2 Timoci 4 - Ai Vola Tabu (Vakadewa Makawa Vakavoutaki 2021)

¹ Ia ka'u sa vakarota e na mata ni Kalou kei Karisito Jisu, o koya ena lewai ira na bula kei ira na mate e na nona rairai mai kei na nona matanitu:

² mo vunautaka na Vosa; mo vakarau tu e na gauna vinaka kei na gauna ca; mo tukuna na ka e ca, mo vunauci ira sa cala, mo dauveivakaroti tiko e nai vakavuvuli ka vosota vakalevu sara.

³ Ni na yaco na gauna era na sega ni vosota kina nai vakavuvuli dodonu, ia ena vaka na nodra gagadre ca, era na vakalewevuqataki ira kina na nodra i vakavuvuli, ni sa qasikanunu na daligadra,

⁴ ka ra na vagolea tani na daligadra mai na ka dina, ka lesu ki nai tukutuku wale.

⁵ Ia ko iko, mo yalomatua e na ka kecega, mo vosota na ka rarawa, mo kitaka na cakacaka ni vakavuvuli, vakayacora sara na ka ko sa lesi kina mo talatala.

Nai Votavota i Paula ena Gauna mai Muri

⁶ Ni'u sa vakarau tu me'u liviraki, ka sa voleka na siga ni noqu toki yani.

⁷ Au sa vala oti e nai valu vinaka, au sa ciciva oti na cere, au sa taura matua na vakabauta.

⁸ E muri, sa maroroi me noqu nai sala vakaturaga ni valavala dodonu, o koya ena solia mai vei au na Turaga, o koya na turaga-ni-lewa dodonu, e na siga ko ya, ia ena sega vei au duaduaga, vei ira kece talega era sa vinakata na nona rairai mai.

Nai Tukutuku Eso vei Timoci

⁹ Gumatua mo lako vakatotolo mai vei au,

¹⁰ ni sa biuti au ko Timasa, ni sa lomani vuravura oqo, ka sa lako ki Cesalonaika; ko Kirisiki sa lako ki Kalatia, o Taito ki Talimetia.

¹¹ Sa tiko vei au ko Luke duaduaga. Kauti Marika mo drau lako vata kaya mai, ni sa yaga vei au ko koya e na cakacaka.

¹² Au sa talai Tikiko ki Efeso.

¹³ Ai tutuvi kau a laiva mai Tiroa vei Karipo, ni ko sa lako mai, mo kauta mai, kei nai vola, ia mo nanuma sara nai vola kuli-ni-sipi.

¹⁴ Sa levu na ka ca ka kitaka vei au ko Alekisada na matai ni parasa; ena sauma vei koya na Turaga me vaka na nona cakacaka.

¹⁵ Mo qarauni iko talega mai vua, ni sa qatia vakalevu na neitou vosa ko koya.

¹⁶ E nai matai ni noqu veilewai, sa sega e dua na tamata keirau sa tu vata kaya, ia sa biuti au ko ira kecega. Me kakua ni beitaki oqo vei ira!

¹⁷ Ia sa tu vata kei au na Turaga ka sa vakaukauwataki au, me kilai kina e na vukuqu na ka sa vunautaki, me ra rogoca talega na veimatanitu kecega. Ia ka'u a vakabulai mai na gusu ni laione.

¹⁸ Ena vakabulai au na Turaga mai na ka ca kecega, ka na maroroya talega na noqu bula ki na nona matanitu vakalomalagi. Me ia vua na vakarokoroko ka sega ni mudu. Emeni.

Nai Otioti ni Vakanuinui Vinaka

¹⁹ Au sa loloma yani vei Virisila kei Akuila, vei ira talega na lewe-ni-vuvale i Onisivoro.

²⁰ Sa tiko mai Korinica ko Erasito, ka'u sa laivi Tirofimo mai Milito ni sa tauvi-mate.

²¹ Gumatua mo liu mai ni se bera na vula i liliwa. Sa loloma yani vei iko ko Upolo, kei Putena, kei Laino, kei Kilotia, kei ira kecega na veiwekani.

²² Me tiko vata kei na yalomu na Turaga ko Jisu Karisito. Me nomudou na loloma. Emeni.