2 Tui 24 - Ai Vola Tabu (Vakadewa Makawa Vakavoutaki 2021)

Sa Vakamalumalumutaki ko Ira na Juta

¹ E na nona gauna sa lako cake ko Nepukanesa na tui Papiloni, a sa qali vua ko Jioiakimi ka yabaki tolu. Sa qai vuki ko koya, ka talaidredre vua.

² A sa vakauqeta ko Jiova na veimataivalu ni kai Kalitia, kei na veimataivalu ni kai Siria, kei na veimataivalu na kai Moapi, kei na veimataivalu ni luve i Amoni, a sa talai ira me ra vala kei ira na Juta me vakarusai ira, me vaka na vosa i Jiova, ka vosataka ko koya e na gusudra na nona tamata na parofita.

³ Sa dina ga sa vosa i Jiova sa yaco kina oqo vei ira na Juta, me ra kau tani kina mai na matana, e na vuku ni valavala ca i Manasa, me vaka na ka kecega sa kitaka ko koya,

⁴ ka e na vuku talega ni dra tawa cala sa vakadavea ko koya. Ni sa vakasinaiti Jerusalemi e na dra tawa cala, ia na ka oqo sa sega ni via buluta ko Jiova.

⁵ Ia na kena vo ni cakacaka i Jioiakimi, kei na ka kecega sa cakava ko koya, sa sega li ni volai e nai Vola ni Veika sa Caka e na Nodra Gauna na Tui Juta?

⁶ A sa moce vata kei ira na nona qase ko Jioiakimi; a sa lewa ko Jioiakini na luvena, me kenai sosomi.

⁷ A sa sega tale ni lako mai ko koya na tui Ijipita mai na nona vanua; ni sa kauta tani ko tui Papiloni na vanua kecega sa nei tui Ijipita, mai na uciwai ni Ijipita, ka yaco ki na uciwai ko Uferetisi.

Sa Tui Juta ko Jioiakini

⁸ Sa tinikawalu na yabaki i Jioiakini ni sa tekivu me lewa, a sa lewa tiko mai Jerusalemi ka vula tolu. Ia na yaca i tinana ko Niusita, na luve i Elinecani na kai Jerusalemi.

⁹ A sa daucaka ca ko koya e na mata i Jiova, me vaka na ka kecega ka kitaka ko tamana.

Tauri Vakavesu ko Jerusalemi

¹⁰ E na gauna ko ya era sa lako cake ki Jerusalemi na tamata nei Nepukanesa na tui Papiloni, a sa buku na druadrua ni koro.

¹¹ A sa lako mai me kaba na koro ko Nepukanesa na tui Papiloni, a sa buku na druadrua ni koro ko ira na nona tamata.

¹² A sa curu yani vei tui Papiloni ko Jioiakini na tui Juta, o koya kei tinana, kei ira na nona tamata, kei ira na nona tamata turaga, kei ira na nona vakailesilesi ni vale-ni-tui. A sa tauri koya ko tui Papiloni e na kenai kawalu ni yabaki ni nona lewa.

¹³ A sa kauta tani mai kea nai yau kecega mai na vale i Jiova, kei nai yau mai na vale-ni-tui, ka tamusuka nai yaya koula kecega ka cakava ko Solomoni na tui Isireli e na vale i Jiova, me vaka ka kaya ko Jiova.

¹⁴ A sa kauti ira yani na kai Jerusalemi kecega, kei ira na turaga kecega, kei ira kecega na tamata i valu qaqa, io na bobula e le tini na udolu, kei ira kecega na matai, kei ira na matai ni kaukamea. Sa sega ni vo e dua, ko ira ga na lewe-ni-vanua era sa dravudravua.

¹⁵ A sa kauti Jioiakini ki Papiloni; a sa kauti ira vakabobula, na tinana na tui, kei iratou na watina na tui, kei ira na nona vakailesilesi, kei ira ka uasivi e na vanua, mai Jerusalemi ki Papiloni.

¹⁶ Ia ko ira kecega na tamata i valu qaqa, e le vitu na udolu, kei ira na matai, kei ira na matai ni kaukamea, e le dua na udolu, o ira kecega era kaukauwa me yaga e nai valu, io sa kauti ira vakabobula ki Papiloni ko koya na tui Papiloni.

¹⁷ A sa lesia ko koya na tui Papiloni na taci tamana, ko Matanaia, me tui me kenai sosomi; a sa vukica na yacana me vakayacani ga ko Setekaia.

Sa Tui Juta ko Setekaia

¹⁸ Sa ruasagavulu ka dua na yabaki i Setekaia ni sa tekivu me lewa, a sa lewa tiko mai Jerusalemi ka yabaki tinikadua. Ia na yaca i tinana ko Emutali, na luve i Jeremaia na kai Lipina.

¹⁹ A sa daucaka ca ko koya e na mata i Jiova, me vaka na ka kecega ka kitaka ko Jioiakimi.

²⁰ Ia sa yaco kina vei Jerusalemi kei Juta na cudru i Jiova, ka sa biuti ira tani kina e matana. A sa bese ko Setekaia ni qarava tiko na tui Papiloni.