2 Tui 13 - Ai Vola Tabu (Vakadewa Makawa Vakavoutaki 2021)

Sa Tui Isireli ko Jioaasi

¹ E na kenai karuasagavulu ka tolu ni yabaki i Joasa na tui Juta, na luve i Easaia, sa buli me tui vei ira na Isireli mai Samaria ko Jioaasi na luve i Jeu, ka sa lewa yabaki tinikavitu.

² A sa daucaka ca ko koya e na mata i Jiova, ka muria nai valavala ca i Jeropoama na luve i Nipati, ko koya ka vakaivalavalacataki ira na Isireli; sa sega ni biuta tani ko koya.

³ A sa waqa na cudru i Jiova vei ira na Isireli, a sa soli ira ki na liga i Eseeli na tui Siria, kei na liga i Peni-etati na luve i Eseeli, e na veigauna kecega.

⁴ A sa vakamamasu vei Jiova ko Jioaasi, a sa rogoci koya ko Jiova, ni sa raica sa vakasaurarataki ko ira na Isireli, ni sa vakasaurarataki ira na tui Siria.

⁵ (A sa solia ko Jiova vei ira na Isireli e dua nai vakabula, a ra sa vakabulai kina mai na ligadra na kai Siria; a ra sa tiko mai na nodra veivale laca ko ira na Isireli, me vaka eliu.

⁶ Ia ka ra sa sega ni biuta nai valavala ca ni vale i Jeropoama, ko koya ka vakaivalavalacataki ira na Isireli, ia era sa muria tiko ga; a sa tu talega mai Samaria na kalouyalewa ni veikau.)

⁷ A sa sega ni laiva na tamata vei Jioaasi, e le limasagavulu ga na tamata sa dauvodo ose, ka tini na qiqi-ni-valu, ka le tini na udolu na tamata sa lako e yavadra; ni sa vakarusai ira na tui Siria, ka cakava me ra vaka na kuvu-ni-qele ni ra sa dausamulaki.

⁸ Ia na vo ni cakacaka i Jioaasi, kei na ka kecega sa cakava ko koya, kei na nona kaukauwa, sa sega li ni volai e nai Vola ni Veika sa Caka e na Nodra Gauna na Tui Isireli?

⁹ A sa moce vata kei ira na nona qase ko Jioaasi, a ra sa buluti koya mai Samaria; a sa tui ko Joasa na luvena, me kenai sosomi.

Sa Tui Isireli ko Jioasi

¹⁰ E na kenai katolusagavulu ka vitu ni yabaki i Joasa na tui Juta, sa tekivu me lewa vei ira na Isireli mai Samaria ko Jioasi na luve i Jioaasi, ka sa lewa yabaki tinikaono.

¹¹ A sa daucaka ca ko koya e na mata i Jiova. Sa sega sara ni biuta tani nai valavala ca i Jeropoama na luve i Nipati, ko koya ka vakaivalavalacataki ira na Isireli, ia sa muria tikoga ko koya.

¹² Ia na kena vo ni cakacaka i Joasa, kei na ka kecega sa cakava ko koya, kei na nona qaqa sa vala kina kei Amasaia na tui Juta, sa sega li ni volai e nai Vola ni Veika sa Caka e na Nodra Gauna na Tui Isireli?

¹³ A sa moce vata kei ira na nona qase ko Joasa; a sa tiko e nona i tikotiko vakaturaga ko Jeropoama; a sa bulu vata ko Joasa kei ira na tui Isireli mai Samaria.

Na Mate nei Ilaisa

¹⁴ Ni sa tauvi mate tiko ko Ilaisa e na mate ka qai ciba kina, a sa lako sobu vua ko Joasa na tui Isireli, ka sa tagi e matana, ka sa kaya, “I tamaqu, i tamaqu! Na nodra qiqi-ni-valu na Isireli kei na nodra tamata dauvodo ose!”

¹⁵ A sa kaya vua ko Ilaisa, “Mo taura e dua na dakai-titi kei na gasau.” A sa taura ko koya na dakai-titi kei na gasau.

¹⁶ A sa kaya vua na tui Isireli ko koya, “Mo vakadretaka e na ligamuni na dakai-titi”; ka sa vakadretaka kina e na ligana. A sa vakatauca na ligana ko Ilaisa ki na liga ni tui.

¹⁷ A sa qai kaya ko koya, “Mo dolava nai sogo cicila vaka ki na tokalau”; a sa dolava ko koya. A sa kaya ko Ilaisa, “Mo vana yani”, ka sa vana ko koya. A sa kaya ko koya, “Na gasau ni qaqa i Jiova, na gasau ni qaqa vei ira na kai Siria! Ni ko na mokuti ira na kai Siria mai Efeki ka vakaoti ira sara.”

¹⁸ A sa kaya ko koya, “Mo taura na gasau”, ka sa taura ko koya. Ka sa kaya ko koya vua na tui Isireli, “Mo mokuta na qele e na gasau oqori.” A sa mokuta vakatolu, ka qai cegu.

¹⁹ A qai cudru vua ko koya na tamata ni Kalou, ka kaya, “E dodonu mo a mokuta vakalima se vakaono; ni ko na qai mokuti ira kina na kai Siria ka vakaotia sara, ia oqo ko na mokuti ira na kai Siria me vakatolu ga.”

²⁰ A sa ciba ko Ilaisa, ka ra sa buluti koya. Era sa daulako voli mai ki na vanua na nodra i lawalawa batikadi na Moapi, ni sa qai tekivu na yabaki.

²¹ Ni a bulu tiko e dua na tamata, era qai raica e dua nai lawalawa batikadi ka ra mani viritaka kina na yagona ki nai bulubulu i Ilaisa; ia ni sa tara na sui i Ilaisa na yago ni tamata, sa bula tale ko koya, ka tucake e na yavana.

Na Veivaluvaluti nei Isireli kei Siria

²² A sa vakasaurarataki ira na Isireli ko Eseeli na tui Siria, e na gauna kecega i Jioaasi.

²³ Ia sa lomani ira ko Jiova, ka sa yalololoma vei ira, ka sa nanumi ira e na vuku ni nona veiyalayalati kei Eparaama, kei Aisake, kei Jekope, ka sega ni via vakarusai ira, ka se bera ni biuti ira tani e matana.

²⁴ Ni sa mate ko Eseeli na tui Siria, a sa tui ko Peni-etati na luvena, me kenai sosomi.

²⁵ Ia ko Jioasi na luve i Jioaasi sa taura tale mai vei Peni-etati na luve i Eseeli na veikoro ka kovea ko koya mai vei Jioaasi na tamana e nai valu. A sa vakadrukai koya vakatolu ko Joasa ka rawata tale na veikoro nei Isireli.