2 Tui 14 - Ai Vola Tabu (Vakadewa Makawa Vakavoutaki 2021)

Sa Tui Juta ko Amasaia

¹ E na kenai karua ni yabaki i Joasa na tui Isireli, na luve i Jioaasi, sa tekivu me lewa ko Amasaia na luve i Joasa na tui Juta.

² Sa ruasagavulu-ka-lima na nona yabaki ni sa tekivu me lewa, ka sa lewa mai Jerusalemi me yabaki ruasagavulu-ka-ciwa. Ia na yaca i tinana ko Jioatani, a marama ni Jerusalemi.

³ A sa caka dodonu ko koya e na mata i Jiova, ia sa sega ga ni vakataki Tevita na nona qase. Sa cakacaka ko koya me vaka na ka kecega ka cakava ko Joasa na tamana.

⁴ Ia sa sega ni biu vakatikitiki na veitikina cecere; era se vakacaboisoro tikoga kina ko ira na tamata ka vakama tikoga na ka boi vinaka e na veitikina cecere.

⁵ Ia ni sa vakataudeitaki vua na matanitu, sa mokuti ira na nona tamata era a vakamatea na tamana na tui.

⁶ Ia na luvedra na tamata era a vakamatei tamana, sa sega ni vakamatei ira ko koya; me vaka na ka sa volai e nai vola ni vunau i Mosese, ka vakarota ko Jiova, ka kaya, “Me ra kakua ni vakamatei na tama ni gone e na vuku ni luvedra, se vakamatei na gone e na vuku ni tamadra; ia na tamata yadua ena vakamatei e na vuku ni nona i valavala ca.”

⁷ Sa mokuti ira e le tini na udolu na kai Itomi ko koya e na Buca ni Masima ka tauri Sila e nai valu; ka vakatoka na yacana ko Jokicieli me yacova na siga oqo.

⁸ Sa qai vakatadu mata ko Amasaia vua na tui Isireli ko Jioasi, na luve i Jioaasi na luve i Jeu, ka kaya, “Mai, me daru mai vakasota mata mada.”

⁹ A sa talaki ko Jioasi na tui Isireli kivei Amasaia na tui Juta, ka kaya, “Sa talaki na wa-vakavotona mai Lepanoni ki na sitari mai Lepanoni, ka vaka, ‘Mo solia na luvemu yalewa vua na luvequ tagane me watina’; ia sa lako voli e dua na manumanu kila mai Lepanoni ka sa buturaka sobu na wa-vakavotona.

¹⁰ E dina ni ko sa mokuti ira na kai Itomi, ka ko sa yalolevu kina. Mo tei marautaka mada na nomu lagilagi, ka tiko ga mai nomu vale; ka cava ko sa tara kina na ka ca mo bale kina, io ko iko vata kei ira na Juta?”

¹¹ Ia sa sega ni via muria ko Amasaia. A sa mani lako cake kina ko Jioasi na tui Isireli, ka rau sa sota ka veivaluti kei Amasaia na tui Juta mai Peci-semesi e na vanua i Juta.

¹² A sa vakadrukai ira na Juta ko ira na Isireli, ka ra sa dui dro na tamata yadua ki na nona valelaca.

¹³ Ia ko Jioasi na tui Isireli sa tauri Amasaia na tui Juta, na luve i Jioasi, na luve i Easaia, mai Peci-semesi, ka lako ki Jerusalemi, ka basuraka na bai mai Jerusalemi ka rauta ni va na drau na kiupiti, mai na Matamata-ni-koro ni Ifereimi ka yacova na Matamata-ni-koro e Tutuna.

¹⁴ A sa kauta kecega ko koya na koula kei na siliva, kei nai yaya kecega sa kune e na vale i Jiova, kei nai yau mai na nona vale na tui, kei na tamata eso me vakataudeitaki kina na sautu; ka lesu tale ki Samaria.

¹⁵ Ia na kena vo ni cakacaka i Jioasi sa cakava ko koya, kei na nona kaukauwa, kei na nona veivala kei Amasaia na tui Juta, sa sega li ni volai e nai Vola ni Veika sa Caka e na Nodra Gauna na Tui Isireli?

¹⁶ A sa moce vata kei ira na nona qase ko Jioasi, a sa bulu vata kei ira na tui Isireli mai Samaria; a sa tui ko Jeropoama na luvena, me kenai sosomi.

Na Mate i Tui Amasaia

¹⁷ A sa bula tiko ko Amasaia na luve i Joasa na tui Juta ka yabaki tinikalima, ni sa mate ko Jioasi na luve i Jioaasi na tui Isireli.

¹⁸ Ia na kena vo ni cakacaka i Amasaia, sa sega li ni volai e nai Vola ni Veika sa Caka e na Nodra Gauna na Tui Juta?

¹⁹ A ra sa bukiveretaki koya mai Jerusalemi, a sa dro ko koya ki Lakisi; a ra sa talaki vua ki Lakisi, ka vakamatei koya kina.

²⁰ A ra sa kauti koya e na ose eso; a sa bulu mai Jerusalemi kei ira na nona qase e na koro i Tevita.

²¹ A ra sa kauti Asaraia ko ira kecega na Juta, ni sa tinikaono na nona yabaki, a ra sa buli koya me tui mei sosomi kei Amasaia na tamana.

²² Sa tarai Elaci ko koya, ka vakasuka tale vei ira na Juta, sa oti, sa qai moce vata na tui kei ira na nona qase.

Sa Tui Isireli ko Jeropoama Nai Karua

²³ E na kenai katinikalima ni yabaki i Amasaia na tui Juta, na luve i Joasa, sa tekivu me lewa mai Samaria ko Jeropoama na luve i Joasa na tui Isireli, ka sa lewa yabaki vasagavulu ka dua.

²⁴ A sa daucaka ca ko koya e na mata i Jiova. Sa sega sara ni biuta tani nai valavala ca i Jeropoama na luve i Nipati, o koya ka vakaivalavalacataki ira na Isireli.

²⁵ Sa vakasuka tale ko koya nai yalayala kei Isireli mai nai curucuru ki Emaci, ka yacova na wasawasa mai na buca, me vaka na vosa i Jiova na nodra Kalou na Isireli, ka vosataka ko koya e na gusu i Jona na nona tamata, o koya na luve i Emitai na parofita, na kai Kaca-eferi.

²⁶ Ni sa raica ko Jiova na nodra rarawa na Isireli ni sa rui bibi sara; ka sa sega ni dua e vo, na tamata bobula se sereki, ka sega me veivuke vei ira na Isireli.

²⁷ Ia sa sega ga ni kaya ko Jiova ni na bokoca tani na yacadra na Isireli mai na ruku i lomalagi, ka sa vakabulai ira kina e na liga i Jeropoama na luve i Joasa.

²⁸ Ia na kena vo ni cakacaka i Jeropoama kei na ka kecega sa cakava ko koya, kei na nona kaukauwa, kei na sala sa ia kina nai valu ko koya, kei na sala sa rawai Tamasiko kei Emaci tale kina me nei Juta e Isireli, sa sega li ni volai e nai Vola ni Veika sa Caka e na Nodra Gauna na Tui Isireli?

²⁹ A sa moce vata kei ira na nona qase ko Jeropoama, io ko ira na tui Isireli, ka sa tui ko Sakaraia na luvena, me kenai sosomi.