2 Tui 17 - Ai Vola Tabu (Vakadewa Makawa Vakavoutaki 2021)

Sa Tui Isireli ko Osea

¹ E nai katinikarua ni yabaki i Easi na tui Juta, sa tekivu me lewa mai Samaria vei ira na Isireli ko Osea na luve i Ela, ka sa lewa yabaki ciwa.

² A sa daucaka ca ko koya e na mata i Jiova, ia ka sega ni vakataki ira na tui Isireli era a bula eliu vua.

³ Sa qai mai vala kaya ko Salimanisa na tui Asiria; a sa qai qali vua ko Osea, ka soli vakacavacava vua.

⁴ Ia sa kila ko tui Asiria ni sa vere ko Osea, ni sa vakatadu mata ko koya vei So na tui Ijipita, ka sega talega ni soli vakacavacava vei tui Asiria, me vaka e na veiyabaki sa oti. A sa sogolati koya kina ko tui Asiria, ka vesuka e na valeniveivesu.

Sa Kau Vakabobula ki Asiria ko Isireli

⁵ Sa qai lako voli e na vanua taucoko ko tui Asiria, ka lako cake ki Samaria, ka sa buku druadrua kina ka yabaki tolu.

⁶ E na kenai kaciwa ni yabaki i Osea sa rawai Samaria kina ko tui Asiria, ka kauti ira tani na Isireli ki Asiria, ka vakatikori ira ki Ela kei Apori, mai na uciwai mai Kosani, kei na nodra veikoro na kai Mitia.

⁷ Ni ra sai valavala ca ko ira na Isireli vei Jiova na nodra Kalou, o koya ka kauti ira cake mai na vanua ko Ijipita, mai na liga i Fero na tui Ijipita, a ra sa rerevaka na kalou tani eso,

⁸ ka muria na nodra i valavala na veimatanitu, o ira ka vakaseva tani ko Jiova e matadra na Isireli, kei na nodra na tui Isireli era a muria.

⁹ A ra sa kitaka vuni ko ira na Isireli na veika sa sega ni dodonu vei Jiova na nodra Kalou, a ra sa tara na nodra veitikina cecere mai na nodra veikoro kecega, mai na nodra qatava nai vakatawa, ka yacova na koro sa vakabai.

¹⁰ A ra sa vakaduria na nodra veimatakau kei na veikalou-yalewa ni veikau e dela ni vanua-cecere kecega, kei na ruku ni kau bulabula kecega.

¹¹ A ra sa vakama mai kea na ka boi vinaka e na tikina cecere kecega, me vakataki ira na veimatanitu ka kauta tani e matadra ko Jiova. A ra sa kitaka tiko na ka ca ka vakacudrui Jiova;

¹² a ra sa qarava na matakau eso, ka sa kaya kina vei ira ko Jiova, “Dou kakua ni cakava na ka oqo.”

¹³ Ia sa vakarota matua ko Jiova vei ira na Isireli kei ira na Juta e na gusudra na nona parofita kecega, kei ira kecega na daurai, ka kaya, “Dou vuki tani mai na nomudou i valavala ca ka vakabauta na noqu vunau, kei na noqu i lesilesi, me vaka na vunau kece ka'u a vakarota vei ira na nomudou qase, ka'u a tukuna talega vei kemudou e na gusudra na noqu tamata na parofita.”

¹⁴ Ia era sa sega ni vakarorogo, a ra sa vakadomoqataki ira me vaka era kitaka na nodra qase, era a sega ni vakabauti Jiova na nodra Kalou.

¹⁵ A ra sa biuta na nona i lesilesi kei na nona veiyalayalati ka ia ko koya kei ira na nodra qase, kei na nona vunau ka vakaroti ira kina; a ra sa muria na ka lialia, ka yaco kina me ra lialia, ka muri ira na veimatanitu sa vakavolivoliti ira, o ira ka vakaroti ira kina ko Jiova, me ra kakua ni cakacaka me vakataki ira.

¹⁶ A ra sa biuta kecega na vunau i Jiova na nodra Kalou, ka vakawaicalataka ka bulia me nodra e rua na luve ni bulumakau, ka cakava na kalouyalewa ni veikau, ka cuva ki na kalokalo kecega mai lomalagi, ka qaravi Peali.

¹⁷ A ra sa dui vakacabori ira na luvedra tagane kei na luvedra yalewa e loma ni bukawaqa, a ra sa taroga na daurairai, ka caka-i-sausau, ka volitaki ira me ra caka ca e na mata i Jiova, ka vakacudrui koya.

¹⁸ A sa cudru vakalevu kina vei ira na Isireli ko Jiova, ka biuti ira tani e matana. Sa sega ni vo e dua, na yavusa i Juta duaduaga.

¹⁹ Sa sega ni vakabauta na vunau i Jiova na nodra Kalou ko ira talega na Juta, a ra sa muria ga nai valavala era sa kitaka ko ira na Isireli.

²⁰ A sa biuta kecega na nodra kawa na Isireli ko Jiova, ka vakararawataki ira, ka soli ira ki na ligadra na dauvakacaca, ka yacova na gauna sa biuti ira tani kina e matana.

²¹ Ni sa tawasei ira na Isireli ko koya mai na vale i Tevita, a ra sa buli Jeropoama na luve i Nipati me tui. A sa vakasesei ira na Isireli ko Jeropoama me ra kakua ni muri Jiova, ka vakaivalavalacataki ira vakalevu.

²² A ra sa muria ko ira na Isireli nai valavala ca kecega sa cakava ko Jeropoama. Era sa sega ni lesu tani mai kina

²³ ka yacova na gauna sa biuti ira tani kina na Isireli ko Jiova mai na matana, me vaka ka kaya ko koya e na gusudra kecega na nona tamata na parofita. A sa kau tani kina ko ira na Isireli, mai na nodra vanua ki Asiria, ka yacova na gauna oqo.

Sa Vakacokotaki Samaria Tale ko Asiria

²⁴ A sa kauta mai ko koya na tui Asiria na tamata mai Papiloni, kei Kuca, kei Ava, kei Emaci, kei Sifaveimi, ka vakatikora e na veikoro mai Samaria, me kedrai sosomi na Isireli. A ra sa taukeni Samaria, ka tiko e na kena veikoro.

²⁵ Ia ni ra sa qai la'ki tiko kina, era sa sega ni rerevaki Jiova. A sa vakatala kina vei ira ko Jiova na laione eso, ka vakamatea eso vei ira.

²⁶ A ra sa vosa kina vua na tui Asiria, ka kaya, “O ira na veimatanitu ko a kauta ka vakatikora e na veikoro mai Samaria era sa sega ni kila nai valavala ni kalou ni vanua. A sa tala kina ko koya na laione eso ki na kedra maliwa, ka raica, era sa vakamatei ira, baleta ni ra sa sega ni kila se ra qarava vakaevei na kalou ni vanua.”

²⁷ A sa vakarota ko tui Asiria, ka kaya, “Dou kauta yani kina e dua vei ira na bete dou a kauta mai kina; ia me la'ki tiko mai kea ka vakavulici ira me ra qarava vakaevei na kalou ni vanua.”

²⁸ A sa lako e dua vei ira na bete era a kauta tani eliu mai Samaria, a sa tiko ki Peceli, ka vakavulici ira e nai valavala ni rerevaki Jiova.

²⁹ A ra sa dui bulia na nodra veikalou ko ira na lewe ni veivanua, ka vakaduria e na veivale mai na veitikina cecere era a cakava na kai Samaria, na lewe ni veivanua e na veikoro era sa tiko kina.

³⁰ Ia ko ira na kai Papiloni era sa buli Sukocipinoci; ia ko ira na kai Kuca era sa buli Nakali; ia ko ira na kai Emaci era sa buli Esima;

³¹ ia ko ira na Avimi era sa buli Nipasi kei Taritaki; ia ko ira na kai Sifaveimi era sa vakamai ira na luvedra e na bukawaqa kivei Etirameleki kei Anameleki, oi rau na kalou ni Sifaveimi.

³² Ia era sa rerevaki Jiova tiko, ka lesia mai vei ira na tamata walega me nodra bete ni veitikina cecere, era sa vakacabora na nodra i soro e na veivale ni veitikina cecere.

³³ Era sa rerevaki Jiova tiko, ka qarava tiko na nodra veikalou, me vaka na nodra i valavala na lewe ni veivanua era a kau tani mai kina.

³⁴ Era sa cakava tiko me vaka nai valavala eliu ka yacova na gauna oqo. Era sa sega ni rerevaki Jiova, ka sega ni kitaka me vaka na ka sa lesi vei ira, se na ka sa dodonu vei ira, se na vunau kei nai vakaro ka vakarota ko Jiova vei ira na luve i Jekope, o koya ka vakatoka ko koya ko Isireli,

³⁵ o ira ka veiyalayalati kei ira ko Jiova, ka vakaroti ira, ka kaya, “Dou kakua ni rerevaka na veikalou tani, se cuva vei ira, se qaravi ira, se vakacaboisoro vei ira,

³⁶ ia ko Jiova ga, o koya ka kauti kemudou cake mai na vanua ko Ijipita, e na kaukauwa levu kei na liga sa dodo yani, dou rerevaki koya, ka cuva vua, ka vakacaboisoro vei koya.

³⁷ Ia nai lesilesi, kei na ka dodonu, kei na vunau, kei nai vakaro, ka vola vei kemudou ko koya, mo dou vakabauta ka cakava ka tawa mudu. Dou kakua ni qarava na veikalou tani;

³⁸ ia na veiyalayalati ka'u a cakava kei kemudou dou kakua ni guilecava. Dou kakua talega ni rerevaka na kalou tani,

³⁹ ia ko Jiova ga na nomudou Kalou mo dou rerevaka, ka na vakabulai kemudou ko koya mai na ligadra na nomudou meca kecega.”

⁴⁰ A ra sa sega ni vakarorogo vua, ia era sa muria tikoga na nodra i valavala eliu.

⁴¹ Ko ira na lewe ni veivanua oqo era sa rerevaki Jiova, ia era sa qarava talega na nodra veimatakau ceuceu. Era sa vaka talega kina ko ira na luvedra kei na makubudra, me vaka ka kitaka ko ira na nodra qase, ka yacova na siga oqo.