cava na nomu leqa?” A sa kaya ko koya, “Sa kaya vei au na yalewa oqo, ‘Mo solia na luvemu me daru kania edaidai, edaru na qai kania na luvequ e na mataka.’

²⁹ Ia keirau a vakasaqara na luvequ, ka kania. Ka'u a qai kaya vua e na mataka, ‘Mo solia na luvemu, me daru kania.’ Ia sa vunia na luvena ko koya.”

³⁰ Ia ni sa rogoca ko koya na tui na nona vosa na yalewa, sa dresulaka na nona i sulu—ia me vaka ni sa lako voli ko koya e dela ni bai, era sa rai yani ko ira na tamata, ka raica, sa vakaisulu e loma ko koya e nai sulu taga—

³¹ ka sa kaya ko koya, “Me cakacaka vakakina vei au na Kalou, ka vakaikuritaka talega, ke se toka ga vei Ilaisa na luve i Safati na uluna edaidai.”

³² A sa tiko e nona vale ko Ilaisa, ka ra sa tiko kaya ko ira na qase. A sa tala yani e dua na tamata na tui, ia ni se bera ni yaco vei koya nai talaki, sa kaya ko Ilaisa vei ira na qase, “Dou sa raica, se segai, ni sa talatala na luve ni dauveivakamatei ko ya me tamusuka na uluqu? Dou raica, ni sa lako mai na tamata, dou sogota na katuba, ka sogoti koya matua ki tautuba. Sa sega li ni muri koya mai na vadugu ni yavana na nona turaga?”

³³ Ni ra sa veivosaki tiko ko ira, raica, sa lako sobu mai nai talaki vei koya, a sa kaya vua, “Raica, sa mai vei Jiova na ca oqo! Me'u waraki Jiova tiko li e na vuku ni cava?”