2 Tui 15 - Ai Vola Tabu (Vakadewa Makawa Vakavoutaki 2021)

Sa Tui Juta ko Asaraia

¹ E na kenai karuasagavulu ka vitu ni yabaki i Jeropoama na tui Isireli, sa tekivu me lewa ko Asaraia na luve i Amasaia na tui Juta.

² E tinikaono na nona yabaki ni sa tekivu me lewa, ka sa lewa tiko mai Jerusalemi ka yabaki limasagavulu ka rua. Ia na yaca i tinana ko Jikolaia na marama ni Jerusalemi.

³ A sa daucaka dodonu e na mata i Jiova, me vaka na ka kecega ka cakava ko Amasaia na tamana.

⁴ Ia, sa sega ga ni biu vakatikitiki na veitikina cecere. Era a vakacaboisoro tikoga kina na tamata, ka vakama tikoga na ka boi vinaka e na veitikina cecere.

⁵ A sa cudruva na tui ko Jiova, ka sa vukavuka ko koya ka yacova na siga ka mate kina, a sa tiko e na dua na vale vakai koya ga. A sa lewa na vale ko Jocame na luve ni tui, ka lewai ira na lewe-ni-vanua.

⁶ Ia na kena vo ni cakacaka i Asaraia, kei na ka kecega sa cakava ko koya, sa sega li ni volai e nai Vola ni Veika sa Caka e na Nodra Gauna na Tui Juta?

⁷ A sa moce vata kei ira na nona qase ko Asaraia; a ra sa buluti koya vata kei ira na nona qase e na koro i Tevita; a sa buli me tui ko Jocame na luvena, me kenai sosomi.

Sa Tui Isireli ko Sakaraia

⁸ E na kenai katolusagavulu-ka-walu ni yabaki i Asaraia na tui Juta, sa lewa vei ira na Isireli mai Samaria ko Sakaraia na luve i Jeropoama ka vula ono.

⁹ A sa daucaka ca ko koya e na mata i Jiova, me vaka na ka era a cakava ko ira na nona qase. Sa sega ni biuta nai valavala ca i Jeropoama na luve i Nipati, o koya ka vakaivalavalacataki ira na Isireli.

¹⁰ A sa buki kena vere ko Salumi na luve i Jepesi, ka mokuta e na matadra na tamata, ka vakamatea, ka sa lewa me kenai sosomi.

¹¹ Ia na kena vo ni cakacaka i Sakaraia, raica, sa volai e nai Vola ni Veika sa Caka e na Nodra Gauna na Tui Isireli.

¹² Oqo na vosa i Jiova ka vosataka ko koya vei Jeu, ni sa kaya, “Eratou na dabe tiko e nai tikotiko vakaturaga nei Isireli ko iratou na luvemu, ka yacova na kenai kava ni tabatamata.” A sa yaco me vakakina.

Sa Tui Isireli ko Salumi

¹³ Sa tekivu me lewa ko Salumi na luve i Jepesi e na kenai katolusagavulu ka ciwa ni yabaki i Usaia na tui Juta; a sa lewa mai Samaria e dua dina na vula.

¹⁴ A sa lako cake mai Tirisa ko Mineemi na luve i Kata, ka lako ki Samaria, a sa mokuti Salumi na luve i Jepesi e Samaria, ka vakamatei koya, a sa lewa me kenai sosomi.

¹⁵ Ia na kena vo ni cakacaka i Salumi, kei na vere sa bukia ko koya, raica, sa volai e nai Vola ni Veika sa Caka e na Nodra Gauna na Tui Isireli.

¹⁶ Sa qai mokuti Tifisa ko Mineemi, kei ira kecega era tiko kina, kei na kena veiyasana mai Tirisa, ni ra sa sega ni vakacurumi koya. A sa mokuta kina ko koya, ka tava kecega na yalewa sa bukete era tiko kina.

Sa Tui Isireli ko Mineemi

¹⁷ E na kenai katolusagavulu ka ciwa ni yabaki i Asaraia na tui Juta, sa tekivu na nona lewa mai Samaria vei ira na Isireli ko Mineemi na luve i Kata, ka sa lewa me yabaki tini.

¹⁸ A sa daucaka ca ko koya e na mata i Jiova; sa sega ni biuta tani e nona siga kecega nai valavala ca i Jeropoama na luve i Nipati, o koya ka vakaivalavalacataki ira na Isireli.

¹⁹ Sa lako mai ki na vanua ko Puli na tui Asiria me vala; a sa solia vei Puli ko Mineemi e dua na udolu na taledi siliva, ka me sa totaki koya me vakataudeitaki kina vua na matanitu.

²⁰ A sa lavaka nai lavo ko Mineemi vei ira na Isireli, io vei ira yadua na tamata vutuniyau, era tauyalimasagavulu na sikeli siliva, ka me solia vua na tui Asiria. A sa lesu yani kina na tui Asiria, ka sa sega ga ni tiko e na vanua.

²¹ Ia na kena vo ni cakacaka i Mineemi, kei na ka kecega sa cakava ko koya, sa sega li ni volai e nai Vola ni Veika sa Caka e na Nodra Gauna na Tui Isireli?

²² A sa moce vata kei ira na nona qase ko Mineemi, ka sa lewa ko Pikaya na luvena, me kenai sosomi.

Sa Tui Isireli ko Pikaya

²³ E na kenai kalimasagavulu ni yabaki i Asaraia na tui Juta, sa tekivu me lewa mai Samaria vei ira na Isireli ko Pikaya na luve i Mineemi, ka sa lewa yabaki rua.

²⁴ A sa daucaka ca ko koya e na mata i Jiova. Sa sega ni biuta nai valavala ca i Jeropoama na luve i Nipati, o koya ka vakaivalavalacataki ira na Isireli.

²⁵ Ia ka sa buki kena vere ko Peka na luve i Rimalaia, e dua na nona turaga-ni-valu, a sa mokuti koya mai Samaria, e na tikina cecere e na vale ni turaga, o koya kei Arikopi kei Eraie, kei ira vata kaya e lewe limasagavulu na tamata era kai Kiliati; a sa vakamatei koya ko koya, a sa lewa me kenai sosomi.

²⁶ Ia na kena vo ni cakacaka i Pikaya, kei na ka kecega sa cakava ko koya, raica, sa volai e nai Vola ni Veika sa Caka e na Nodra Gauna na Tui Isireli.

Sa Tui Isireli ko Peka

²⁷ E na kenai kalimasagavulu ka rua ni yabaki i Asaraia na tui Juta, sa tekivu me lewa mai Samaria vei ira na Isireli ko Peka na luve i Rimalaia, ka sa lewa yabaki ruasagavulu.

²⁸ A sa daucaka ca ko koya e na mata i Jiova. Sa sega ni biuta nai valavala ca i Jeropoama na luve i Nipati, o koya ka vakaivalavalacataki ira na Isireli.

²⁹ E na gauna i Peka na tui Isireli, sa lako mai ko Tikilaci-pileseri na tui Asiria, ka kabai Aijoni, kei Epeli-peci-meeka, kei Janoa, kei Ketesi, kei Asori, kei Kiliati, kei Kalili, na vanua taucoko i Navitalai; ka kauti ira vakabobula ki Asiria.

³⁰ A sa bukiveretaki Peka na luve i Rimalaia ko Osea na luve i Ela, ka mokuti koya, ka vakamatea, a sa lewa me kenai sosomi, e na kenai karuasagavulu ni yabaki i Jocame na luve i Usaia.

³¹ Ia na kena vo ni cakacaka i Peka, kei na ka kecega sa cakava ko koya, raica, sa volai e nai Vola ni Veika sa Caka e na Nodra Gauna na Tui Isireli.

Sa Tui Juta ko Jocame

³² E na kenai karua ni yabaki i Peka na tui Isireli, na luve i Rimalaia, sa tekivu me lewa ko Jocame na luve i Usaia na tui Juta.

³³ Sa ruasagavulu ka lima na nona yabaki ni sa tekivu me lewa, a sa lewa tiko mai Jerusalemi ka yabaki tinikaono. Ia na yaca i tinana ko Jirusa, na luve i Setoki.

³⁴ A sa daucaka dodonu ko koya e na mata i Jiova; sa cakacaka me vaka na ka kecega ka cakava ko Usaia na tamana.

³⁵ Ia ka sa sega ni biu na veitikina cecere; sa ra vakacaboisoro tiko ko ira na tamata, ka vakama tiko na ka boi vinaka e na veitikina cecere. Sa cakava ko koya na matamata-ni-koro ni vale i Jiova, e cake.

³⁶ Ia na kena vo ni cakacaka i Jocame, kei na ka kecega sa cakava ko koya, sa sega li ni volai e nai Vola ni Veika sa Caka e na Nodra Gauna na Tui Juta?

³⁷ E na veisiga ko ya sa vakauqeti Risini na tui Siria, kei Peka na luve i Rimalaia, ko Jiova, me veivala kei Juta.

³⁸ A sa moce vata kei ira na nona qase ko Jocame, ka sa bulu vata kei ira na nona qase e na koro i Tevita na nona qase; a sa tui ko Easi na luvena, me kenai sosomi.